TIMHAKA 17

₁Kuteloko va hundzile eAmfipoli na Apoloniya, va ta eTesalonika, laha sinagoga ya Vayuda ingi yi ri kona. ₂Kutani Pawulo, hilaha a toloveleke hakona, a nghena eka vona; kutani hi Tisavata tinharhu a hlamulana na vona hi Matsalwa. ₃A va hlamusela, ni ku va komba leswaku a swi fanela leswaku Kriste a twisiwa ku vaviseka, ni ku pfuka eku feni, kutani a ku: “Kriste loyi, hi yena Yesu yeloyi ndzi mi byelaka yena.”

₄Kutani van'wana exikarhi ka vona va pfumela, va hlangana na Pawulo na Silasi, va ri ni vunyingi lebyikulu bya Vagriki lava gandzelaka Xikwembu, ni vavasati lavo tala lavakulu. ₅Kambe Vayuda va tala mavondzo, va teka vavanuna van'wana vo biha entsendzeleni, va endla ntshungu, va pfilunganya muti; kutani va rhendzela yindlu ya Yasoni, va lava Pawulo na Silasi ku va yisa emahlweni ka tiko. ₆Kuteloko va nga va kumi, va kokela Yaso ni vamakwavo van'wana emahlweni ka tindhuna ta muti, va huwelela, va ku: “Vanhu lava pfilunganyeke misava hinkwayo, va tile ni le halenu, kambe Yasoni u va amukerile; ₇kasi vona hinkwavo va ala ku lerisa ka Khezari, va ku: ‘Hosi yin'wana yi kona, a nga Yesu.’ ” ₈Sweswo va pfuxa tiko ni tindhuna ta muti leti nga twa timhaka teto. ₉Kambe, kuteloko ti nyikiwe xikhensanandzu hi Yasoni ni van'wana, ti va tshika va famba.

₁₀Nivusiku, vamakwavo va hatlisa va rhuma Pawulo na Silasi eBeriya. Kuteloko va fikile kona, va nghena esinagogeni ya Vayuda. ₁₁Vona va tlurisa Vatesalonika hi mafundza, va amukela rito hi ku hatlisa ngopfu, va kambela tibuku hi masiku hinkwawo, ku tiva leswaku timhaka ti tano xana. ₁₂Kutani lavanyingi exikarhi ka vona va pfumela, ni vavasati lavakulu va Vagriki, ni vavanuna lavo tala. ₁₃Kambe Vayuda va Tesalonika, loko va twa leswaku rito ra Xikwembu ri vulavuriwa hi Pawulo ni le Beriya, va ya kona, va pfilunganya tiko. ₁₄Hikwalaho vamakwavo va hatlisa va humesa Pawulo a ya tlhelo ra lwandle; kambe Silasi na Timotiya va sala kona. ₁₅Kutani lava heleketaka Pawulo, va n'wi fikisa eAtena, kambe va tlhela loko va lerisiwile ku byela Silasi na Timotiya leswaku va hatlisa va ya eka yena.

₁₆Pawulo, kakuloko a ha va langutela eAtena, moya wa yena wu tlhaveka endzeni ka yena, loko a vona muti wu tele hi swifaniso leswi gandzeriwaka. ₁₇Kutani a hlamulana esinagogeni ni Vayuda ni lava chavaka Xikwembu, a endlisa sweswo ni le hubyeni hi masiku hinkwawo ni lava a hlanganaka na vona.

₁₈Kambe tintlhari tin'wana ta dyondzo ya Epikuro ni ya Switoyika, va hlamulana na yena; kutani van'wana va ku: “Xana xivulavuri lexi, xi ri yini?” Van'wana va ku: “Wa ngi i mufundhisi wa swikwembu swin'wana,” hikuva a a va byela ta Yesu ni ta ku pfuka ka vafi. ₁₉Kutani va n'wi khoma, va n'wi yisa ehubyeni ya Areyopago, va ku: “Xana hi nga tiva dyondzo leyintshwa leyi u yi vulaka xana? ₂₀Hikuva u tisile timhaka tin'wana leti hlamarisaka etindleveni ta hina; hikwalaho hi rhandzaka ku ti tiva leswaku hi leto yini.”

₂₁Kambe loko va ri va Atena hinkwavo, ni lava luveleke kona, a va nga tirhi nchumu loko ku nga ri ku rungula, kumbe ku yingisa timhaka letintshwa.

Kavaloko Pawulo a yima exikarhi ka Areyopago, a ku:

₂₂“Vavanuna va Atena, ndzi vona leswaku eka swilo hinkwaswo, mi vanhu lava chavaka swikwembu ku tlurisisa. ₂₃Hikuva loko ndzi famba ndzi languta magandzelo ya n'wina, ndzi kumile alitari laha ku tsariweke va ku: ‘Eka Xikwembu lexi nga tiviwiki!’ Sweswi, Xikwembu lexi mi xi gandzelaka mi nga xi tivi, hi lexi ndzi mi byelaka xona. ₂₄Xikwembu lexi nga endla misava ni hinkwaswo leswi nga eka yona, yi nga yona Hosi ya matilo ni misava, xi nga ka xi nga aki etitempeleni leti akiweke hi mavoko; ₂₅na kona, a xi tirheriwi hi mavoko ya vanhu, swange hiloko xi pfumala xilo ni xin'we; kasi hi xona xi nyikaka hinkwavo vutomi, ni ku hefemula, ni swilo hinkwaswo. ₂₆Kambe xi endlile vanhu va tinxaka hinkwato hi ngati yin'we, ku aka ehenhla ka misava hinkwayo; xi lerisile tinguva leti hlawuriweke hi xona ni mindzilekana ya ku aka ka vona, ₂₇swi ri leswaku va lava Xikwembu, leswaku kumbexana va nga xi ambamba, ni ku xi kuma, hambi xi nga ri kule eka un'wana ni un'wana wa hina; ₂₈hikuva eka yena hi ni vutomi, ni ku fambafamba, ni ku hanya; kukotisa loko vabumabumeri van'wana va n'wina va nga vula, va ku: ‘Hi rixaka ra xona kunene.’ ₂₉Kutani leswi hi nga rixaka ra Xikwembu, a hi fanelanga ku anakanya leswaku vukwembu byi fana ni nsuku, hambi ntsopfu, kumbe ribye, yi nga mitirho ya vutlhari ni miehleketo ya vanhu. ₃₀Kambe Xikwembu xi tshikile masiku leswaku ma hundza walawo ya ku pfumala ku tiva, kutani sweswi, xi lerisa vanhu hinkwavo, ematikweni hinkwawo, leswaku va hundzuka. ₃₁Hikuva xi vekile siku leri xi nga ta avanyisa misava ha rona hi mukhuva lowo lulama, hi wanuna loyi xi n'wi hlawuleleke swona; kutani xi tiyisile eka hinkwavo mhaka leyi, hi ku n'wi pfuxa eku feni.”

₃₂Kambe loko va twa mhaka ya ku pfuka ka vafi, van'wana va hleka van'wana va ku: “Ha ha ta tlhela hi ku yingisa kambe emhakeni leyi.” ₃₃Kavaloko Pawulo a suka exikarhi ka vona. ₃₄Kambe vavanuna van'wana va n'wi namarhela, va pfumela; exikarhi ka vona, un'wana a a ri Diyonisiyo wa Areyopago, ni wansati loyi va nge i Damarisi, va ri ni van'wana.