Ta va Dani loko va yiva swifaniso swa Mika ni loko va teka Layixi, va aka kona.
1Emikarhini yoleyo, a ku nga ri na hosi eIsraeleni. Enkarhini wolowo, va nyimba ya Dani a va tilavela tiko ra ndzhaka leri va nga akaka eka rona, hikuva a va nga si averiwa ndzhaka etinyimbeni ta Israele ku fikela siku rero. 2Kutani vana va Dani va hlawula exikarhi ka vona hinkwavo vavanuna va ntlhanu va tinhenha, va huma eSora na Exitawulu, va va rhuma ku ya kambela tiko, ni ku ri lavisisa. Va ku eka vona: “Yanani mi ya kambela tiko.” Va ya, va ko va ta fika eka Mika, entshaveni ya Efrayimi, va etlela kona. 3Kakuloko va ha ri ekusuhi ni yindlu ya Mika, va twa rito ra jaha ra Mulevhi, kutani va hambukela kona, va ku eka yena: “U tisiwe halenu hi mani-ke? U endla yini kwala, mhaka ya wena kwala hi yihi?” 4A ku eka vona: “Mika u ndzi endlile hi mukhuva lowu na lowu, a ndzi nyika ni hakelo, kambe mina ndzi muprista wa yena.” 5Va ku eka yena: “Wa nga vutisa Xikwembu, hi ta swi tiva loko kunene riendzo ra hina ri ta kateka xana?” 6Muprista a ku: “Yanani hi ku rhula; riendzo ra n'wina leri mi fambaka ha rona, ri le mahlweni ka Yehovha.”
7Kutani vavanuna valavo, va ntlhanu va suka, va ya fika eLayixi, va vona vanhu va kona va tshamile va titsakela, va ri ni mikhuva ya Vasidoni, va tshama hi ku rhula va nga chavi nchumu; ku nga ri na munhu etikweni rero loyi a va fumaka hi nsele; va ri kule ni Vasidoni, va nga ri na mhaka ni vanhu van'wana.
8Kutani va tlhelela eka vamakwavo lava nga eSora na Exitawulu; vamakwavo, va ku: “Mi ri yini?” 9Va ku: “Sukani mi yima, hi va hlasela, hikuva hi vonile tiko lero saseka ngopfu. Mi miyela ha yini-ke? Mi nga lolohi ku famba ku ya fuma tiko lero saseka. 10Loko mi fika kona, mi ta kuma vanhu lava nga chaviki nchumu, na rona tiko ri kulukumba; hikuva Xikwembu xi mi nyikile rona; kambe i tiko leri ku nga pfumariwiki nchumu wa leswi kumiwaka emisaveni.”
11Kavaloko vavanuna va nyimba ya Dani va 600, va suka eSora na Exitawulu va hlomile. 12Va tlhandluka, va ya gova eKiriyata-Yeyarimi wa Yuda, hikwalaho vito ra kona ku nga Mahane-Dani (magovela ya Dani), ku fikela namuntlha. Ku le ndzhaku ka Kiriyata-Yeyarimi. 13Loko va suka kona, va ya fika eka Mika, entshaveni ya Efrayimi.
14Kutani vavanuna va ntlhanu lava yeke ku ya kambela tiko ra Layixi, va vutisa vamakwavo, va ku: “Xana a mi swi tivi leswaku efodi yi kona kwala etindlwini teto, ni titerafi, ni xifaniso lexi vatliweke ni lexi chuluriweke xana? Vonani sweswi leswi mi nga ta swi endla.” 15Kutani va hambukela kona, va nghena endlwini ya jaha ra Mulevhi, endlwini ya Mika, va n'wi xeweta. 16Loko, va ri vavanuna va 600 lava hlomeke vana va Dani, va yime enyangweni. 17Kutani vavanuna lava yeke ku ya kambela tiko, va tlhandluka, va nghena, va teka xifaniso lexi vatliweke, ni efodi, ni titerafi, ni xifaniso lexi chuluriweke muprista, yena, a ri karhi a yimile enyangweni kun'we ni vavanuna va 600 lava hlomeke. 18Kuteloko valavo, va ntlhanu va nghenile endlwini ya Mika, va teka xifaniso lexi vatliweke, ni efodi, ni titerafi, ni xifaniso lexi chuluriweke, muprista a ku eka vona: “Mi endla yini?” 19Va ku eka yena: “Miyela, u siva nomu wa wena hi voko, u famba na hina, u va tata wa hina ni muprista wa hina; xana loko ku ri ku va muprista wa yindlu ya munhu a ri un'we, kumbe ku va muprista wa nyimba yin'wana, ni wa yindlu ya n'wana ya Israele, ku sasekile xihi eka wena-ke?” 20Kutani mbilu ya muprista yi tsaka, a teka efodi, ni titerafi, ni xifaniso Lexi vatliweke, a ta, a yima exikarhi ka vanhu valavo. 21Kutani va suka va tifambela; va rhangisa vana emahlweni, ni mitlhambi, ni swigotso.
22Va ku va ha ku fularhela yindlu ya Mika, lava akisaneke na Mika, va hlengeletana kun'we va tlhava mukhosi, va landza vana va Dani. 23Kutani va huwelela eka vana va Dani valavo, va rhendzeleka, va ku eka Mika: “U dyiwa hi yini loko u tlhavile mukhosi u va hlengeleta?” 24A ku: “Mi tekile swikwembu swa mina leswi ndzi swi endleke, ni muprista wa mina, mi fambile na swona; sweswi, ku sele yini eka mina xana? Mi ndzi vutisela yini sweswi loko mi ku: ‘U dyiwa hi yini?’ ” 25Vana va Dani va ku eka yena: “U nga tshuki u twakarisa rito ra wena, hikuva kumbe vavanuna va timbilu leti karihaka va nga mi wela ehenhla, u va u tidlayisa ni va yindlu ya wena.” 26Kutani vana va Dani va hundzela emahlweni endleleni ya vona. Kuteloko Mika a vona leswaku va n'wi tlula hi matimba, a tlhela a tiyela ekaya.
27Loko, va ri vona va teka swilo leswi endliweke hi Mika, ni muprista wa yena, va fika eLayixi; vanhu va kona va tshamile hi ku rhula, va nga chavi nchumu, kutani va va dlaya hi ku kariha ka fumu, va hisa ni muti. 28Kambe a ku vanga na munhu la lamulelaka muti, hikuva a wu ri ekule na Sidoni, kambe vanhu va kona a va nga ri na mhaka ni vanhu van'wana. Muti wolowo a wu ri enkoveni wa Beta-Rehobo. 29Va Dani va engeta va pfuxa muti, va aka kona. Kutani va thya vito ra muti lowu Dani, hi vito ra Dani, tata wa vona, la nga velekiwa i Israele. Vito ro rhanga ra muti a wu ri Layixi. 30Kutani vana va Dani va tiyimisela xifaniso lexi vatliweke. Kutani Yonatani, n'wana Gerixomu, n'wana Manase, ni vana va yena, a va ri vaprista va nyimba ya Dani, ku fikela siku tiko ri yisiwaka evukhumbini. 31Va tiyimisela xifaniso lexi vatliweke lexi endliweke hi Mika, hi mikarhi hinkwayo leyi yindlu ya Xikwembu yi nga tshama eXilo ha yona.
