1Kutani Muxe a vitana vana va Israele hinkwavo, a ku eka vona: “Yingisani, Vaisraele, milawu ni ku lerisa leswi ndzi swi vulaka namuntlha etindleveni ta n'wina; mi ta swi dyondza, mi va mi tivonela ku swi hlayisa.
2“Yehovha, Xikwembu xa hina, xi endlile na wena ntwanano eHorebe. 3Yehovha a nga endlanga ntwanano lowu ni vatata wa hina, kambe u wu endle na hina, lava hi nga kwala namuntlha, hi hanyile hinkwerhu. 4Yehovha u vulavurile na n'wina entshaveni mi langutene na yena, a ri endzilweni; 5kambe a ndzi yimile exikarhi ka n'wina na Yehovha, ku mi byela rito ra Yehovha, hikuva a mi chava ndzilo lowu, kutani a mi khandziyanga entshaveni leyi, i a ku:
6“ ‘Hi mina Yehovha, Xikwembu xa wena, la ku humeseke etikweni ra Egipta ni le ndlwini ya vukhumbi.
7“ ‘U nga tshuki u va ni swikwembu swin'wana emahlweni ka mina.
8“ ‘U nga tshuki u tiendlela xifaniso lexi vatliweke, ni loko xi ri xifaniso xihi ni xihi xa swilo leswi nga ehenhla etilweni, ni loko xi ri xa swilo leswi nga ehansi emisaveni ni loko xi ri xa swilo leswi nga ematini, ehansi ka misava.
9“ ‘U nga tshuki u xi khinsamela, ni loko ku ri ku xi tirhela; hikuva hi mina Yehovha, Xikwembu xa wena, xa rilondzo, lexi baka ku homboloka ka vatswari ehenhla ka vana va vona, ku yisa erixakeni ra vunharhu ni ra vumune eka lava ndzi vengaka; 10kambe ndzi tsetselela lava ndzi rhandzaka, lava hlayisaka milawu ya mina, ku yisa erixakeni ra khume ra madzana.
11“ ‘U nga tshuki u tlanga hi vito ra Yehovha, Xikwembu xa wena, hikuva Yehovha a nga ka a nga tshiki nandzu wa loyi a tlangaka hi vito ra yena.
12“ ‘Anakanya siku ra ku wisa ku ri hlawula, hilaha Yehovha Xikwembu xa wena, xi ku leriseke hakona. 13U ta tirha hi masiku ya ntlhanu na rin'we, u tirha ntirho wa wena hinkwawo; 14kambe siku ra ntlhanu na mambirhi, i siku ro wisa ra Yehovha, Xikwembu xa wena, U nga tshuki u tirha ntirho ni wun'we, hambi u ri wena, ni n'wana wa wena wa xinuna, ni wa xisati, ni nandza wa wena wa wanuna ni wa wansati, hambi yi ri homu ya wena, ni mbhongolo ya wena, hambi xi ri xifuwo xin'wana xa wena, hambi a ri muendzi wa wena la nga emitini ya wena, leswaku nandza wa wena wa wanuna ni wa wansati a wisa kukotisa wena. 15U ta anakanya leswaku a wu ri khumbi etikweni ra Egipta, ni leswaku Yehovha, Xikwembu xa wena, xi ku humesile hi voko ra matimba, ni voko leri tlakukeke; hikwalaho Yehovha, Xikwembu xa wena, xi ku leriseke ku hlayisa siku ra ku wisa.
16“ ‘U va ni xichavo eka tata wa wena ni mana wa wena, hilaha Yehovha, Xikwembu xa wena, xi ku leriseke hakona, leswaku masiku ya wena ma andzisiwa, u va u katekisiwa emisaveni leyi u yi nyikiweke i Yehovha, Xikwembu xa wena.
17“ ‘U nga tshuki u dlaya.
18“ ‘U nga tshuki u endla vuoswi.
19“ ‘U nga tshuki u yiva.
20“ ‘U nga tshuki u lumbeta warikwenu hi vumbhoni byo hemba.
21“ ‘U nga tshuki u navela nsati wa warikwenu u nga tshuki u navela yindlu ya warikwenu, hambi yi ri nsimu ya yena, hambi a ri nandza wa yena wa wanuna kumbe wa wansati, hambi yi ri homu ya yena, kumbe mbhongolo ya yena, hambi xi ri xilo xin'wana xa warikwenu.’
22“Yehovha a byela nhlengeletano hinkwayo marito lawa entshaveni, a ri endzilweni, epapeni, nemunyameni, a vulavula hi rito lerikulu, kambe a nga engetelanga ha nchumu, kutani a tsala marito lawa emaribyeni mambirhi ya swimphampha, a ndzi nyika swona.
23“Kuteloko mi yingisile rito, ri le munyameni, ni loko mi vonile ntshava hinkwayo yi pfurha hi ndzilo, mi tshinerile eka mina, ti ri tihosi hinkwato ta tinyimba ni vakulukumba, 24mi te: ‘Vonani, Yehovha, Xikwembu xa hina, xi hi kombisile ku kwetsima ka xona, ni vukulu bya xona, hi yingisile rito ra xona endzilweni, hi vonile namuntlha Xikwembu loko xi vulavula ni vanhu, kambe vanhu va ha hanya. 25Kutani sweswi, hi ta fela yini-ke? Hikuva ndzilo lowukulu lowu wu ta hi heta; kungakuloko hi twa kambe rito ra Yehovha Xikwembu xa hina, hi ta fa. 26Hikuva va kwihi vanhu lava nga yingisa kukotisa hina rito ra Xikwembu lexi hanyaka loko xi vulavula endzilweni, kutani va sala va hanya? 27Tshinela u ri wena, u ta yingisa hinkwaswo leswi vuriwaka hi Yehovha, Xikwembu xa hina, kutani u ta hi byela hinkwaswo leswi Yehovha, Xikwembu xa hina, xi ku byeleke swona, hi ta swi yingisa kambe hi ta swi endla.’
28“Yehovha u yingisile marito ya n'wina loko mi ri karhi mi vulavula na mina, kutani Yehovha a ku eka mina: ‘Ndzi yingisile marito lawa tiko leri ri ku byeleke wona, va vurile swona hinkwaswo. 29Ngi loko va ri ni timbilu leti ku ndzi chava ni ku hlayisa milawu ya mina hinkwayo, va ta tsaka vona ni vana va vona, hilaha ku nga heriki! 30Famba, u ta ku eka vona: “Tlhelelani emixaxeni ya n'wina,” 31kambe wena, tshama kwala na mina, ndzi ta ku byela milawu hinkwayo ni timhaka ni ku lerisa; u ta va dyondzisa swona leswaku va swi landza etikweni leri ndzi va nyikaka rona ku ri fuwa.’
32“Tilanguteleni, mi ta endla hilaha Yehovha, Xikwembu xa n'wina xi mi leriseke hakona; mi nga tshuki mi hambukela exineneni, hambi ku ri eximatsini, 33mi ta famba endleleni hinkwayo leyi Yehovha Xikwembu xa n'wina xi mi leriseke yona leswaku mi hanya, mi va mi tsaka; ni leswaku masiku ya n'wina ma lehisiwa etikweni leri mi nga ta ri fuwa.
