2 TIMOTIYA 1

₁Pawulo, muapostola wa Yesu Kriste, hi ku rhandza ka Xikwembu, hikwalaho ka ku tshembisiwa ka vutomi lebyi nga ka Yesu Kriste;

₂Eka Timotiya, n'wananga la rhandziwaka; tintswalo, ni ku tsetselela, ni ku rhula, a swi ve na wena, swi huma eka Xikwembu Tatana, ni ka Yesu Kriste, Hosi ya hina.

₃Ndzi khensa Xikwembu lexi ndzi xi tirhelaka hi ripfalo lero basa kukotisa vatatana va khale, hikuva a ndzi rhuteri ku ku anakanya emikhongelweni ya mina, vusiku ni nhlekanhi, ndzi ri karhi ndzi anakanya mihloti ya wena, ₄kutani ndzi navela ngopfu ku ku vona leswaku ndzi va ni ku tsaka; ₅ndzi anakanya ni ku pfumela loku baseke loku nga eka wena ni loku ngi ku akile khale eka Luwisa kokwa wa wena, ni ka Yunika mana wa wena; kutani ndzi tshemba ngopfu leswaku ku kona, ni ka wena.

₆Hikwalaho, ni sweswi, ndza ha ku tsundzuxa ku pfuxa, u kondletela ku nyika ka Xikwembu loku nga eka wena hi ku tlhandleka ka mavoko ya mina. ₇Hikuva Xikwembu a xi hi nyikangi moya wa vutoya, kambe i moya wa matimba, ni wa rirhandzu, ni wa vutlhari. ₈Hikwalaho, u nga tshuki u va ni tingana hikwalaho ka vumbhoni bya Hosi ya hina, hambi ku ri hikwalaho ka mina, mubohiwa wa yona; kambe u amukela swin'we na mina ku vaviseka ka Evhangeli, hi matimba ya Xikwembu, ₉lexi hi hanyiseke, kutani xi hi vitanile hi ku vitana loku kwetsimaka, ku nga ri hikwalaho ka mitirho ya hina, kambe hi ku tirhandzela ka xona, ni tintswalo leti hi ti nyikiweke ha Yesu Kriste, mikarhi yi nga si va kona, ₁₀kutani sweswi ta ha ku vonakisiwa hi ku humelela ka Mulondzovoti wa hina, Yesu Kriste, la heriseke matimba ya rifu, la humeseke vutomi eku vonakaleni, ni ku tshama loku nga heriki hi Evhangeli, ₁₁yoleyi ndzi vekiweke muvuri, ni muapostola, ni mufundhisi wa yona eka vamatiko.

₁₂Na swona, hikwalaho ka mhaka leyi, ndzi twisiwa ku vaviseka loku; kambe a ndzi khomiwi hi tingana hakona, hikuva ndzi tiva loyi ndzi pfumeleke eka yena, kutani ndzi tshembisisa swinene leswaku u ni matimba ya ku ndzi hlayisela leswi ndzi swi vekeke eka yena; siku leri ri ko ri humelela. ₁₃Tiyisela entileni wa timhaka ta ku hanyisa, leti u ti tweke eka mina, eku pfumeleni ni le rirhandzwini leri nga eka Yesu Kriste. ₁₄U hlayisa hi Moya lowo Kwetsima lowu akeke eka hina, leswinene leswi u vekeriweke swona.

₁₅Wa swi tiva leswaku hinkwavo va Asiya va ndzi fularhele; exikarhi ka vona ku na Figelo na Hermogene. ₁₆Hosi a yi tsetselele yindlu ya Onesiforo hikuva u ndzi chavelele kanyingi kambe a nga vanga na tingana hikwalaho ka ku bohiwa ka mina. ₁₇Kambe siku a fikaka eRhoma, u ndzi lave hi nghinghiriko a ko a ndzi kuma. ₁₈Hosi a yi n'wi humesele tintswalo emahlweni ka Hosi siku leriya! Kambe hinkwaswo leswi a ndzi tirheleke swona Efesa, wa swi tiva swinene.