Ta riendzo ra Pawulo na Silasi, va kuma Timotiya; va ya eMakedoniya.
1Kutani a fika eDerbe na Listra. Kambe mudyondzisiwa a a ri kona, vito ra yena a a ri Timotiya; mana wa yena a a ri Muyuda la pfumeleke, 2kambe tata wa yena a a ri Mugriki; a a dzunisiwa hi vamakwavo va Listra ni va Ikoniya. 3Pawulo a a rhandza leswaku a famba na yena, kutani a n'wi teka, a n'wi yimbisa, hikwalaho ka Vayuda lava ngi va ri ematikweni walawo, hikuva hinkwavo a va swi tiva leswaku tata wa yena a a ri Mugriki. 4Kutani loko va ri karhi va famba emitini, va lerisa vamakwavo ku hlayisa milawu leyi nga vekiwa hi vaapostola ni vakulukumba va Yerusalema. 5Hi mukhuva wolowo tikereke ti tiyisiwa eku pfumeleni, kambe a ti andza siku rin'wana ni rin'wana.
6Kutani va tsemakanya Frigiya, ni tiko ra Galatiya, hikuva Moya lowo Kwetsima a wu va alela ku vula rito le Asiya. 7Kuteloko va fike eMisiya, va ringeta ku ya eBitiniya, kambe Moya wa Yesu a wu va pfumelelanga. 8Kuteloko va tsemakanyile eMisiya, va ngirimela eTrowasi.
9Kambe mahlori ma humelelela Pawulo nivusiku: Wanuna wa Makedoniya a yima emahlweni ka yena, a n'wi khongela, a ku: “Pelela eMakedoniya, u ta hi pfuna.” 10Kakuloko a vonile mahlori walawo, hi tilunghisa kan'we ku ya eMakedoniya, hi ku tiva leswaku Hosi yi hi vitanele kona ku ya va dyondzisa Evhangeli. 11Kuteloko hi sukile eTrowasi hi byatso hi kongoma eSamotraka, ni siku leri tlhandlamaka, eNeyapoli; 12loko hi suka kona, hi kongoma eFilipiya, wu nga muti lowukulu etikweni ra Makedoniya, ni koloni. Kutani hi xwa masiku man'wana emutini lowo.
Ta ku pfumela eka Lidiya.
13Hi siku ra Savata, hi huma emutini hi ya enambyeni, laha va toloveleke ku khongela kona; kuteloko hi tshamisile, hi vulavula ni vavasati lava hlengeletaneke kona. 14Kutani wansati un'wana loyi va nge i Lidiya, muxavisi wa xivunguvungu, wa muti wa Tiyatira, la chavaka Xikwembu, a tshama a yingisa; kutani Hosi yi pfula mbilu ya yena leswaku a twisisa timhaka leti Pawulo a ti vulaka. 15Kutani, kuteloko a khuvuriwile ni va yindlu ya yena, a hi khongela, a ku: “Loko mi ndzi kumile ndzi ri la tshembekeke kunene eka Hosi, mi nga nghena endlwini ya mina, mi tshama kona”; a phikelela leswaku hi ya kona.
Ta wansati loyi ngi a ri ni moya lowo biha.
16Kambe, kakuloko hi ya exikhongelweni, ku humelela nandza un'wana wa wansati loyi ngi a ri ni moya wa pitona (wa vungoma), a hlangana na hina; a a fumisa veni va yena hi ku bvumbha. 17Kutani a landza Pawulo na hina, a huwelela, a ku: “Vavanuna lava, i malandza ya Xikwembu lexi nge henhlahenhla, lava mi byelaka ndlela ya ku hlayiseka.” 18A engeta a endlisa sweswo hi masiku lama tlhandlamaka; kambe Pawulo a karhatiwa ha swona, kutani a rhendzeleka a ku eka moya: “Ndza ku lerisa hi vito ra Hosi Yesu Kriste leswaku u huma eka yena!” Kutani wu huma hi nomu wolowo.
19Veni va yena, kuteloko va vonile leswaku va lahlekele hi ku tshemba bindzu ra vona, va khoma Pawulo na Silasi, va va kokela ehubyeni, emahlweni ka tihosi; 20kutani va va yisa eka tindhuna, va ku: “Vanhu lava va nga Vayuda, va endla dzolonga emutini wa hina; 21va dyondzisa mikhuva leyi hi nga faneriki ku yi amukela, ni ku yi endla, hina hi nga Varhoma.” 22Kutani ntshungu wu va pfukela matimba; tindhuna ti va handzulela tinguvu, ti lerisa leswaku va biwa hi mikhavi. 23Kuteloko va va boxile mipfembeti leyo tala, va va hoxa ekhotsweni, va lerisa mulanguteri wa khotso leswaku a va langutela swinene. 24Yena, kuteloko a lerisiwile sweswo, a va nghenisa ekhotsweni leri nga exikarhi kutani a manya milenge ya vona hi mitsandza.
Ta ku pfumela ka mulanguteri wa khotso.
25Evusikwini lebyikulu, Pawulo na Silasi, a va khongela, va yimbelelela Xikwembu tinsimu; kutani lava nga khotsiwa va va yingisa. 26Kambe hi nomu lowu, ku tsekatseka lokukulu ka misava ku va kona; masungulo ya khotso ma tsekatsekisiwa, tinyangwa hinkwato ti pfuleka, kutani timpecana ta hinkwavo ti tshunxeka. 27Mulanguteri wa khotso a pfuka evurhongweni; kakuloko a vona tinyangwa ta khotso ti pfuriwile, a hlomula ripanga ra yena, a lava ku tidlaya, hikuva a a ehleketa leswaku vabohiwa va balekile. 28Kambe Pawulo a n'wi huwelela hi rito lerikulu, a ku: “U nga tshuki u tivavisa, hikuva ha ha ri kona hinkwerhu.” 29Kuteloko a komberile rivoni, a nghena hi ku tsutsuma, a tiwisela emilengeni ya Pawulo na Silasi, a ri karhi a rhurhumela. 30Kuteloko a va humesele handle, a ku: “N'wina tihosi, ndzi ta endla yini leswaku ndzi ponisiwa?” 31Va ku: “Pfumela eka Hosi Yesu Kriste, kutani u ta ponisiwa, wena ni va yindlu ya wena.”
32Kutani va n'wi byela rito ra Hosi, ni ka hinkwavo lava ngi va ri endlwini ya yena. 33Kutani a va teka hi nkarhi lowo wa vusiku, a hlantswa mipfembeti ya vona; kutani hi nomu lowu, a khuvuriwa, yena ni va yena hinkwavo. 34Kutani a va yisa endlwini ya yena, a veka swakudya emahlweni ka vona; kutani a tsaka swin'we ni va yindlu ya yena hinkwavo, hikuva a a pfumerile eka Xikwembu.
Ta ku tshunxiwa ka Pawulo na Silasi.
35Loko byi xa, tihosi ti rhuma lava tamelaka tinhonga ku n'wi byela, va ku: “Tshika vanhu lava, va tifambela.” 36Kutani mulanguteri wa khotso a tivisa Pawulo mhaka leyi, a ku: “Tihosi ti rhumele leswaku mi tshunxiwa, humani sweswi, mi tifambela hi ku rhula.” 37Kambe Pawulo a ku eka vona: “Leswi va nga hi ba emahlweni ka vanhu hi nga si avanyisiwa, hina hi nga Varhoma, va hi hoxa ekhotsweni, xana sweswi, va ta hi humesa exihundleni xana? A hi swona; kambe a ku te vona hi xiviri, va ta hi humesela ehandle.” 38Malandza ma yisa marito walawo eka tihosi; tona, loko ti twa leswaku i Varhoma, ti chava. 39Kutani va ta, va va chavelela; kambe va va humesela ehandle va va khongela leswaku va huma emutini. 40Kuteloko va humile ekhotsweni, va ya eka Lidiya; kuteloko va vonile vamakwavo, va va khongotela, kutani va tifambela.
