MATEWU 4

₁Kutani Yesu a yisiwa hi Moya emananga ku ya ringiwa hi Diyavulosi. ₂Kutani a tshama a nga dyi nchumu hi masiku ya mune wa makume, ni vusiku bya mune wa makume, a kondza a twa ndlala. ₃Kutani muringi a n'wi tshinelela, a ku: “Loko u ri n'wana wa Xikwembu u nge maribye lawa, a ma hundzuke vuswa.” ₄Kambe Yesu a hlamula, a ku: “Ku tsariwile va ku: ‘Munhu a nga ka a nga hanyi hi vuswa ntsena, kambe u ta hanya hi marito hinkwawo lama humaka enon'wini wa Xikwembu.’ ”

₅Kutani Diyavulosi a n'wi yisa emutini lowu hlawuriweke, a n'wi veka exihlungweni xa tempele, ₆a ku eka yena: “Loko u ri n'wana wa Xikwembu, jitama ehansi, hikuva ku tsariwile va ku: ‘Xi ta lerisa tintsumi ta xona, ti ta ku khawulela emavokweni ya tona leswaku nenge wa wena wu nga tshuki wu khunguvanyeka hi ribye.’ ” ₇Yesu a ku eka yena: “Ku tsariwile kambe va ku: ‘U nga tshuki u ringa Hosi, Xikwembu xa wena.’ ”

₈Diyavulosi a engeta a n'wi yisa entshaveni leyo leha ngopfu, a n'wi komba mimfumo hinkwayo ya misava ni ku twala ka yona, ₉kutani a ku eka yena: “Swilo leswo hinkwaswo ndzi ta ku nyika swona, loko u ndzi khinsamela hi matsolo, u ndzi gandzela.” ₁₀Kambe Yesu a ku eka yena: “Suka Satana hikuva ku tsariwile va ku: ‘U ta khinsamela Hosi, Xikwembu xa wena u tirhela xona ntsena.’ ” ₁₁Kwalaho Diyavulosi a n'wi tshika; kutani vonani, tintsumi ti n'wi tshinelela, ti n'wi tirhela.

₁₂Kuteloko Yesu a tiva leswaku Yohane u nghenisiwile ekhotsweni, a tlhelela eGaleliya. ₁₃Kutani a rhurha eNazareta, a ya tshama eKapernawume emutini lowu nga ekusuhi ni lwandle, hitlhelo ra Zebuloni ni ra Neftali; ₁₄leswaku ku endleka leswi nga vula hi Esaya, muprofeta, loko a te: ₁₅“Tiko ra Zebuloni, ni tiko ra Neftali, endleleni ya lwandle, entsungeni wa hase wa Yordani, Galeliya ya matiko. ₁₆Tiko leri ngi ri tshame emunyameni, ri vonile ku vonakala lokukulu; volavo ingi va tshamile etikweni ra rifu ni le ndzhutini wa rona, ku vonakala ku va humelele.”

₁₇Enkarhini wolowo, Yesu a sungula ku dyondzisa, a ku: “Hundzukani, hikuva ku fuma ka matilo ku kusuhi.”

₁₈Kutani Yesu loko a lulama ni lwandle ra Galeliya, a vona vavanuna vambirhi, a a ri Simoni la vuriwaka Petro, na Andriya makwavo, va peta tinkoka ta vona elwandle, hikuva a va ri vaphasi va tinhlampfi. ₁₉Kutani a ku eka vona: “Ndzi landzeni, ndzi ta mi endla lava phasaka vanhu.” ₂₀Kwalaho va hatlisa, va siya tinkoka ta vona, va n'wi landza. ₂₁Kutani a hundzela emahlweni, a vona vavanuna vambirhi van'wana, a a ri Yakobo n'wana Zebediya na Yohane makwavo, va tshamile ebyatsweni na Zebediya tata wa vona, va tlhaviketela tinkoka ta vona, kutani a va vita. ₂₂Volavo va hatlisa, va siya byatso ni tata wa vona, va landza Yesu.

₂₃Kutani a famba hinkwako eGaleliya, a ri karhi a dyondzisa emasinagogeni ya kona, a vula Evhangeli ya ku fuma, a hanyisa vuvabyi byihi ni byihi, ni ku vaviseka hinkwako loku nga eka vanhu. ₂₄Kutani ku twakala ka yena ku hangalaka eSiriya hinkwako. Va tisa eka yena hinkwavo lava nga tsakangiki, ni lava xanisekaka hi vuvabyi bya tinxakaxaka ni nhlomulo, ni lava ngi va ri ni rihuhu ra mademona, ni lava ngi va ri ni rihuhu ra n'weti, ni lava omeke swirho; yena a va hanyisa. ₂₅Kutani mitshungu leyikulu yi n'wi landza, yi huma eGaleliya, na Dekapolisi, na Yerusalema, na Yudiya, ni le ntsungeni wa hase wa Yordani.