Ta ntsengo wa vana va Levhi.
1Hi vona vana va Aroni ni va Muxe, enkarhini lowu Yehovha a vulavulaka na Muxe entshaveni ya Sinayi. 2Hi wona mavito ya vana va Aroni: mativula i Nadabu, na Abihu, na Eliyazara, na Itamara. 3Hi wona mavito ya vana va Aroni va ri vaprista lava hlawuriweke, lava vekiweke ku tirha vuprista. 4Loko a ri Nadabu na Abihu, va file emahlweni ka Yehovha loko va tisa emahlweni ka Yehovha ndzilo wun'wana emananga ya Sinayi, kambe a va nga ri na vana, kutani Eliyazara na Itamara va tirha vuprista emahlweni ka Aroni, tata wa vona.
5Kutani Yehovha a byela Muxe, a ku: 6“Tshineta rixaka ra Levhi, u ri veka emahlweni ka Aroni, muprista, leswaku ri ta n'wi pfuna. 7Va ta hlayisa leswi vekiweke eka yena, ni leswi vekiweke eka nhlengeletano, swi ri swingolongondzwana hinkwaswo leswi ku tirheriwaka Yehovha ha swona emahlweni ka tabernakela ya nhlengeletano va ta tirha ha swona ntirho wa yindlu ya Xikwembu. 8Va ta hlayisa swibya hinkwaswo swa tabernakela ya nhlengeletano, ni hinkwaswo leswi vana va Israele va fanelaka ku swi hlayisa ku tirha ntirho wa yindlu ya Xikwembu. 9U ta nyika Aroni ni vana va yena, Valevhi; va ta va va nyikiwile yena kunene exikarhi ka vana va Israele. 10U ta veka Aroni ni vana va yena leswaku va tirha ntirho wa vuprista, kambe wamatiko la nga ta tshinelela u ta dlawa.”
11Yehovha a byela Muxe, a ku: 12“Waswivo, ndzi tekile vana va Levhi exikarhi ka vana va Israele, ematshan'weni ya mativula hinkwawo lama velekiweke hi vamana va vana va Israele, hi mukhuva lowu Valevhi va ta va va mina. 13Hikuva mativula hinkwawo i ya mina. Siku ndzi beke mativula hinkwawo etikweni ra Egipta, ndzi tihlawulele mativula hinkwawo ya Israele, ku sungula hi vanhu, ku yisa eka swifuwo, ma va ya mina: hi mina Yehovha.”
14Kutani Yehovha a byela Muxe emananga ya Sinayi, a ku: 15“Hlaya vana va Levhi hi tindlu ta vatata wa vona, ni tindlu ta vona; u ta hlaya vavanuna hinkwavo, ku sungula hi va n'hweti yin'we ni lava tlulaka.” 16Kutani Muxe a hlaya ntsengo lowo hi ku lerisa ka Yehovha, hilaha a lerisiweke hakona.
17Hi vona vana va Levhi hi mavito ya vona: Gerixoni, na Kohata na Merari. 18Mavito ya vana va Gerixoni hi tindlu ta vona: Libini na Ximeyi. 19Vana va Kohata hi tindlu ta vona: Amirama, na Yisihara, na Hebroni, na Uziele. 20Vana va Merari, hi tindlu ta vona; Maheli na Muxi. Hi tona tinyimba ta Valevhi hi tindlu ta vatata wa vona.
21Vana va Gerixoni; nyimba ya va Libini, ni nyimba ya va Ximeyi; hi tona tinyimba ta va Gerixoni. 22Ntsengo wa vona, loko va hlaya va xinuna hinkwavo ku sungula hi va n'hweti yin'we ni lava tlulaka: lava hlayiweke a va ri 7 500. 23Tinyimba ta va Gerixoni a ti gova endzhaku ka Yindlu, tlhelo ra vupeladyambu. 24Hosi ya nyimba ya va Gerixoni a a ri Eliyasafa, n'wana Laele. 25Leswi va Gerixoni a va swi hlayisa swa tabernakela ya nhlengeletano, a yi ri Yindlu, ni tabernakela ni lwangu ra yona, ni nguvu ya nyangwa ya tabernakela ya nhlengeletano; 26ni tinguvu ta xivava, ni nguvu ya nyangwa ya xivava, lexi nga ekusuhi ni yindlu ni alitari, ematlhelweni hinkwawo, ni tingoti ta xona ta ntirho hinkwawo wa xona.
27Vana va Kohata: nyimba ya va Amirama, ni nyimba ya va Yisihara, ni nyimba ya va Hebroni, ni nyimba ya va Uziele; hi tona tinyimba ta va Kohata. 28Loko va hlaya va xinuna hinkwavo, ku sungula hi va n'hweti yin'we ni lava tlulaka, a va ri 8 600, lava hlayisaka swa vukwetsimelo. 29Tinyimba ta vana va Kohata a ti gova etsheveni ra yindlu, edzongeni. 30Hosi ya yindlu ya va Kohata a a ri Elisafani, n'wana Uziele. 31A va hlayisa areka ni tafula, ni kandelari, ni tialitari ni swibya swa ntirho wa vukwetsimelo, ni nguvu, ni swilo hinkwaswo swa yona. 32Hosi ya tihosana ta Valevhi a a ri Eliyazara, n'wana Aroni, muprista. A a ri mulanguteri wa lava hlayisaka vukwetsimelo.
33Vana va Merari: nyimba ya va Maheli, ni nyimba ya va Muxi; hi tona tinyimba ta Merari. 34Ntsengo wa vona loko va hlaya va xinuna hinkwavo, ku sungula hi va n'hweti yin'we ni lava tlulaka, a va ri 6 200. 35Hosi ya yindlu ya vatata va tinyimba ta Merari a a ri Suriele n'wana Abihayili. A va gova etsheveni ra yindlu, en'walungwini. 36Vana va Merari a va hlayisa mapulangi ya yindlu, ni timbalelo ta yona, ni timhandze ta yona, ni switshamo swa yona, ni swibya hinkwaswo swa ntirho wa yona; 37ni timhandze ta xivava xa matlhelo hinkwawo, ni switshamo swa tona, ni timhingu ni tingoti ta tona.
38Lava govaka emahlweni ka yindlu, evuxeni, emahlweni ka tabernakela ya nhlengeletano, evurhongeni, a a ri Muxe na Aroni, ni vana va vona, a va hlayisela vana va Israele vukwetsimelo lebyi va byi tshembisiweke; kambe wamatiko la nga ta tshinela u ta dlawa.
39Ntsengo hinkwawo wa Valevhi, lava hlayiweke i Muxe na Aroni hi ku lerisa ka Yehovha hi tinyimba ta vona, hinkwavo va xinuna, ku sungula hi va n'hweti yin'we, ni lava tlulaka, a va ri 22 000.
40Kutani Yehovha a ku eka Muxe: “Hlaya mativula hinkwawo ya xinuna ya vana va Israele, ku sungula hi va n'hweti yin'we, ni lava tlulaka u tala ntsengo wa mavito ya vona. 41U ta ndzi tekela Valevhi (hi mina Yehovha), ematshan'weni ya mativula hinkwawo exikarhi ka vana va Israele; u ta teka ni swifuwo swa Valevhi ematshan'weni ya mativula hinkwawo exikarhi ka swifuwo swa vana va Israele.” 42Kutani Muxe a hlaya exikarhi ka vana va Israele mativula hinkwawo hilaha Yehovha a n'wi leriseke hakona. 43Ntsengo hinkwawo wa mativula ya xinuna, loko va hlaya mavito ku sungula hi va n'hweti yin'we ni lava tlulaka, a va ri 22 273.
44Yehovha a vulavula kambe na Muxe, a ku: 45“Teka Valevhi ematshan'weni ya mativula hinkwawo ya vana va Israele, teka ni swifuwo swa Valevhi ematshan'weni ya swifuwo swa vona; kutani Valevhi va ta va va mina: hi mina Yehovha. 46Ku kutsula mativula ya 273 lama tlulaka Valevhi, u ta teka tixikele ta ntlhanu hi nhloko yin'wana ni yin'wana; 47u ta pima hi xikele ya vukwetsimelo: i xikele leyi nga ni tigera ta 20. 48U ta nyika Aroni ni vana va yena mali leyi, ku kutsula lava va tlulaka.” 49Kutani Muxe a teka mali ya ku kutsula lava tlulaka lava kutsuriweke hi Valevhi; 50a a nyikiwile mali leyi hi vamativula va vana va Israele: ti ri tixikele ta 1 365, hi xikele ya vukwetsimelo. 51Kutani Muxe a nyika Aroni ni vana va yena mali ya nkutsulo, hi ku lerisa ka Yehovha, hilaha Yehovha a leriseke Muxe hakona.
