MATEWU 5

₁Kutani Yesu, loko a vona mitshungu, a tlhandlukela entshaveni; kuteloko a tshamile, vadyondzisiwa va yena va n'wi tshinelela. ₂Kutani a ahlamisa nomu wa yena, a va dyondzisa a ku:

₃“Ku katekile swisiwana emoyeni, hikuva ku fuma ka matilo i ka swona. ₄Ku katekile lava rilaka, hikuva va ta chaveleriwa. ₅Ku katekile lavo rhula, hikuva va ta dya ndzhaka ya misava. ₆Ku katekile lava nga ni ndlala ni torha ra leswo lulama, hikuva va ta xurha. ₇Ku katekile vona va tintswalo, hikuva va ta tweriwa vusiwana. ₈Ku katekile lava nga ni timbilu leti tengeke, hikuva va ta vona Xikwembu. ₉Ku katekile lava lamulaka, hikuva va ta thyiwa vana va Xikwembu. ₁₀Ku katekile lava xanisiwaka hikwalaho ka ku lulama, hikuva ku fuma ka matilo i ka vona. ₁₁Mi ta kateka loko va mi rhuketela hikwalaho ka mina, loko va mi lumbeta hi mavunwa layo tala. ₁₂Tsakani, mi tsaka ngopfu hikuva hakelo ya n'wina i yikulu ematilweni, hikuva va xanisile sweswo vaprofeta lavo rhanga.

₁₃“Mi munyu wa misava; kambe loko munyu wu phyama, wu ta lungiwa ha yini-ke? A wa ha ri na ntirho loko ku nga ri ku cukumetiwa ehandle, wu kandziyiwa hi vanhu.

₁₄“Mi ku vonakala ka misava; muti lowu nga ehenhla ka ntshava a wu tumberi. ₁₅Rivoningo, na rona, a ri lumekiwi ku nghenisiwa ehansi ka xirhundzu, kambe ri tlhomiwa ehenhla, ri voninga hinkwavo lava nga endlwini. ₁₆Ku vonakala ka n'wina a ku voningise vanhu sweswo, va ta vona mitirho ya n'wina leyo saseka, va dzunisa Tata wa n'wina la nga etilweni.

₁₇“Mi nga tshuki mi anakanya leswaku ndzi tile ku herisa nawu, hambi va ri vaprofeta; a ndzi tanga ku ta herisa ndzi tile ku ta hetisisa. ₁₈Hikuva kunene, ndza mi byela, ndzi ri: Tilo ni misava swi ko swi hundza, yota, hambi yi ri yin'we, ni valanyana, hambi ri ri rin'we ra nawu, swi nga ka swi nga hundzi ku nga si endleka swilo hinkwaswo. ₁₉Hikwalaho la tlulaka wun'wanyana wa milawu leyitsongo leyi, kutani a dyondzisa vanhu ku endlisa sweswo, u ta vuriwa lontsongo eku fumeni ka matilo. Kambe la hlayiseke nawu kutani a wu dyondzisa, u ta vuriwa lonkulu eku fumeni ka matilo. ₂₀Hikuva ndza mi byela, ndzi ri: Ku lulama ka n'wina loko ku nga tluri ka vatsari ni Vafarisi, mi nga ka mi nga ngheni eku fumeni ka matilo.

₂₁“Mi swi twile leswi vuriweke eka lava khale, va te: ‘U nga tshuki u dlaya; la dlayaka u ta fanela ku avanyisiwa!’ ₂₂Kambe mina ndzi ri eka n'wina: Munhu hambi a ri mani na mani, la karihelaka makwavo ntsena u ta fanela ku avanyisiwa; la vulaka makwavo xihunguki, u fanele ku avanyisiwa hi nhlengeletano; la nge eka yena: ‘U ni rihuhu,’ u fanele hi ndzilo wa tihele. ₂₃Hikwalaho, loko u humesa mhamba ya wena ealitarini, kutani u ehleketa kona leswaku makwenu u ni mhaka na wena, ₂₄siya mhamba ya wena kwala emahlweni ka alitari, kutani famba u rhanga u ya hlangana ni makwenu; hi kona u nga ta humesa mhamba ya wena.

₂₅“Hatlisa u pfumelelana ni la tengisanaka na wena wa ha ri endleleni na yena, leswaku loyi u tengisanaka na yena a nga ti ku nyiketa eka muavanyisi, kutani yena a ku nyiketa phorisa, kutani rona ri ku nghenisa ekhotsweni. ₂₆Ndza ku byela swinene leswaku u nga ka u nga humi kona u nga si riha mali hinkwayo.

₂₇“Mi swi twile leswaku ku vuriwile va te: ‘U nga tshuki u endla vuoswi.’ ₂₈Kambe mina ndzi ri eka n'wina: Munhu, hambi a nga va mani na mani, la langutaka wansati ku n'wi navela, u n'wi oswile embilwini ya yena.

₂₉“Kungakuloko tihlo ra wena ra xinene ri ku khunguvanyisa, ri xokole, u ri cukumeta ekule na wena; hikuva swi nga saseka eka wena loko xirho xa wena xi lova xi ri xin'we ntsena, miri wa wena hinkwawo wu nga cukumetiwi etiheleni. ₃₀Loko voko ra wena ra xinene ri ku khunguvanyisa, ri tseme, u ri cukumeta ekule na wena, hikuva swi nga saseka eka wena loko xirho xa wena xi lova xi ri xin'we ntsena, miri wa wena hinkwawo wu nga cukumetiwi etiheleni.

₃₁“Ku vuriwile kambe va te: ‘Loko munhu a tshika nsati wa yena, a a n'wi nyike tsalwa ra ku n'wi tshika.’ ₃₂Kambe mina ndzi ri eka n'wina: Munhu, hambi a ri mani na mani, la tshikaka nsati wa yena, loko ku nga ri hi mhaka ya vuoswi, a n'wi endla leswaku a hundzuka muoswi; kutani un'wana ni un'wana la tekaka loyi a tshikiweke, u ni vuoswi.

₃₃“Kambe mi swi twile leswi vuriweke eka lava khale, va te: ‘U nga tshuki u hundzuka eku hlambanyeni ka wena, kambe tlherisela eka Hosi leswi u yi hlambanyeleke swona.’ ₃₄Kambe mina ndzi ri eka n'wina: Mi nga tshuki mi hlambanya, ni ku ringa, hambi ku ri hi tilo, hikuva i xiluvelo xa Xikwembu, ₃₅hambi ku ri hi misava, hikuva i vunavelo bya milenge ya xona, hambi ku ri hi Yerusalema, hikuva i muti wa Hosi leyikulu.

₃₆“Kambe u nga tshuki u hlambanya hi nhloko ya wena, hikuva nsisi, ni loko wu ri wun'we, u nga hluleka ku wu hundzula lowo basa, ni ku wu endla ntima. ₃₇Kambe ku vulavula ka n'wina a ku ve: ‘Ina, ina’; ‘E-e, e-e’; leswi u swi engetakela swi huma eka lowo biha.

₃₈“Mi swi twile leswaku ku vuriwile va te: ‘Tihlo ri rihisiwa hi tihlo, tino hi tino.’ ₃₉Kambe mina ndzi ri eka n'wina: Mi nga tshuki mi alela la mi endlaka swo biha; kambe loko munhu a ku phakata rhama ra xinene, u n'wi hundzukela ni rin'wana. ₄₀Ni loko munhu a rhandza ku ku tengisa ni ku ku tekela baji, u n'wi tshika na rona jasi. ₄₁Loko munhu a ku sindzisa leswaku u famba na yena mpfhuka wun'we, famba mimpfhuka mimbirhi. ₄₂Nyika la kombelaka ka wena, u nga fularheli la rhandzaka ku kombela eka wena.

₄₃“Mi swi twile leswaku ku vuriwile va te: ‘Rhandza warikwenu u venga la nga nala eka wena.’ ₄₄Kambe mina ndzi ri eka n'wina: Rhandzani lava nga valala eka n'wina; mi katekisa lava mi rhukanaka; lava mi vengaka mi va endla swinene; mi khongelela lava mi xanisaka; ₄₅hileswaku mi hundzuka vana va Tata wa n'wina la nga ematilweni, hikuva u tsuvukisa dyambu ra yena ehenhla ka lavo biha ni lavo saseka, u nisa mpfula ehenhla ka lavo lulama ni lavo homboloka. ₄₆Hikuva loko mi rhandza lava mi rhandzaka, mi nga va ni ku hakela kwihi? Na vona valuvisi a va endlisi sweswo xana? ₄₇Loko mi xewetana ni vamakwenu ntsena, mi nga tlula van'wana ha yini? Vamatiko, na vona, a va endlisi sweswo xana? ₄₈Sweswo-ke, na n'wina, mi hamba mi hetiseka, kukotisa Tata wa n'wina la nga etilweni a hetisekeke.