Ta ku tshinyiwa ka Davhida; Natani.
1Kutani Yehovha a rhuma Natani eka Davhida. Kavaloko a ta eka Davhida, a ku eka yena: “Emutini wun'wana a ku ri ni vanhu vambirhi un'wana a a ri mufuwi, un'wana a a ri xisiwana. 2Mufuwi a a fuwe tihomu ni tinyimpfu leto tala ngopfu; 3kasi lowa xisiwana a a fuwe xinyimpfana xi ri xin'we ntsena lexi a nga xi xava, a xi wundla, xi kula endlwini ya yena swin'we ni vana va yena, xi dya swakudya swa yena, xi nwa exidzuvulweni xa yena, xi etlela exifuveni xa yena, xi ri kukotisa n'wana eka yena. 4Ku fika munhu la endzaka eka mufuwi, kutani a swi nonon'hwa eka yena ku teka xifuwo lexitsongo hambi lexikulu xa yena ku xi tlhavela muendzi la n'wi endzeleke, kutani a ya teka xinyimpfana xa xisiwana, a tlhava a lunghisela munhu la n'wi endzeleke.” 5Kavaloko Davhida a karihela munhu loyi ngopfu, a ku eka Natani: “Yehovha wa hanya! La endliseke sweswo u fanekele hi ku fa! 6U ta riha xinyimpfana eka mune, hi leswi a endleke mhaka leyi, a nga vanga na tintswalo.”
7Kutani Natani a ku eka Davhida: “Munhu loyi hi wena! Yehovha Xikwembu xa Israele, xi vurisile, xi te: ‘Ndzi ku cherile hi mafurha leswaku u va hosi ya Israele, ndzi ku kutsurile evokweni ra Sawulo, 8ndzi ku nyikile yindlu ya hosi ya wena, ndzi vekile vasati va hosi ya wena exifuveni xa wena; ndzi ku nyikile yindlu ya Israele ni ya Yuda; ni loko xi ri xilo lexitsongo, ingi ndzi ta ku engetela xilo xihi ni xihi. 9U sandzise ku yini rito ra Yehovha u endla leswi biheke emahlweni ka yena? U dlayile Uriya wa ka Hiti hi tlhari, u tekile nsati wa yena u n'wi endla nsati wa wena; kambe u n'wi dlayile hi tlhari ra vana va Amoni. 10Sweswi, tlhari ri nga ka ri nga humi endlwini ya wena ni siku ni rin'we, hikuva u ndzi sandzile, hi ku teka nsati wa Uriya wa ka Hiti u n'wi endla nsati wa wena.’ 11Yehovha u vurisile; a ku: ‘Waswivo, ndzi ta humesa khombo endlwini ya wena: ndzi ta teka vasati va wena emahlweni ka wena, ndzi va nyika vanakuloni, va ta etlela ni vasati va wena emahlweni ka dyambu leri; 12hikuva u swi endlile eswihundleni, kambe mina ndzi ta swi endla emahlweni ka Vaisraele hinkwavo, ni le mahlweni ka dyambu.’ ”
13Kutani Davhida a ku eka Natani: “Ndzi dyohele Yehovha.” Kutani Natani a ku eka Davhida: “Yehovha u hundzisile xidyoho xa wena; u nga ka u nga fi; 14kambe leswi u tsan'wiseke Yehovha eka valala va yena emhakeni leyi, n'wana loyi u velekeriweke yena u ta fa hakunene.” 15Kutani Natani a muka endlwini ya yena.
Kavaloko Yehovha a ba n'wana loyi nsati wa Uriya a velekeleke Davhida, kutani a vabya, a lava ku fa. 16Kambe Davhida a lava Xikwembu hikwalaho ka n'wana, a titsona swakudya, a nghena endlwini a tshama vusiku hinkwabyo a etlele hansi. 17Vakulukumba va yindlu ya yena va pfuka va ta eka yena, va n'wi khongotela ku pfuka ehansi, kambe a ala ni ku dya swakudya na vona. 18Kute hi siku ra ntlhanu na mambirhi, n'wana a fa, kutani malandza ya Davhida ma chava ku n'wi byela ku fa ka n'wana, hikuva a va ku: “Loko n'wana a ha hanya, a hi vulavula na yena kambe a nga yingisanga rito ra hina; xana hi ta tiya ku ya n'wi byela leswaku n'wana u file xana? U ta endla ku biha kun'wana!” 19Kambe Davhida a vona ku n'unun'uta ka malandza ya yena, kutani Davhida a tiva leswaku n'wana a file; kutani a ku eka malandza ya yena: “N'wana u file xana?” Va ku: “U file!” 20Kavaloko Davhida a pfuka ehansi, a hlamba, a tola, a ambala tinguvu tin'wana, kutani a nghena endlwini ya Yehovha, a khinsama; a tlhela a nghena endlwini ya yena, a kombela ku phameriwa swakudya, kutani a dya. 21Malandza ya yena ma ku eka yena: “U endla yini xana? Loko n'wana a ha hanya, a u titsona swakudya, u rila, kambe loko n'wana a file, u pfuka u dya!” 22Kutani a ku: “Loko n'wana a ha hanya, a ndzi titsona swakudya, ndzi rila, hikuva a ndzi ku: ‘Ku tiva mani xana? Kumbe Yehovha u ta ndzi tsetselela, kutani n'wana u ta hanya.’ 23Sweswi u file ndzi ta titsonela yini swakudya? Ndzi ta swi kota ku n'wi vuyisa xana? Mina ndzi ta ya eka yena, kambe yena a nga ka a nga vuyi eka mina.”
24Kutani Davhida a chavelela Batixeba, nsati wa yena; kutani a ya eka yena, a etlela na yena, kutani a veleka n'wana, loyi Davhida a n'wi thyeke vito ra Solomoni; kutani Yehovha a n'wi rhandza; 25a tivisa Davhida mhaka leyi hi Natani, muprofeta kutani yena a n'wi thya vito ra Yedidiya (murhandziwa wa Yehovha), hikwalaho ka Yehovha.
26Kutani Yowabu a lwa na Rhaba wa vana va Amoni, a teka muti wa ntsindza. 27Kutani Yowabu a rhumela Davhida tintsumi, a ku: “Ndzi lwile na Rhaba, ndzi tekile ni muti wa mati. 28Sweswi hlengeleta lava seleke va tiko, u rhendzela muti, u wu teka, leswaku loko ndzi teka muti, wu nga vitaniwi hi vito ra mina.” 29Davhida a hlengeleta tiko hinkwaro, a ya eRhaba, kutani a lwa na wona, a wu teka. 30Kutani a teka harhi ya vuhosi enhlokweni ya hosi ya vona (ku tika ka yona a yi ri talenta ya nsuku, yi ri ni maribye lama pfumariwaka) kutani yi vekiwa enhlokweni ya Davhida; a teka xuma lexikulu ngopfu emutini, a famba na xona. 31Loko va ri vanhu va kona, a va humesa, a va tirhisa emasaheni ni le tipikeni ta nsimbhi, ni le swihlokeni swa nsimbhi, a va vumbisa ni switina; a endlela Sweswo miti hinkwayo ya vana va Amoni. Kutani Davhida a tlhela a muka eYerusalema ni tiko hinkwaro.
