Ta ku pela ka Yordani.
1Yoxuwa a pfuka nimixo, kutani vana va Israele hinkwavo va suka eXitimi na yena, va ya fika eYordani, va yima kona, va nga si pela nambu. 2Endzhaku ka masiku manharhu, tindhuna ti famba emixaxeni, 3ti lerisa vunyingi ti ku: “Kutakuloko mi vona areka ya ntwanano wa Yehovha, Xikwembu xa n'wina, yi rhwariwa hi vaprista va Valevhi, mi ta suka laha mi goveke kona, mi famba endzhaku ka yona. 4Ntsena mpfhuka wa swisungunhu swa 2 000 wu ta va kona exikarhi ka yona, na n'wina; mi nga tshuki mi yi tshinelela leswaku mi vona swinene ndlela leyi mi nga ta famba ha yona, hikuva a mi si famba endleleni leyi hambi tolo hambi tolweni.” 5Yoxuwa a byela tiko, a ku: “Tibasisani, hikuva mundzuku Yehovha u ta endla mahlori exikarhi ka n'wina.” 6Kutani Yoxuwa a byela vaprista, a ku: “Tekani areka ya ntwanano, mi famba emahlweni ka tiko.” Kavaloko va tlakula areka ya ntwanano, kutani va famba emahlweni ka tiko.
7Yehovha a ku eka Yoxuwa: “Namuntlha ndzi ta sungula ku ku kurisa emahlweni ka Vaisraele hinkwavo, va ta tiva leswaku ndzi ta va na wena kukotisa leswi ingi ndzi ri na Muxe. 8Kambe wena lerisa vaprista lava rhwalaka areka ya ntwanano, u ku eka vona: ‘Kutakuloko mi fika ekusuhi ni mati ya Yordani, mi ta yima enambyeni wa Yordani.’ ”
9Yoxuwa a ku eka vana va Israele: “Tshinelani, mi yingisa marito ya Yehovha, Xikwembu xa n'wina.” 10Kutani Yoxuwa a ku: “Mi ta tiva hi lexi, leswaku ku ni Xikwembu lexi hanyaka exikarhi ka n'wina, ni leswaku xi ta hlongola kunene emahlweni ka n'wina Vakanana, ni Vahiti, ni Vahivhi, ni Vaperesi, ni Vagirigaxi, ni Vaamori, ni Vayebusi. 11Maswivo, areka ya ntwanano wa Hosi ya misava hinkwayo, yi ta famba emahlweni ka n'wina enambyeni wa Yordani. 12Kutani sweswi, humesani vavanuna va 12 exikarhi ka tinxaka ta Israele, wanuna un'we enyimbeni yin'wana ni yin'wana: 13Kutakuloko mikondzo ya vaprista lava rhwalaka areka ya Yehovha, Hosi ya misava hinkwayo, yi nghena ematini ya Yordani, mati ya Yordani lama pfaka hi le henhla ma ta avanyisiwa, kutani ma ta yima ma endla xitsunga.”
14Tiko ri huma emixaxeni ya rona ku ya pela Yordani, kutani vaprista lava rhwalaka areka ya ntwanano, va famba emahlweni ka tiko. 15Kuteloko vaprista lava rhwalaka areka va fika eYordani, ni loko mikondzo ya vona yi nghena ematini (kambe nambu wa Yordani wu tala, wu huma eribuwini hinkwako enkarhini hinkwawo wa ku tshovela), 16hi kona mati lama rhelelaka, lama humaka ehenhla, ma yima, ma tlakuka, ma endla nhlengeleto ekule swinene, ku fika ekusuhi na Adama, muti lowu nga tlhelo ra Saretani; ni mati lama rhelelaka Lwandle ra Rivala, ri nga Lwandle ra Munyu, ma hungutiwa hinkwawo, kutani tiko ri pela ku langutana na Yeriko. 17Vaprista lava rhwalaka areka ya ntwanano wa Yehovha, va yima va tiyile hi milenge laha ku omeke exikarhi ka Yordani, kutani Vaisraele hinkwavo va famba laha ku omeke, vaprista va yima kona, tiko hinkwaro ri ko ri heta ku pela Yordani.
