Mikhongotelo.
1“Sweswi, Israele, yingisa milawu ni ku lerisa leswi ndzi mi dyondzisaka ku swi endla leswaku mi hanya, kutani mi ta nghena, mi va mi fuma tiko leri Yehovha, Xikwembu xa vatata wa n'wina, xi mi nyikaka rona. 2Mi nga tshuki mi engetela nchumu eka leswi ndzi mi lerisaka swona, kambe mi nga tshuki mi hunguta nchumu eka swona; mi ta hlayisa milawu ya Yehovha, Xikwembu xa n'wina, leyi ndzi mi lerisaka yona.
3“Mahlo ya n'wina ma vonile leswi Yehovha a swi endleke hikwalaho ka Baala-Peyori; hikuva munhu un'wana ni un'wana la landzeke Baala-Peyori, Yehovha, Xikwembu xa wena, xi n'wi herisile xikarhi ka n'wina. 4Kambe n'wina, lava mi namarheleke Yehovha, Xikwembu xa n'wina, ma ha hanya hinkwenu ni namuntlha.
5“Langutani, ndzi mi dyondzisile milawu ni ku lerisa, hilaha Yehovha, Xikwembu xa mina, xi ndzi leriseke hakona, leswaku mi ta tirha ha yona etikweni leri mi nghenaka eka rona ku ri fuma. 6Mi ta yi hlayisa ni ku tirha ha yona, hikuva byi ta va vutlhari bya n'wina, ni ku twisisa ka n'wina, emahlweni ka matiko lawa ma nga ta yingisa milawu leyi hinkwayo, kutani ma ta ku: ‘Tiko lerikulu leri, hi rona ntsena leri nga ni vutlhari ni ku twisisa!’ 7Hikuva i rihi tiko lerikulu leri swikwembu swa rona swi nga ekusuhi na rona, kukotisa leswi Yehovha, Xikwembu xa hina, xi nga ekusuhi na hina, hi masiku hinkwawo loko hi xi khongela? 8Ri kwihi kambe tiko lerikulu leri nga ni milawu, ni ku lerisa loku lulameke, kukotisa nawu hinkwawo lowu ndzi wu vekaka namuntlha emahlweni ka n'wina?
9“Ntsena tivonele, u hlayisa swinene moya wa wena, leswaku u nga tshuki u rivala swilo leswi mahlo ya wena ma swi voneke; swi nga tshuki swi huma embilwini ya wena, ni siku ni rin'we ra ku hanyaka wena; u swi dyondzisa vana va wena ni vatukulu va wena. 10Anakanya siku leri u yimeke ha rona emahlweni ka Yehovha, Xikwembu xa wena, eHorebe, loko Yehovha a te eka mina: ‘Ndzi hlengeletele tiko ndzi ta va yingiserisa marito ya mina, leswaku va dyondza ku ndzi chava masiku hinkwawo lawa va nga ta hanya emisaveni, va ta ma dyondzisa vana va vona.’ 11Kutani mi tshinerile, mi yimile ehansi ka ntshava; yona ntshava a yi pfurha hi ndzilo lowu fikeke emakun'wini ya matilo; kambe a ku ri ni vusiku, ni mapapa, ni munyama. 12Kutani Yehovha a vulavula na n'wina a ri exikarhi ka ndzilo; mi yingisile mpfumawulo wa marito, kambe a mi vonanga nghohe ya yena, a ri ri rito ntsena. 13U mi twisisile ntwanano lowu a mi leriseke ku wu hlayisa, ma ri marito ya khume, kutani u ma tsarile emaribyeni mambirhi.
14“Enkarhini wolowo, Yehovha u ndzi lerisile ku mi dyondzisa milawu ni ku lerisa leswaku mi ta swi hlayisa etikweni leri mi nga ta nghena eka rona ku ri fuma.
15“Mi ta tivonela swinene mimoya ya n'wina, hikuva a mi vonangi xifaniso ni xin'we siku Yehovha a vulavuleke na n'wina eHorebe, exikarhi ka ndzilo, 16leswaku mi nga tshuki mi onhaka, ni ku tiendlela xifaniso lexi vatliweke, xi nga xikombiso xa swikwembu swahava, kumbe xifaniso xa wanuna, hambi xa wansati, 17hambi xifaniso xa xiharhi lexi fambaka emisaveni, hambi xi ri xifaniso xa nyanyana leyi hahaka etilweni, 18ni xifaniso xa xilo xin'wana lexi hanyaka, lexi kokovaka la emisaveni, ni xifaniso xa nhlampfi leyi hanyaka ematini, ehansi ka misava. 19Hlayisa moya wa wena, leswaku loko u ta tlakusela mahlo ya wena etilweni, u vona dyambu ni n'weti, ni tinyeleti, yi ri nyimpi hinkwayo ya matilo, u nga tshuki u navela ku khinsama emahlweni ka swona, u swi tirhela: Yehovha, Xikwembu xa wena, u nyikile swilo leswi eka matiko hinkwawo ehansi ka matilo hinkwawo, leswaku yi va ndzhaka ya vona. 20Kambe loko mi ri n'wina, Yehovha u mi tekile, a va a mi humesa efulweni ra Egipta, leswaku mi va tiko ra yena hi xiviri, hilaha mi swi vonaka hakona namuntlha.
21“Kambe Yehovha u ndzi karihele hikwalaho ka n'wina, kutani a hlambanya leswaku ndzi nga ka ndzi nga peli Yordani, ni leswaku ndzi nga ka ndzi nga ngheni etikweni lerinene leri Yehovha, Xikwembu xa wena, xi ku nyikaka rona, leswaku yi va ndzhaka ya wena. 22Hikuva ndzi ta fela etikweni leri; ndzi nga ka ndzi nga peli Yordani; kambe n'wina mi ta wu pela, mi ta fuma tiko lerinene leri.
23“Chavani ku rivala ntwanano lowu Yehovha, Xikwembu xa n'wina, xi wu endleke na n'wina mi nga tiendleli xifaniso lexi vatliweke, xi nga xikombiso xa hinkwaswo leswi Yehovha, Xikwembu xa wena, xi ku siveleke swona. 24Hikuva Yehovha, Xikwembu xa wena, i ndzilo lowu pfurhaka, i Xikwembu lexi nga ni rilondzo.
25“Kungakuloko u velekile vana ni vatukulu, ni loko mi akile khale etikweni, kutani mi tionha, ni loko mi tivatlela swifaniso, swi va swikombiso swa xilo xihi ni xihi, mi endla leswi biheke emahlweni ka Yehovha, Xikwembu xa wena, ku swi pfukela, 26ndzi vitana namuntlha tilo ni misava, ti va timbhoni ta n'wina leswaku mi ta fa hi ku hatlisa etikweni leri mi nga ta ri fuma loko mi perile Yordani; masiku ya n'wina ma nga ka ma nga lehi kona, hikuva mi ta herisiwa kunene. 27Yehovha u ta mi hangalasa ematikweni, kutani mi ta sala mi nga ri vangani exikarhi ka matiko lawa Yehovha a nga ta mi yisa eka wona; 28mi ta tirhela kona swikwembu leswi endliweke hi mavoko ya vanhu, wu ri ntsandze ni ribye, leswi nga voniki, ni leswi nga yingisiki ni leswi nga dyiki, ni leswi nga nun'hweteriki. 29Hi kona mi nga ta lava Yehovha, Xikwembu xa n'wina, kutani, kutakuloko u xi lava hi mbilu hinkwayo ya wena, ni moya hinkwawo wa wena, u ta xi kuma. 30Kutakuloko u le khombyeni, ni loko swilo hinkwaswo leswi swi fikele ka wena emikarhini leyi nga ta ta, u ta tlhelela eka Yehovha, Xikwembu xa wena, kutani u ta yingisa rito ra yena. 31Hikuva, Yehovha, Xikwembu xa wena, i Xikwembu xa tintswalo; xi nga ka xi nga ku tshiki, kambe xi nga ka xi nga ku herisi, xi nga ka xi nga rivali ntwanano wa vatata wa wena lowu xi va hlambanyeleke wona.
32“Vutisa timhaka ta masiku yo sungula lama nga emahlweni ka wena, ku sungula siku Xikwembu xi tumbuluxeke munhu emisaveni, ku suka emakun'wini ya tilo ku fika eku heleni ka rona, xana ku humelele leswikulu swonghasi, kambe xana va yingisile leswotano? 33Tiko hi rihi leri nga yingisa kukotisa wena rito ra Xikwembu leri vulavulaka endzilweni, kutani ri sala ri hanya? 34Kambe xana xikwembu xin'wana xi kona, lexi ringeteke ku titekela tiko exikarhi ka tiko rin'wana hi miringo, ni swikombiso, ni mahlori ni ku lwa hi voko leri tlakukeke ra matimba, ni mitirho leyikulu leyi chavisaka, hilaha Yehovha, Xikwembu xa n'wina, xi mi endleleke hinkwaswo hakona eEgipta emahlweni ka wena? 35A wu ri mbhoni ya swilo leswi, u ta tiva leswaku Yehovha i Xikwembu, ni leswaku a ku na xin'wana ehandle ka xona. 36Xi ku twisile rito ra xona xi ri etilweni ku ku dyondzisa; kambe la emisaveni, ku vonisile ndzilo wa xona lowukulu, kutani u yingisile marito ya xona endzilweni. 37Hikuva xi rhandzile vatata wa wena, kutani xi hlawurile vatukulu va vona endzhaku ka vona, xi ku humesile eEgipta hi mombo wa xona, ni matimba lamakulu ya xona, 38ku ta hlongola emahlweni ka wena matiko lama ku tlulaka hi vukulu ni matimba, ni ku ku nghenisa etikweni ra vona, ni ku ku nyika rona leswaku yi va ndzhaka ya wena hilaha u swi vonaka ha kona namuntlha; 39swi tive namuntlha, u tsala embilwini ya wena leswaku Yehovha i Xikwembu ehenhla etilweni, ni le hansi emisaveni; a ku na xin'wana. 40Hlayisa milawu ya xona, ni ku lerisa ka xona loku ndzi ku lerisaka namuntlha, leswaku u tsaka, ni vana va wena endzhaku ka wena, ni leswaku u tshama u lehisa masiku ya wena emisaveni leyi Yehovha, Xikwembu xa wena, xi ku nyikaka yona, yi va ya wena hi masiku.”
Ta miti ya vuchavelo hase ka Yordani.
41Kutani Muxe a hlawula miti minharhu ehase ka Yordani, evuxeni, 42byi va vuchavelo bya mudlayi la dlayeke warikwavo, ku nga ri ha vomu, ni loko a nga n'wi venganga, hambi ku ri tolo, hambi ku ri tolweni; u ta ya chavela eka wun'wana wa miti leyi, a va a hanya. 43I Beseri lowu nga emananga, erivaleni, wu ri wa va Rhuveni, na Ramoto wa Giliyadi, wa va Gadi, na Golani etikweni ra Baxani, wa va Manase.
Milawu ya khume na mimbirhi.
44Hi wona nawu lowu Muxe a wu vekeleke vana va Israele: 45Hi byona vumbhoni ni milawu ni ku lerisa, leswi Muxe a swi nyikeke vana va Israele loko va humile eEgipta, 46va ri hase ka Yordani, enkoveni ku langutana na Beta-Peyori, etikweni ra Sihoni, hosi ya Vaamori, la tshameke eHexiboni, loyi Muxe ni vana va Israele va n'wi hlaseleke loko va humile eEgipta. 47A va tekile tiko ra yena, ni tiko ra Ogo, hosi ya Baxani, ti ri tihosi timbirhi leti akeke ehase ka Yordani, evuxeni, 48ku suka eArowere la nga eribuwini ra nambu wa Arinoni, ku ya fika entshaveni ya Sihoni, leyi nge Hermoni, 49ni rivala hinkwaro ehase ka Yordani, evuxeni, ku ya fika eLwandle ra Mananga, ehansi ka Pisga.
