ESAYA 22

₁Swi lo yini leswi vanhu hinkwavo va wena va tlhandlukeleke ehenhla ka tindlu, ₂wena muti wa huwa, wa dzolonga, muti lowu titsakelaka? Kasi lava feke va wena a va tlhaviwanga hi fumu, a va fanga enyimpini! ₃Tindhuna ta wena hinkwato ti balekile swin'we; ti khomiwile ku nga kongiwanga vurha, vanhu va wena hinkwavo va tshuka va khomiwa swin'we va ri karhi va tsutsuma ekule! ₄Hikwalaho ndzi nge: Susani eka mina mahlo ya n'wina, ndzi ta tiva ku rila hi xivitwana! Mi nga hatliseni ku ndzi chavelela hikwalaho ka ku onhaka ka wanhwana wa tiko ra mina! ₅Hikuva i siku ra nkitsikitsi, ra ku onhaka, ra ku pyatsapyatseka, leri rhumiweke hi Hosi, Yehovha wa tinyimpi, enkoveni wa swivono; rirhangu ri wisiwa ehansi, kutani huwa ya nkosi yi ya fika entshaveni.

₆Elamu u tamele gadzi, ku humelela tigolonyi leti teleke tinhenha, ni vakhandziyi va tihanci; Kiri u hlomile switlhangu. ₇Mikova ya wena leyi tlurisaka hi ku saseka, yi tele tigolonyi; lava khandziyaka tihanci va ku bvutamele etinyangweni ta wena.

₈Rirhangu ra Yuda ri mbundzuxiwa; hi siku lero u langutile tlhelo ra mpalana ya xiluvelo xa le xihlahleni. ₉Mi vonile rirhangu ra muti wa Davhida leswaku timbhovo ta wona ti tele, kutani mi sivile mati ya tiva ra le nkoveni. ₁₀Mi hlayile tindlu ta Yerusalema, mi mbundzuxa tin'wana, mi tiyisa rirhangu hi maribye ya rona. ₁₁Kutani mi endle tiva exikarhi ka makhumbi mambirhi, mi hlengeleta kona mati ya tiva ra khale. Kambe a mi langutisanga eka Muendli wa timhaka teto, a mi vonanga loyi a ti kungeleke khale.

₁₂Hosi, Yehovha wa tinyimpi, u mi vitanele hi siku lero eku rileni ni ku tiba swifuva, ku byewula misisi ni ku ambala nguvu leyo khwaxa. ₁₃Kasi, maswivo, i nkhuvo ni ku tsaka! Ku tlhaviwa tihomu ku tlhaviwa tinyimpfu; ku dyiwa tinyama, ku nwiwa vhinyo: mi ku: “A hi dyeni, a hi nweni, hikuva mundzuku hi ta fa!” ₁₄Yehovha wa tinyimpi u ndzi hleverile, a ku: “Hakunene, ku dyoha loku mi nga ka mi nga ku khomeriwi, mi ta ondza mi fa, ku vula Hosi, Yehovha wa tinyimpi.”

₁₅Hosi Yehovha wa tinyimpi u vurile, a ku: “Suka u ya eka muhlayisi wa rifuwo, eka Xebina, mulanguteri wa yindlu ya vukosi, u ku eka yena:

₁₆“ ‘U na yini kwala, u na mani kwala, leswi u tiendlelaka sirha kwala! U tivatlela sirha eswitsungeni, u tiendlela ndhawu eribyeni!’ ₁₇Waswivo, Yehovha u ta ku khoma, a ku cukumetela ekule hi matimba, ₁₈a ku vumbuluxa, u vumbuluka kukotisa xirhendzevutana etikweni leri anameke, leri pfulekeke. U ta fela kona; tigolonyi ta ku saseka ta wena ti ta hela kona, wena, tingana ta yindlu ya hosi ya wena! ₁₉Ndzi ta ku hlongorisa entirhweni wa wena, u ta susiwa exitshan'weni xa wena.

₂₀“Kutani hi siku lero ndzi ta vitana nandza wa mina Eliyakimi, n'wana Hilkiya; ₂₁ndzi n'wi ambexa nguvu ya wena, ndzi n'wi boha vamba ra wena, ndzi veka ku fuma ka wena evokweni ra yena. Kutani u ta va tatana eka vaaki va Yerusalema, ni ka yindlu ya Yuda. ₂₂Ndzi ta veka mpfungura wa yindlu ya Davhida ekhatleni ra yena; u ta pfula, kutani a ku na la nga ta pfala; u ta pfala, kambe a ku na la nga ta pfula. ₂₃Ndzi ta n'wi tlhoma kukotisa mhingu laha ku tiyeke; u ta va xitshamo lexi kwetsimaka endlwini ya tata wa yena. ₂₄U ta va phandze ra ku twala hinkwako ka yindlu ya tata wa yena, ri ri phandze ra rixaka ra yena ni vatukulu va yena, ku ya fika eka swimbitana hinkwaswo, ku suka eka mindzheko, ku fika eka timbita hinkwato, ku suka eka mindzheko, ku fika eka swikutsu.

₂₅“Hi siku lero, ku vula Yehovha wa tinyimpi, mhingu leyi tlhomiweke laha ku tiyeke yi ta susiwa, yi hlomuriwa, yi wa, kutani hinkwaswo leswi hayekiweke eka yona swi ta herisiwa, hikuva Yehovha u vurisile.”