Ta Davhida loko a ri eSikilaga.
1Kutani Davhida a ehleketa embilwini ya yena, a ku: “Ndzi ta dlawa siku rin'wana hi mavoko ya Sawulo; a ndzi na ku endla kun'wana loko ku nga ri ku tsutsumela etikweni ra Vafilista; Sawulo a ta tshika ku ndzi lava etikweni hinkwaro ra Israele; sweswo ndzi ta chupuka evokweni ra yena.”
2Kavaloko Davhida a pfuka a ri ni vanhu va yena va 600 kutani va kongoma eka Akixi, n'wana Mawoko, hosi ya Gati. 3Kutani Davhida a tshama na Akixi eGati, ni vanhu va yena, un'wana ni un'wana a ri ni va yindlu ya yena. Davhida a a ri ni vasati va yena vambirhi, Ahinowama wa Yizriele, na Abigayele, nsati wa Nabala, wa Karmele. 4Kutani va ya byela Sawulo leswaku Davhida u tsutsumela eGati, kambe a nga ha engetangi ku n'wi landzelela.
5Davhida a ku eka Akixi: “Loko ndzi kumile tintswalo emahlweni ka wena a va ndzi nyike ndhawu emutini wun'wana wa miti ya le handle, ndzi ta aka kona; xana nandza wa wena u ta akela yini na wena entsindza?” 6Kutani siku lero, Akixi a n'wi nyika Sikilaga; hikwalaho Sikilaga i wa tihosi ta va Yuda ku fika namuntlha. 7Ntsengo wa masiku lawa Davhida a tshameke etikweni ra Vafilista, i lembe rin'we na mune wa tin'hweti.
8Davhida ni vanhu va yena a va tlhandluka va ya hlasela Vagexuri ni Vagirizi, ni Vaamaleke, hikuva matiko lawa, a ma akile etikweni leri ma akeke khale eka rona, etlhelo ra Xuru, ni ku ya fika etikweni ra Egipta. 9Davhida a hlasela tiko leri, a dlaya vavanuna ni vavasati, a teka swifuwo, ni timbhongolo, ni tikamela, ni tinguvu, kutani a tlhelela eka Akixi. 10Kakuloko Akixi a vutisa, a ku: “A mi yile mi ya hlasela kwihi namuntlha xana?” Davhida a a ku: “Edzongeni ra Yuda, ni le dzongeni ra va Yerahamiele, ni le dzongeni ra Vakeni.”
11Davhida a nga tshikanga munhu un'we a hanya, hambi a ri wanuna, hambi a ri wansati ku va tisa eGati, hikuva a a chava leswaku va nga ta vula timhaka tin'wanyana leti va nga kanetaka Davhida ha tona, va ku: “Davhida u endlile leswo karhi.” A tshama a endla sweswo emikarhini hinkwayo leyi a akeke etikweni ra le handle ka Vafilista. 12Kambe Akixi a a tshemba Davhida, a ku: “U tiendlele ndzhukano eka tiko ra yena ra Israele, kutani u ta va nandza wa mina hi masiku.”
