Ta ku dyoha ka Aminoni: a dlawa hi malandza ya Abixalomu.
1Endzhaku ka sweswo, Abixalomu, n'wana Davhida, a a ri ni makwavo wa wanhwana la sasekeke; vito ra yena a a ri Tamari, kutani Aminoni, n'wana Davhida, a n'wi rhandza. 2Aminoni a xaniseka a ko a vabya hikwalaho ka Tamari, makwavo, hikuva a a nga si tivana ni wanuna, kutani a swi nonon'hwa ngopfu emahlweni ka Aminoni ku n'wi endla nchumu. 3Aminoni a a ri ni nakulobye, vito ra yena a a ri Yonadabu, n'wana Ximeya, makwa Davhida, kambe Yonadabu a a ri munhu wa ku tlhariha ngopfu. 4A ku eka yena: “U ondzela yini-ke siku rin'wana ni rin'wana ku tlurisa, wena, n'wana hosi? Xana a u nga ndzi byeri xana?” Aminoni a ku eka yena: “Ndzi rhandza Tamari, makwa Abixalomu, makwerhu.” 5Kutani Yonadabu a ku eka yena: “Famba u tilata elawini ra wena, u endla swange wa vabya, kutani kutakuloko tata wa wena a ta ku ku vona, u ta ku eka yena: ‘U nga pfumelela Tamari, makwerhu, a ta ndzi phamela swakudya: U ta sweka swakudya emahlweni ka mina, ndzi n'wi vona, kutani ndzi ta swi amukela evokweni ra yena.’ ” 6Sweswo Aminoni a ya etlela, a endla swange wa vabya, kutani hosi yi ya n'wi vona. Aminoni a ku eka hosi: “U nga pfumelela Tamari, makwerhu, a ta ndzi swekela swinkwa swimbirhi emahlweni ka mina, ndzi ta swi dya evokweni ra yena.” 7Kutani Davhida a rhuma va ya byela Tamari endlwini, va ku: “Famba endlwini ya Aminoni, makwenu, u ta n'wi lunghisela swakudya.” 8Kavaloko Tamari a ya endlwini ya Aminoni, makwavo la etleleke; a teka mbila a yi pfuva, a endla swinkwa emahlweni ka yena, kutani a sweka swinkwa; 9a teka ni pani a swi phama emahlweni ka yena; kambe a ala ku dya. Kutani Aminoni a ku: “Humesani vanhu hinkwavo lava nga ekusuhi na mina.” Sweswo lava nga endlwini ya yena va huma hinkwavo. 10Kutani Aminoni a ku eka Tamari: “Tisa swakudya ekamareni, hi kona ndzi nga ta dya evokweni ra wena.” Kutani Tamari a teka swinkwa leswi a swi endleke, a swi neha eka Animoni, makwavo, ekamareni. 11Kakuloko a n'wi phamela swakudya, a n'wi khoma, a ku eka yena: “Tana makwerhu, u etlela na mina.” 12Yena a n'wi hlamula, a ku: “A hi swona, makwerhu, u nga ndzi khomisi tingana hikuva swi nga ka swi nga endleki eIsraeleni; u nga tshuki u endla manyala lawa. 13Na mina ndzi ta ya rhwala kwihi tingana ta mina xana? Loko u ri wena u ta fana ni un'wana wa manyala eIsraeleni. Sweswi vulavula na hosi, kutani a nga ka a nga ndzi arisi eka wena.” 14Kambe a nga rhandzanga ku yingisa rito ra yena, kutani a n'wi hlula hi matimba, a n'wi khomisa tingana, a etlela na yena. 15Kutani Aminoni a n'wi venga hi ku venga lokukulu, hikuva rivengo ra yena a ri tlula rirhandzu leri a n'wi rhandzeke ha rona. Kutani Animoni a ku eka yena: “Suka u famba!” 16A hlamula, a ku eka yena: “U nga endli xo biha lexi tlulaka xin'wana lexi u ndzi endleleke xona, hi ku ndzi hlongola.” 17Kambe a ala ku n'wi yingisa, kutani a vitana nandza loyi a n'wi tirhelaka, a ku eka yena: “Hlongolani nsati loyi ekule na mina, u pfala rivanti hi mpfungura endzhaku ka yena.” 18Kambe a a ri ni nguvu ya mavalavala, hikuva vana va vanhwana va hosi a va ambala tinguvu teto. Kutani loyi a tirhelaka Aminoni a n'wi humesa ehandle, a lotlela rivanti endzhaku ka yena. 19Kavaloko Tamari a teka nkuma a wu hoxa enhlokweni ya yena, a handzula nguvu ya mavalavala leyi a yi ambaleke, a tlakusa voko enhlokweni ya yena, a suka a famba, a ri karhi a huwelela.
20Kutani Abixalomu, makwavo, a ku eka yena: “Aminoni, makwenu, u tshamile na wena xana? Sweswi miyela, makwerhu: i makwenu; u nga tivavisi mbilu hi mhaka leyi.” Kambe Tamari a tshama endlwini ya Abixalomu, makwavo, a ri enhlomulweni. 21Hosi Davhida, kuteloko a twile timhaka hinkwato leti, a kariha ngopfu. 22Kambe Abixalomu a a nga vulavuli na Aminoni leswo biha hambi swi ri leswo saseka; 23hikuva Abixalomu a a venga Aminoni, hikuva a onhile Tamari, makwavo.
Kuteloko ku hundzile malembe mambirhi, Abixalomu a a ri ni vatsemeri emutini wa Baala-Hazoro, lowu nga ekusuhi na Efrayimi; kutani Abixalomu a vitana vana va hosi hinkwavo. 24Abixalomu a ya eka hosi, a ku: “Waswivo, nandza wa wena u ni vatsemeri, ndzi kombela hosi ni malandza ya yena leswaku va ta eka nandza wa wena.” 25Hosi yi ku eka Abixalomu: “E-e, n'wananga; hi nga ka hi nga yi hinkwerhu leswaku hi nga tshuki hi ku tikela.” A n'wi sindzisa, kambe Davhida a ala ku ya kutani a n'wi katekisa. 26Abixalomu a ku: “Kambe makwerhu Aminoni ntsena a a te na hina.” Hosi yi ku eka yena: “U ta fambela yini na wena xana?” 27Kambe Abixalomu a n'wi sindzisa, kutani a rhuma Aminoni, ni vana hinkwavo va hosi va famba na yena. 28Abixalomu a lerisa malandza ya yena, a ku: “Xiyani swinene, kutakuloko mbilu ya Aminoni yi tsakisiwa hi vhinyo, ni loko ndzi ku eka n'wina: ‘Dlayani Aminoni!’ Mi ta n'wi dlaya, mi nga chavi, a ndzi mi lerisanga sweswo xana? Tiyani timbilu, mi va tinhenha!” 29Kavaloko malandza ya Abixalomu ma endlela Aminoni hilaha Abixalomu a leriseke hakona; kutani vana va hosi hinkwavo va pfuka, va khandziya un'wana ni un'wana mula ya yena, va tsutsuma.
30Kakuloko va ha ri endleleni, mpfumawulo wu ya fika eka Davhida, va ku: “Abixalomu u dlayile vana hinkwavo va hosi, a ku salanga na un'we.” 31Kutani hosi yi pfuka, yi handzula tinguvu ta yona, yi tilata ehansi, ni malandza hinkwawo ya yona ma yima la, tinguvu ta wona ti handzuriwile. 32Kutani Yonadabu, n'wana Ximeya, makwa Davhida, a vulavula, a ku: “Hosi yanga yi nga tshuki yi vula, yi ku: ‘Va dlayile majaha hinkwawo, vana va hosi,’ hikuva i Aminoni ntsena a feke, hikuva nomu wa Abixalomu wu swi tiyisile, siku Aminoni a nga onha Tamari, makwavo. 33Sweswi hosi, n'wini wanga, a nga tshuki a vaviseka embilwini hi mhaka leyi, a ku: ‘Vana va hosi va file hinkwavo,’ hikuva i Aminoni ntsena a feke.” 34Kambe Abixalomu a a balekile.
Kutani jaha leri nga vekiwa mulanguteri ri tlakusa mahlo ri languta, kutani waswivo, vanhu lavo tala a va ta hi ndlela ya le muhosi, tlhelo ra ntshava. 35Yonadabu a ku eka hosi: “Vana va hosi hi lava va fikaka, tani hi leswi nga vuriwa hi nandza wa wena.” 36Kakuloko a ha heta ku vulavula, vana va hosi va fika, kutani va tlakusa marito va rila; na yona hosi ni malandza ya yona hinkwawo va rila, va endla nkosi lowukulu ngopfu. 37Kambe Abixalomu a baleka, a ya eka Talimayi, n'wana Amihudi, hosi ya Gexuri. Kutani Davhida a a rila n'wana wa yena hi masiku hinkwawo.
38Sweswo Abixalomu a baleka, a ya eGexuri, a tshama kona malembe manharhu. 39Kutani hosi Davhida a tshika ku landzelela Abixalomu, hikuva a a chaveleriwile hikwalaho ka rifu ra Aminoni.
