Ta ku onhiwa ka nsati wa Mulevhi eGibeya.
1Enkarhini wolowo a ku nga ri na hosi eIsraeleni. A ku ri ni wanuna wa Mulevhi la nga luvela entshaveni ya Efrayimi, a titekele nsati wa mbiri eBetlehema-Yuda. 2Nsati yeloyi wa yena a oswana, a n'wi tshika, a tlhelela eka tata wa yena eBetlehema-Yuda, a tshamisa kona mune wa tin'hweti. 3Kutani nuna wa yena a suka, a n'wi landzela ku ya vulavula na yena hilaha mbilu ya yena yi swi rhandzaka hakona, a ta n'wi tlherisa; a famba ni nandza wa yena ni timbhongolo timbirhi. Kutani nsati yeloyi a n'wi amukela endlwini ya tata wa yena, kuteloko tata wa wansati a n'wi vona, a ya hlangana na yena hi ku tsaka. 4Tata wa wansati, mukon'wana wa yena, a n'wi sivela, kutani a tshamisa na yena masiku manharhu va dya, va nwa, va etlela kona. 5Kute hi siku ra vumune va pfuka nimpundzu, kuteloko Mulevhi a ku wa famba, tata wa wansati a ku eka mukon'wana wa yena: “Tiyisa mbilu ya wena hi xipandzwa xa vuswa, mi ta tifambela.” 6Hikwalaho, va tshamisa, va dya, va nwa kun'we havambirhi; kutani tata wa wansati a ku eka wanuna: “Etlela kambe vusiku lebyi haleno, mbilu ya wena yi ta tsaka.” 7Kambe wanuna a yima a ku wa famba; mukon'wana wa yena a n'wi sindzisa, kutani a tlhela, a etlela vusiku byebyo kona.
8Hi siku ra vuntlhanu, a pfukela ku famba wa ha ri mixo, kambe tata wa wansati a ku: “Tiyisa mbilu ya wena. Va hlwerisana sweswo, dyambu ri ko ri rhenga,” va ri karhi va dya havambirhi. 9Kutani wanuna a pfuka, a ku wa famba ni nsati wa yena, ni nandza wa yena; kambe mukon'wana wa yena, tata wa wansati a ku eka yena: “Vona, dyambu ri perile; etlelani vusiku lebyi halenu; vona dyambu ri ya eku peleni, etlelani vusiku lebyi halenu, mbilu ya wena yi ta tsaka. Ni mixo u ta pfukela riendzo ra wena, u tifambela eka rikwenu.” 10Kambe wanuna a ala ku etlela vusiku kona, a yima a famba, a fika ekusuhi na Yebusi (a nga Yerusalema) a ri ni timbhongolo timbirhi leti rhweleke, ni nsati wa yena.
11Loko, va ri ekusuhi na Yebusi dyambu ri rhengile, nandza a ku eka n'wini wa yena: “Tana, hi hambukela emutini lowuya wa Vayebusi, hi etlela vusiku kona.” 12N'wini wa yena a ku eka yena: “Hi nga ka hi nga hambukeli emutini wa vamatiko, lowu nga riki wa vana va Israele, kambe a hi yeni emahlweni ku ya fika eGibeya.” 13A engeta a ku eka nandza wa yena: “Tana, hi tshinela ekusuhi ni wun'wana wa miti leyi, hi etlela eGibeya kumbe eRhama.” 14Kavaloko, va hundzela emahlweni, va famba, dyambu ri va pelela eGibeya wa Benjamini. 15Va hambukela eGibeya, va nghena kona ku etlela nivusiku.
Kuteloko, va nghenile va tshamisa erivaleni ra muti, ku nga ri na munhu loyi a va amukelaka endyangweni wa yena, leswaku va etlela kona vusiku byebyo. 16Kutani, maswivo, wanuna wa xidyuhati a vuya hi le masin'wini entirhweni wa yena, hi nkarhi wa mpimavayeni, a ri wanuna wa ntshava ya Efrayimi, kambe a akile eGibeya, kasi vanhu va muti wolowo a va ri va Benjamini. 17Kuteloko a tlakusa mahlo, a vona wanuna wa muendzi erivaleni ra muti, kutani wanuna wa xidyuhati a ku eka yena: “U ya kwihi? U huma kwihi xana?” 18Yeloyi a ku eka yena: “Hi huma eBetlehema-Yuda, hi ya tlhelo ra ntshava ya Efrayimi; ndzi wa kona, a ndzi yile eBetlehema-Yuda, ndzi ya endlwini ya Yehovha, hambiswiritano, a ku na munhu la ndzi amukelaka endyangweni wa yena. 19Kasi ndzi ni byanyi ni swakudya swa timbhongolo ta hina; kambe ndzi ni vuswa ni vhinyo leyi ringanaka mina ni nandza wa wena wa wansati, ni nandza loyi malandza ya wena va nga na yena; a hi pfumari nchumu.” 20Wanuna wa xidyuhati a ku: “Ku rhula a ku ve na wena! A swi na mhaka; hinkwaswo leswi u swi pfumalaka, hi mina la nga ta ku lavela swona. Ntsena u nga tshuki u etlela nivusiku erivaleni.” 21A n'wi yisa endlwini ya yena, a nyika timbhongolo byanyi, kutani va tihlantswa milenge va dya, va nwa.
22Va ku va ha tsakisa timbilu ta vona, vonani, vavanuna va muti, vanhu va Beliyali, va fika va rhendzela yindlu exikarhi, va bakanya rivanti, va vulavula ni wanuna wa xidyuhati, n'wini wa yindlu, va ku: “Humesela ehandle nuna la hambukeleke eka wena, hi ta n'wi tiva.” 23Kambe n'wini wa yindlu a humela eka vona, a ku eka vona: “E-e, vamakwerhu, mi nga endleni swo biha; leswi munhu loyi a hambukeleke eka mina, mi nga tshuki mi endla manyala yo nghasi. 24N'wana wa mina hi yeloyi, wa ha ri wanhwana; kambe nsati wa yena hi yeloyi; ndza ha va tisa ka n'wina ehandle, mi va tsongahata, mi endla ha vona hilaha mi swi rhandzaka hakona, wanuna, yena, mi nga tshuki mi n'wi endla manyala layo nghasi.” 25Kambe vanhu valavo a va n'wi yingisanga; kutani wanuna a khoma nsati wa yena, a n'wi tisa eka vona ehandle, kutani va n'wi tiva, va n'wi onha vusiku hinkwabyo ku fikela nimixo, va n'wi tlherisa loko ri lava ku xa.
26Loko byi xile, wansati a tlhela, a ya wela enyangweni ya yindlu ya wanuna loyi n'wini wa yena a hambukeleke eka yena, a tshama kona ri kondza ri tsuvuka. 27Kutani n'wini wa yena a pfuka wa ha ri mixo, a pfula tinyangwa ta yindlu, a humela ehandle ku ya emahlweni erendzweni ra yena, kambe a vona wansati, mbuya ya yena, a lo nhavalala enyangweni ya yindlu, mavoko ya yena ma ri xitsulweni xa nyangwa. 28A ku eka yena: “Pfuka, hi famba.” Kambe a nga hlamulanga nchumu. Kutani nuna yeloyi a n'wi khandziyisa mbhongolweni, a famba, a ya fika ekaya.
29Kuteloko a fikile ekaya, a teka mukwana, a khoma mbuya ya yena, a avanyisa swirho swa yona hi swihlubyana swa khume na swimbirhi, a swi rhumela etikweni hinkwaro ra Israele. 30Kutani hinkwavo loko, va vona sweswo, va ku: “Leswo tano a swi si humelela, a swi si voniwa, ka ha ri mpfhuka vana va Israele va humile etikweni ra Egipta ku fikela namuntlha. Tsundzukani mhaka leyi mi endla makungu kun'we, mi vulavula.”
