TIPISALEMA 105

₁Dzunisani Yehovha khongelani vito ra yena!

Tivisani exikarhi ka matiko mitirho ya yena leyi tlakukeke!

₂N'wi yimbeleleni, n'wi dzuneni hi tinsimu ta n'wina,

Vurisani swihlamariso hinkwaswo swa yena!

₃Tikuriseni hi vito leri kwetsimaka ra yena!

Timbilu ta lava lavaka Yehovha a ti tsake!

₄Lavani Yehovha ni matimba ya yena,

Mi lava mombo wa yena hi masiku!

₅Tsundzukani mitirho leyo hlamarisa leyi a nga yi endla,

Mahlori ya yena ni ku avanyisa loku humaka enon'wini wa yena.

₆N'wina, va rixaka ra Abrahama, nandza wa yena,

N'wina va Yakobo, vahlawuriwa va yena.

₇Yehovha, hi yena Xikwembu xa hina;

Ku avanyisa ka yena ku eneta misava hinkwayo.

₈Wa tsundzuka ntwanano wa yena hi laha ku nga heriki,

Ni rito leri a ri leriseke etinxakeni ta madzana.

₉Wu nga ntwanano lowu a nga wu endla na Abrahama,

Ni ku hlambanya loku a nga ku hlambanyela Isaka,

₁₀Lexi a nga xi tiyisa eka Yakobo wu va nawu

Ni ntwanano lowu nga heriki eka Israele.

₁₁A ku:

“Ndzi ta ku nyika tiko ra Kanana,

Ri va ndzhaka ya n'wina.”

₁₂Loko va ha ri vatsanana,

Va nga talanga, va ri vaendzi etikweni,

₁₃Va ri karhi va tsendzeleka ematikweni,

Ni le ku fumeni kun'wana ni kun'wanyana,

₁₄A nga pfumelelanga munhu ku va xanisa,

A laya tihosi hikwalaho ka vona,

₁₅A ku: “Mi nga khumbeni vahlawuriwa va nga,

Mi nga tshuki mi endlela vaprofeta va mina swo biha!”

₁₆A vitanela tiko rero ndlala,

A va tsona vuswa lebyi va tiyisaka,

₁₇A va rhumela munhu ku va rhangela emahlweni:

Yena Yosefa a xavisiwa ku va khumbi.

₁₈Va manya milenge ya yena hi khotso,

A hanyisa sweswo etinsimbhini,

₁₉Ku fikela nkarhi lowu timhaka leti a ti vuleke ti humelelaka,

Kutani rito ra Yehovha ri n'wi ringa.

₂₀Hosi ya Egipta yi rhumela ku n'wi tshunxa,

Mufumi wa matiko a n'wi pfulela nyangwa ya khotso,

₂₁Kutani a n'wi veka ndhuna ya yindlu ya yena,

Ni mulanguteri wa rifuwo ra yena hinkwaro.

₂₂A a ri ni matimba ya ku boha tihosana ta yena,

Ni ku dyondzisa vutlhari eka vakulukumba.

₂₃Kutani Israele a fika eEgipta,

Yakobo a tshama etikweni ra Hamu, a ri n'eni.

₂₄Yehovha a andzisa tiko ra yena ngopfu,

Ri va ni matimba ku tlula valala va rona.

₂₅A hundzuluxa timbilu ta vona, leswaku va ta venga tiko ra yena,

Va dlumama ku lovisa malandza ya yena.

₂₆A rhuma Muxe, nandza wa yena,

Na Aroni loyi a nga n'wi hlawula.

₂₇Va tirha exikarhi ka vona swikombiso leswi a va byeleke swona,

Ni masingita etikweni ra Hamu.

₂₈A rhuma xingwindze, a endla munyama,

Kambe a va alanga rito ra yena.

₂₉A hundzula mati ya vona ngati,

A herisa tinhlampfi ta vona.

₃₀Tiko ra vona ri tala mitlambya,

Yi nghena ni le tindlwini ta tihosi ta vona.

₃₁A vula, kutani ku ta tinsuna,

Ni tin'hwala etikweni ra vona hinkwaro.

₃₂A endla timpfula ta vona xihangu,

A rhuma malangavi ya ndzilo etikweni hinkwaro.

₃₃A ba tivhinya ta vona ni mikuwa ya vona,

A tshovelela mirhi ya tiko ra vona.

₃₄A vula, kutani ku ta tinjiya,

Tinjiya leti tsandzaka vahlayi,

₃₅Ti dya byanyi hinkwabyo bya tiko,

Ti heta mihandzu hinkwayo ya masimu ya vona,

₃₆A ba ni mativula hinkwawo etikweni ra vona,

Swirhangana hinkwaswo swa matimba ya vona.

₃₇Kutani a humesa Vaisraele va tekile silivhere ni nsuku,

Ku nga ri na munhu la tsekatsekaka etinxakeni ta vona.

₃₈Vaegipta va tsakela ku huma ka vona,

Hikuva nchavo wa Israele a wu va khomile.

₃₉U phurumule papa ku va sirhela,

Ni ndzilo ku va voningela nivusiku.

₄₀Kuteloko va kombele, u va nyike switsatsatsa,

Kutani a va xurhisa hi vuswa bya tilo.

₄₁A handzula ribye, kutani mati ma pfelela,

Ma khuluka hi maboboma exikarhi ka mananga.

₄₂Hikuva a tsundzukile rito ra yena leri hlawuriweke,

A tsundzuka na Abrahama, nandza wa yena.

₄₃A humesa tiko ra yena hi ku tsaka,

Ni vahlawuriwa va yena hi ku tsakisisa.

₄₄A va nyika misava ya matiko,

Va titekela mitirho ya tinxaka ta vanhu,

₄₅Leswaku va ta hlayisa ku lerisa ka yena,

Va famba hi milawu ya yena.

Dzunisani Yehovha!