SWIVURISO 7

₁N'wananga, hlayisa marito ya mina,

U tiyisa ku lerisa ka mina embilwini ya wena.

₂U yingisa milawu ya mina, u ta hanya;

Xiya dyondzo ya mina kukotisa swivono swa mahlo ya wena,

₃U yi tsondzela etintihweni ta wena,

U yi tsala eribyeni ra mbilu ya wena.

₄Byela vutlhari, u ku: “U makwerhu,”

Ku twisisa, u ku vula nakuloni,

₅Swi ta ku hambuxa ni nsati wa mbiri,

Ni nghwavavana ya ririmi ra ku xisa.

₆A ndzi yimile efasitereni ra yindlu ya mina,

Ndzi languta hi tinhi ta rona.

₇Ndzi vona exikarhi ka swihunguki,

Ndzi vonisisa exikarhi ka lavantshwa, jaha rin'wana leri pfumalaka ku twisisa;

₈A hundza entsendzeleni ekusuhi ni vutshamo bya nsati loyi,

A khoma ndlela ya yindlu ya yena:

₉Loko ku sungula ku phuma, ri va ri perile,

Ni vusiku byi endle munyama.

₁₀A hlanganisiwa hi wansati

La bombeke hi mikhuva ya tinghwavavana, kasi u ni mbilu yo kanganyisa,

₁₁U ni pongo, i wa nhloko yo nonon'hwa,

Milenge ya yena a yi tshami endlwini ya yena;

₁₂Kumbe a yima emitsendzeleni, kumbe erivaleni,

A etlelela emakhumbini hinkwawo.

₁₃A n'wi khoma, a n'wi ntswontswa,

A nga ri na tingana emahlweni ka yena, a ku:

₁₄“Ndzi ni nkhuvo wa magandzelo ya ndzalo,

Namuntlha ndzi hetisile ku hlambanya ka mina;

₁₅Hikwalaho ndzi humeke ndzi ta hlangana na wena,

Ku ku lava exihundleni, kutani ndzi ku kumile.

₁₆Ndzi andlele masangu ya mina hi malwandla,

Ni tinguvu leti lukiweke hi ntsembyana wa Egipta.

₁₇Ndzi nun'hwerisile masangu hi murhi wa mirha,

Ni mhangana ni sinamoni.

₁₈Tana hi tipyopyisa erirhandzwini byi ko byi xa;

Hi tsakela ku nandziha swin'we;

₁₉Hikuva nuna wa mina a nga kona,

U fambile ekule;

₂₀U tekile nkwama wa mali,

U ta vuya hi n'hweti leyi taka.”

₂₁A tingatinga hi marito yo tala,

A n'wi hlula hi mano ya milomu ya yena.

₂₂Kutani jaha rero ri n'wi landzelela

Kukota homu loko yi ya eku tlhaviweni,

Ku kotisa xihunguki lexi yaka eku biweni,

₂₃Xi ko xi tlhaviwa xivindzi hi nseve,

Ku kotisa nyanyana leyi hatlisaka ku wela entlhan'wini,

Yi nga tivi leswaku wu ta lovisa vutomi bya yona.

₂₄Hikwalaho, vana vanga, ndzi yingiseni,

Mi yingisa marito ya nomu wa mina.

₂₅Mbilu ya wena yi nga hambukeli endleleni ya yeloyi,

U nga lahleki emitileni ya yena.

₂₆Hikuva lava tlhaviweke u va wisile lavo tala,

Lava a va dlayeke a ti ri tinhenha leto tala.

₂₇Yindlu ya yena i ndlela ya xivandla xa vafi,

Leyi xikelaka eswidziveni swa rifu.