Ta ku avanyisiwa ka phandlalati ra lwandle (Babilona).
1Tanihi swidzedze swa dzonga leswi hungaka emananga, wa ta, u huma emisaveni leyi chavisaka.
2Ndzi kombiwile leswi chavisaka ngopfu: Muxanisi u tirha hi ku xanisa ka yena, muphangi wa phanga! Tlhandluka Elamu! Rhendzela, wee Mediya! Ndzi herisa ku konya hinkwako!
3Hikwalaho swisuti swa mina swi tele ku vaviseka; ku lun'wa ku ndzi khomile tanihi loko wansati a veleka; ndza solovanya loko ndzi n'wi twa, ndzi tshukile loko ndzi n'wi vona. 4Mbilu ya mina ya titivala, gome ra ndzi khoma; vusiku lebyi ndzi nga byi navela, byi tele ku chavisa. 5Swakudya swi vekiwile etafuleni, mulanguteri wa langutela, va dya, va nwa! Sukani mi yima, n'wina tindhuna! Totani switlhangu!
6Hikuva Hosi yi ndzi byerile, yi ku: “Famba, u veka mulanguteri, a ta vula lexi a xi vonaka! 7U vone ntlawa wa vakhandziyi va tihanci va famba havambirhi, ni vakhandziyi va timbhongolo, ni vakhandziyi va tikamela; kutani a languta, a rhalarhala!” 8Kutani a huwelela, a ku: “Hosi, ndza wonga tanihi nghala hi siku hinkwaro, ndzi mulanguteri wa vusiku hi masiku hinkwawo: 9Vonani, ku humelele vakhandziyi va tihanci lava fambaka havambirhi.” Kambe a huwelela a ku: “U wile Babilona, u wile swin'we ni swifaniso hinkwaswo leswi vatliweke swa swikwembu swa yena, swi fayiwile ehansi.”
10Oho! Tiko ranga leri huriweke tanihi koro exivuyeni! Leswi ndzi swi tweke eka Yehovha wa tinyimpi, Xikwembu xa Israele, ndzi swi vurile eka n'wina.
Ta ku avanyisiwa ka Duma.
11Rito ri huwelela ri huma eSeyira, ri fika eka mina, ri ku: “Mulanguteri, timhaka ta vusiku hi tihi? Mulanguteri, timhaka ta vusiku hi tihi?” 12Mulanguteri a ku: “Vurhonga bya humelela, na byona vusiku. Loko mi rhandza ku vutisa, vutisani! Vuyani mi ta!”
Ta ku avanyisiwa ku Arabiya.
13Mi ta govela exihlahleni lexo tlhuma xa Arabiya, n'wina timpfhumba ta Dedani! 14Tanani ni mati, mi hlanganisa la nga ni torha; n'wina vaaki va tiko ra Tema, phamelani mubaleki vuswa! 15Hikuva va balekile emahlweni ka fumu, emahlweni ka ripanga leri hlumuriweke, emahlweni ka vurha lebyi kungiweke, ni le mahlweni ka ku leva ka ku lwa ka nhenha ya nyimpi. 16Hikuva Hosi yi te eka mina: “Ka ha sele lembe rin'we, leri fanaka ni lembe ra mutirhi, kutani ku ta hela ku vonakala hinkwako ka Kedari; 17Eka mavurha layo tala ya tinhenha ta Kedari, ku ta sala xitsanana ntsena; hikuva Yehovha, Xikwembu xa Israele u vurisile.”
