Ta mitirho ya Valevhi.
1Yehovha a byela Muxe na Aroni, a ku: 2“A ku hlayiwe vana va Kohata exikarhi ka vana va Levhi, hi tinyimba ta vona, ni tindlu ta vatata wa vona, 3ku sungula hi va malembe ya 30 ni lava tlulaka, ku fika eka va malembe ya 50, hinkwavo lava nghenaka enxaxeni wa ntirho wa tabernakela ya nhlengeletano.
4“Hi wona ntirho wa vana va Kohata etabernakeleni ya nhlengeletano, xikwetsimisiso.
5“Kutakuloko mixaxa yi fanele ku suka, Aroni ni vana va yena va ta ta xikisa xisirhelo xa nguvu, va funengeta areka ya vumbhoni ha yona; 6va ta veka ehenhla ka yona nkumba wa madzovo ya tintini, va andlala ehenhla ka wona nguvu leyikulu ya xivunguvungu, va nghenisa ni mimpingu. 7Va ta funengeta tafula ra xikombiso hi nguvu ya xivunguvungu, va veka ehenhla ka rona mikambana, ni mindzheko, ni mikamba, ni makhuwana ya ku xuva; swinkwa swa masiku swi ta va ehenhla ka rona; 8kutani va ta funengeta swilo leswi hi nguvu ya karmesi; yona nguvu va ta yi funengeta hi madzovo ya tintini lama rhungiweke, kutani va ta nghenisa mimpingu eka rona. 9Va ta teka nguvu ya xivunguvungu, va funengeta ha yona kandelari ya rivoningo, ni mavoningo ya yona, ni swikero swa yona, ni swibya swa nkuma, ni makhuwana hinkwawo ya yona ya mafurha, swi ri swibya leswi va tirhaka ha swona ntirho wa yona; 10va ta yi veka swin'we ni swibya hinkwaswo swa yona emadzobyeni lama rhungiweke ya tintini; kutani va ta yi veka erihlakeni. 11Va ta funengeta alitari ya nsuku hi nguvu ya xivunguvungu; va yi funengeta kambe hi madzovo ya tintini lama rhungiweke, kutani va ta nghenisa mimpingu ka yona. 12Va ta teka swibya hinkwaswo swa ntirho, leswi va tirhaka ha swona ntirho evukwetsimelweni, va ta swi veka engubyeni ya xivunguvungu, va engeta va swi funengeta hi madzovo ya tintini lama rhungiweke, kutani va ta swi veka erihlakeni. 13Va ta susa nkuma ealitarini, kutani va yi funengeta hi nguvu ya scarlet; 14ehenhla ka yona va ta veka swibya hinkwaswo leswi va tirhaka ntirho wa yona ha swona: swimbitana swa mirhi ya risuna, ni tiforoko, ni tifoxolo ni mindzheko, yi ri mitirho hinkwayo ya alitari, va ta swi funengeta hi madzovo ya tintini lama rhungiweke, kutani va ta nghenisa mimpingu eka yona.
15“Aroni ni vana va yena loko va ta va va hetile ku funengeta vukwetsimelo ni mitirho hinkwayo ya byona, mixaxa yi ta fanela ku suka; kwalaho, vana va Kohata va ta nghena ku swi rhwala. Kambe va nga tshuki va khumba xilo lexi hlawuriweke hikuva va nga fa. Hi wona ndzhwalo wa vana va Kohata etabernakeleni ya nhlengeletano.
16“Eliyazara, n'wana Aroni, muprista, u ta va mulanguteri wa mafurha ya rivoni, ni wa mirhi ya risuna, ni wa mhamba ya masiku, ni wa mafurha ya xitolelo; u ta langutela Yindlu hinkwayo ni hinkwaswo swa yona, ni swa vukwetsimelo, ni mitirho ya byona.”
17Yehovha a byela Muxe na Aroni, a ku: 18“Chavani leswaku nyimba ya tindlu ta va Kohata yi susiwa exikarhi ka Valevhi; 19kambe va endleleni leswi, leswaku va hanya, va nga tshuki va fa loko va ta tshinelela xikwetsimisiso: Aroni ni vana va yena va ta ta veka un'wana ni un'wana entirhweni wa yena ni le ndzhwalweni wa yena. 20Kutani va nga ka va nga ngheni ku languta, hambi ku ri kutsongo, swilo leswi hlawuriweke; hikuva va nga fa.”
21Yehovha a byela Muxe, a ku: 22“Hlaya ni vana va Gerixoni, hi tindlu ta vatata wa vona, ni tinyimba ta vona. 23U va hlaya ku sungula hi va malembe ya 30 ni lava tlulaka, ku fika eka va malembe ya 50: hinkwavo lava nghenaka enxaxeni wa ntirho wa tabernakela ya nhlengeletano. 24Hi wona ntirho wa tindlu ta va Gerixoni, hambi ku ri ku tirha, hambi ku ri ku rhwala. 25Va ta rhwala tinguvu ta yindlu ni tabernakela ya nhlengeletano, xifunengeto xa yona, ni xifunengeto xa madzovo ya tintini lama tlhandlekisiwaka ehenhla, ni nguvu ya nyangwa ya tabernakela ya nhlengeletano; 26ni tinguvu ta xivava, ni nguvu ya nyangwa ya xivava lexi nga ekusuhi ni Yindlu ni alitari, ematlhelweni hinkwawo; ni tingoti ta tona, ni swibya hinkwaswo swa mitirho ya tona; va ta tirha mitirho hinkwayo ya xona. 27Ntirho hinkwavo wa vana va Gerixoni wu ta lerisiwa hi Aroni ni vana va yena, hambi leswi va nga ta swi rhwala, hambi leswi va nga ta swi tirha: mi ta veka eka vona ni ku va tshembisa hinkwaswo leswi va nga ta swi rhwala. 28Hi wona ntirho wa tindlu ta va Gerixoni etabernakeleni ya nhlengeletano, ni leswi vekiweke eka vona, va ri ehansi ka Itamara, n'wana Aroni, muprista.
29“U ta hlaya vana va Merari hi tinyimba ta vona ni tindlu ta vatata wa vona. 30U va hlaya u sungula hi va malembe ya 30 ni lava tlulaka, ku fika eka va malembe ya 50: hinkwavo lava nga ta nghena enxaxeni wa ntirho wa tabernakela ya nhlengeletano. 31Hi swona leswi tshembisiweke eka vona, leswi va nga ta swi rhwala, wu va ntirho hinkwawo wa vona etabernakeleni ya nhlengeletano: Mapulangi ya Yindlu, ni timbalelo ta yona, ni timhandze ta yona, ni switshamo swa yona, 32ni timhandze ta xivava swa matlhelo hinkwawo ni switshamo swa tona ni timhingu ni tingoti, ni swilo hinkwaswo swa tona, ni mitirho hinkwayo ya tona; mi ta swi veka eka vona hi ku hlaya mavito ya swilo leswi va fanelaka ku swi hlayisa ni ku swi rhwala. 33Hi wona ntirho wa vatukulu va vana va Merari; mitirho hinkwayo ya vona etabernakeleni ya nhlengeletano, yi lerisiwa hi Itamara, n'wana Aroni, muprista.”
34Kutani Muxe, na Aroni, ni tihosi ta nhlengeletano, va hlaya vana va Kohata hi tinyimba ta vona, ni tindlu ta vatata wa vona, 35va sungula hi va malembe ya 30, ni lava tlulaka, ku fika eka va malembe ya 50; hinkwavo lava nghenaka enxaxeni wa ntirho wa tabernakela ya nhlengeletano. 36Ntsengo wa vona hi tindlu ta vona a wu ri wa 2 750. 37Hi vona lava hlayiweke va tindlu ta va Kohata; hinkwavo va khome ntirho etabernakeleni ya nhlengeletano, va ri lava Muxe na Aroni va va hlayeke hi ku lerisa ka Yehovha ha Muxe.
38Ntsengo wa vana va Gerixoni, hi tinyimba ta vona, ni tindlu ta vatata wa vona, 39ku sungula hi va malembe ya 30, ni lava tlulaka, ku fika eka va malembe ya 50 hinkwavo lava nghenaka enxaxeni wa ntirho wa tabernakela ya nhlengeletano: 40ntsengo wa vona hi tinyimba ta vona, ni tindlu ta vatata wa vona, a va ri va 2 630. 41Hi vona lava hlayiweke va tindlu ta vana va Gerixoni, hinkwavo va khome ntirho etabernakeleni ya nhlengeletano, va ri lava Muxe na Aroni va va hlayeke hi ku lerisa ka Yehovha.
42Ntsengo wa vana va Merari, hi tinyimba ta vona, ni tindlu ta vatata wa vona, 43ku sungula hi va malembe ya 30, ni lava tlulaka, ku fika eka va malembe ya 50; hinkwavo lava nghenaka enxaxeni wa ntirho wa tabernakela ya nhlengeletano: 44ntsengo wa vona hi tindlu ta vona a va ri va 3 200. 45Hi vona lava hlayiweke va tindlu ta Merari, lava Muxe na Aroni va va hlayeke hi ku lerisa ka Yehovha ha Muxe.
46Ntsengo hinkwawo wa Valevhi, lava Muxe na Aroni ni tihosi ta Israele va va hlayeke hi tinyimba ta vona, ni tindlu ta vatata wa vona, 47ku sungula hi va malembe ya 30, ni lava tlulaka, ku fika eka va malembe ya 50, va ri hinkwavo lava khomaka ntirho, ni lava rhwalaka tabernakela ya nhlengeletano: 48lava hlayiweke va vona a va ri va 8 580. 49Va hlayiwe i Muxe, hi ku lerisa ka Yehovha, un'wana ni un'wana a nyikiwa ntirho wa yena, kumbe ndzhwalo wa yena; va hlayiwile hi yena, hilaha Yehovha a leriseke Muxe hakona.
