1Vutlhari a byi huweleri xana?
Ni ku anakanya a ku tlakusi rito ra kona xana?
2Byi yimile eswitsungeni, ni le tindleleni,
Ni le mitsendzeleni;
3Byi huwelela etinyangweni, ni le tihubyeni,
Ni le mindyangwini, byi ku:
4“Yahe! Vakulukumba, ndzi vitana n'wina,
Rito ra mina ri lava na n'wina, vana va vanhu.
5N'wina, varivali, dyondzani mano;
Na n'wina, vahunguki, mi lava ku twisisa.
6Yingiselani hikuva ndzi ta vula leswikulu,
Nomu wa mina wu ta vulavula leswo lulama.
7Hikuva ririmi ra mina ri ta vula leswi tiyeke,
Kutani leswo biha i manyala enon'wini wa mina.
8Ku vulavula hinkwako ka nomu wa mina ku lulamile,
Eka wona, ku hava ku xisa ni ku hambuka;
9Hinkwaswo swa twakala eka munhu la nga ni ku anakanya,
Swi lulamile eka lava kumaka vutivi.
10Amukelani dyondzo ya mina leyi tlulaka silivhere,
Ni vutivi lebyi tlulaka nsuku lowo saseka.
11Hikuva vutlhari byi tlula tiperela,
Hinkwaswo leswi tsakisaka swi nga ka swi nga xaxameri na byona.
12Mina, vutlhari, ndzi akile ni mano,
Ndzi kumile vutivi bya mianakanyo ya ku tlhariha.
13Ku chava Xikwembu i ku venga swo biha;
Ndzi venga manyunyu, ni ku tidzunisa, ni ku famba loko biha,
Ni nomu wo homboloka.
14Ku tsundzuxa ni ku kateka i swa mina,
Na wona mano, ni matimba i swa mina.
15Ha mina tihosi ta fuma,
Ni tihosana ti lerisa hi ku lulama.
16Vafumi va fuma ha mina,
Swi tano ni vakulukumba ni vaavanyisi hinkwavo va misava.
17Ndzi rhandza lava ndzi rhandzaka,
Lava ndzi lavaka, va ta ndzi kuma.
18Rifuwo ni ku twala swi le ka mina,
Rifuwo ra xiviri ni ku lulama.
19Mbhandzu wa mina wu tlula nsuku, hambi wu ri nsuku wo saseka.
Leswi tshoveriwaka eka mina swi tlula silivhere.
20Ndzi famba endleleni yo lulama,
Ni le mitileni leyinene.
21Ndzi nyika lava ndzi rhandzaka ndzhaka leyi tiyeke,
Ndzi tata vuhlayiselo bya vona.
22“Yehovha u ndzi vekile xirhangana xa ndlela ya yena,
Ndzi rhangele mitirho ya yena ya khalekhale.
23Ndzi vekiwile vuhosi mikarhi yi nga si sungula,
Ni misava yi nga si va kona.
24Ndzi velekiwile, malwandle ma nga si va kona,
Ni swihlovo leswi pfelelaka mati layo tala.
25Ndzi tswariwile tintshava ti nga si tumbuluka,
Ni timbala ti nga si humelela.
26Yehovha a nga si endla misava ni matiko,
Ni masungulo ya ntshuri wa misava.
27Siku a lunghisaka matilo, a ndzi ri kona;
Siku a tsalaka xirhendzevutana exibakabakeni.
28Siku a tlhomaka mapapa ya le henhla,
Siku swihlovo swa swidziva swi humaka hi matimba.
29Ni siku a lerisaka lwandle ndzilakana wa rona,
Mati ya rona ma nga tluli ribuwu,
Ni siku a anakanyaka masungulo ya misava,
30A ndzi ri mutatisi wa yena,
A ndzi n'wi tsakisa hi masiku,
31Ndzi tsakela mombo wa yena,
Ndzi tsakela ni vana va vanhu.
32“Sweswi, vana vanga, ndzi yingiseni,
Ku katekile lava yaka hi tindlela ta mina!
33Yingisani dyondzo, mi ta tlhariha,
Mi nga yi cukumeti.
34Ku katekile munhu la ndzi yingisaka,
La langutaka nyangwa ya mina hi masiku,
La hanyaka emarimbeni ya nyangwa ya mina.
35Hikuva la ndzi kumaka u kumile vutomi,
U kumile tintswalo ta Yehovha.
36Kambe la ndzi dyohelaka u onha moya wa yena.
Hinkwavo lava ndzi vengaka va rhandza rifu.”
