Ta ku aka xitsundzuxo xa maribye.
1Kuteloko tiko hinkwaro ri perile Yordani, Yehovha a ku eka Yoxuwa: 2“Tekani vavanuna va 12, wanuna un'we hi nyimba yin'wana ni yin'wana; 3mi va lerisa, mi ku: ‘Tekani kwala exikarhi ka nambu, laha vaprista va yimeke kona va tiyile, maribye ya 12, mi ma rhwala, mi ma veka laha mi nga ta gova kona vusiku lebyi.’ ” 4Yoxuwa a vitana vanhu lava va 12 lava a va hlawuleke exikarhi ka vana va Israele, wanuna un'we hi nyimba yin'wana ni yin'wana; 5a ku eka vona: “Hundzelani emahlweni ka areka ya Yehovha, Xikwembu xa n'wina exikarhi ka Yordani un'wana ni un'wana a tlakula ribye a ri rhwala ekhatleni ra yena, hi ntsengo wa tinyimba ta vana va Israele, 6leswaku wu va mfungho exikarhi ka n'wina. Kutakuloko vana va n'wina va mi vutisa siku rin'wana, va ku: ‘Maribye lawa ma mi kombisa yini xana?’ 7Mi ta ku eka vona: Mati ya Yordani ma avanile emahlweni ka areka ya ntwanano wa Yehovha; loko yi pela Yordani, mati ya Yordani ma avanile, kutani maribye lawa, i xitsundzuxo eka vana va Israele hilaha ku nga heriki.”
8Vana va Israele va endla hilaha Yoxuwa a va leriseke hakona; va teka maribye ya 12 exikarhi ka Yordani, hilaha Yehovha a leriseke Yoxuwa hakona, hi ntsengo wa tinyimba ta vana va Israele; va ma rhwala ku ya fika exivandleni lexi va etleleke eka xona, va ma veka kona. 9Yoxuwa a yimisa ni maribye ya 12 exikarhi ka Yordani, laha ku nga yima mikondzo ya vaprista lava rhwalaka areka ya ntwanano, kutani ma yimile kona ku fika namuntlha.
10Vaprista lava rhwalaka areka va yimile exikarhi ka Yordani ku ko ku endliwa hinkwaswo leswi Yehovha a leriseke Yoxuwa ku byela tiko, hilaha Muxe a leriseke swilo hinkwaswo eka Yoxuwa, kutani tiko ri hatlisa ri pela. 11Kuteloko tiko hinkwaro ri perile ri hela, areka ya Yehovha, ni vaprista va hundza emahlweni ka tiko. 12Vana va Rhuveni, ni vana va Gadi, ni hafu ya nyimba ya Manase, va famba va hlomile emahlweni ka vana va Israele, hilaha Muxe a va byeleke hakona. 13Va lava ku va vavanuna va 40 000, lava hlomeke, lava hundzeke emahlweni ka Yehovha ku ya lwa erivaleni ra Yeriko. 14Hi siku lero, Yehovha a kurisa Yoxuwa emahlweni ka Vaisraele hinkwavo, kutani va n'wi chava kukota leswi va chaveke Muxe hi masiku hinkwawo ya ku hanyaka yena.
15Yehovha a byela Yoxuwa, a ku: 16“Byela vaprista lava rhwalaka areka ya vumbhoni va huma eYordani.” 17Kutani Yoxuwa a lerisa vaprista, a ku: “Humani eYordani!” 18Kuteloko vaprista lava rhwalaka areka ya ntwanano wa Yehovha va humile exikarhi ka Yordani, enkarhini lowu mikondzo ya vona yi suka yi kandziya laha ku omeke, mati ya Yordani ma tlhelela endhawini ya wona, ma huma kukotisa khale eribuwini hinkwako.
19Tiko ri humile eYordani hi siku ra khume ra n'hweti yo sungula, kutani ri ya gova eGiligala, endzilakaneni wa le vuxeni ka Yeriko.
20Yoxuwa a yimisa eGiligala, maribye ya 12 lawa va ma humeseke eYordani. 21Kutani a byela vana va Israele, a ku: “Kungakuloko vana va n'wina va vutisa siku rin'wana vatata wa vona, va ku: ‘Maribye lawa i yini xana?’ 22Mi ta dyondzisa vana va n'wina ha wona, mi ku eka vona: Israele u perile Yordani loyi, laha ku omeke. 23Hikuva Yehovha Xikwembu xa n'wina, xi phyisile mati ya Yordani emahlweni ka n'wina mi ko mi pela, 24leswaku matiko hinkwawo ya misava ma tiva leswaku voko ra Yehovha ri ni matimba, mi ta chava Yehovha, Xikwembu xa n'wina hi laha ku nga heriki.”
