1 TIMOTIYA 6

₁Makhumbi hinkwawo lama nga empingwini a ma ringanise leswaku veni va wona va lulameriwa hi ku chaviwa hinkwako, vito ra Xikwembu ni dyondzo ya xona swi nga tshuki swi sandziwa. ₂Kutani lava nga ni veni va vapfumeri, va nga tshuki va va tsan'wa, leswi va nga vamakwavo; kambe va va tirhela ngopfu kwalaho, hikuva i vapfumeri ni varhandziwa, kutani va va endlela swinene. Dyondzisa timhaka teti, u khongotela ha tona.

₃Kungakuloko un'wana a dyondzisa dyondzo yin'wana, kutani a nga namarheli marito lama hanyisaka ya Hosi ya hina Yesu Kriste, ni dyondza leyi lulameleke vukhongeri, ₄wa tikurisa, a nga tivi nchumu, u ni vuvabyi bya ku tengisana ni ku lwa hi marito, laha ku humaka kona mona, ni timholovo, ni ku lumbetana, ni ku vilela loko biha, ₅ni ku hambana etimhakeni ta vuhava ta vanhu lava nga ni ku anakanya loku boleke va lahlekeriwe hi ntiyiso va ringanisa leswaku vukhongeri byi hlola ku fuwa.

₆Kunene vukhongeri, loko byi ri ni ku tsaka ka mbilu, i rifuwo lerikulu; ₇hikuva a hi tisangi nchumu emisaveni, kambe swa vonaka leswaku hi nga ka hi nga teki nchumu eku mukeni ka hina. ₈Kutani loko hi ri ni swakudya ni swa ku ambala, a hi kolweni ha swona. ₉Kambe lava rhandzaka ku fuwa, va wela emiringweni, ni le ntlhan'wini, ni le ku naveleni loko tala ka vuphukuphuku loku onhaka, loku nwerisaka vanhu eku loveni ni le ku lahlekeni. ₁₀Hikuva rirhandzu ra rifuwo i rimitsu ra vudyoho hinkwabyo; van'wana, hi ku ri navela, va lahlekeriwe hi ku pfumela, kutani va titlhavile hi mahlomulo layo tala.

₁₁Kambe, loko u ri wena munhu wa Xikwembu, papalata swilo leswo, u tsutsumela ku lulama, ni vukhongeri, ni ku pfumela, ni rirhandzu, ni ku yingisela, ni musa. ₁₂Lwana nyimpi leyinene ya ku pfumela, khoma vutomi lebyi nga heriki, lebyi u byi vitaneriweke, hilaha u nga tivula hakona hi ku tivula lokunene emahlweni ka timbhoni leto tala. ₁₃Ndza ku lerisa emahlweni ka Xikwembu lexi hanyisaka hinkwaswo, ni le mahlweni ka Yesu Kriste, la nga vula vumbhoni bya yena hi ku tivula swinene emahlweni ka Pontiyo Pilato, ndzi ri: ₁₄Hlayisa nawu lowu, u nga ri na xivati ni xisandzu, ku fika siku ra ku vuya ka Yesu Kriste, Hosi ya hina, ₁₅leri nga ta kombisiwa enkarhini wa kona hi loyi a katekeke, la nga ni matimba a ri swakwe, mufumi wa vafumi, ni Hosi ya tihosi; ₁₆a nga yena a ri swakwe la nga riki wa ku fa, la tiakeleke eku vonakaleni laha ku nga tshineleriwiki, loyi ku nga riki na munhu exikarhi ka vanhu la n'wi voneke ni la nga n'wi vonaka; loyi ku chaviwa ni matimba lama nga heriki swi nga eka yena. Amen!

₁₇Byela vafuwi va nkarhi wa sweswi, leswaku va nga tshuki va tidzunisa, va nga tshuki va tshemba rifuwo leri nga tiyangiki, kambe va tshemba Xikwembu lexi hi nyikaka hinkwaswo hi ku rhandza ka xona, leswaku hi swi tsakela, ₁₈va tirha leswo saseka, va fuwa mitirho leyinene va rhandza ku avela van'wana swa vona, va hanana; ₁₉va tihlengeletela mikarhi leyi taka rifuwo leri nga ni masungulo lamanene, va ta kuma vutomi lebyi nga heriki.

₂₀Oho, Timotiya! Hlayisa lexi u nga vekeriwa xona, u tshinela ekule ni marito ya swahava, ni ya ku sandza, ni vukaneti bya vutivi, lebyi vuriwaka vutivi hi ku hemba, ₂₁lebyi van'wana hi ku byi landzelela, va hambukeke eku pfumeleni.

Tintswalo a ti ve na wena!