Ta Davhida loko a ya entsongeni wa Sawulo.
1Vanhu va Zifi va ta eka Sawulo eGibeya, va ku: “Davhida a nga tumbelanga exitsungeni xa Hakila, ku langutene ni mananga xana?” 2Kavaloko Sawulo a pfuka, a ngirimela emananga ya Zifi, a ri ni vanhu lava hlawuriweke Vaisraele va 3 000, a ya lava Davhida emananga ya Zifi. 3Kutani Sawulo a gova exitsungeni xa Hakila, ku langutene ni rivala, kusuhi ni ndlela; kambe Davhida a a tshamile emananga, kutani a vona leswaku Sawulo a a tile ku ta n'wi lava emananga. 4Davhida a rhuma tinhlori, kutani a tiva leswaku Sawulo u fikele kunene. 5Kavaloko Davhida a suka a ya laha Sawulo a goveke kona Davhida a vona ndhawu leyi Sawulo e etleleke ka yona na Abinere, n'wana Neri, ndhuna ya nyimpi ya yena. Sawulo a a etlele exikarhi ka tigolonyi, kutani tiko a ri govile ematlhelweni hinkwawo ya yena.
6Kutani Davhida a vulavula na Ahimeleke, Muhiti, na Abixayi, n'wana Seruya makwa Yowabu, a ku eka vona: “I mani la nga ta xikela na mina eka Sawulo emagoveleni?” Abixayi a ku: “Mina, ndzi ta famba na wena.” 7Kavaloko Davhida na Abixayi va ya fika nivusiku ekusuhi ni nyimpi, kutani maswivo, Sawulo a etlele vurhongo exikarhi ka tigolonyi, kambe tlhari ra yena ri dzimiwile ehansi evuseketelweni bya yena. Kambe Abinere ni vanhu va tiko a va etlele ematlhelweni ya yena. 8Abixayi a ku eka Davhida: “Namuntlha Xikwembu xi nyiketile nala wa wena evokweni ra wena; sweswi ndzi pfumelele ndzi n'wi tlhava hi tlhari, ndzi n'wi bela ehansi kan'we; a ndzi nga ha bi ra vumbirhi.” 9Davhida a ku eka Abixayi: “U nga tshuki u n'wi dlaya, hikuva i mani la nga ta tlakusa voko ehenhla ka muhlawuriwa wa Yehovha, a nga vi na nandzu xana?” 10Davhida a ku: “Yehovha wa hanya! I Yehovha ntsena a nga ta n'wi ba, hambi siku ra ku fa ka yena ri fika, kumbe loko a ya eku lweni a dlawa kona! 11Yehovha a a ndzi sivele ku tlakusa voko ra mina ehenhla ka muhlawuriwa wa Yehovha! Sweswi, teka tlhari leri nga evuseketelweni bya yena, ni nghotsa ya mati, kutani hi suka hi famba.” 12Davhida a teka tlhari ni nghotsa evuseketelweni bya Sawulo, kutani va famba. Kambe a va voniwanga hi munhu ni ku tiviwa; a ku pfukanga na un'we, hikuva a va etlele hinkwavo; Yehovha a a va etlerisile hi vurhongo lebyo tika.
13Davhida a pelela etlhelo rin'wana, kutani a yima enhlohlorhini ya ntshava a ri kule; mpfhuka lowo leha wu ri exikarhi ka vona. 14Kutani Davhida a huwelela eka nyimpi ni ka Abinere, n'wana Neri, a ku: “Xana a ku hlamuli Abinere?” Kutani Abinere a hlamula a ku: “U mani, wena la huwelelaka eka hosi?” 15Davhida a ku eka Abinere: “A ku wanuna xana? I mani la fanaka na wena eIsraeleni xana? A ku hitekelanga hosi, mufumi wa wena xana? Hikuva un'wana wa tiko u tile ku ta dlaya hosi, n'wini wa wena. 16A hi swona leswi u swi endleke. Yehovha wa hanya! Mi fanekele hi rifu n'wina mi nga hitekelangiki n'wini wa n'wina, a nga muhlawuriwa wa Yehovha. Languta sweswi, ri kwihi tlhari ra hosi, ni nghotsa ya mati, leswi ngi swi ri evuseketelweni bya yena xana?”
17Sawulo a tiva rito ra Davhida, kutani a ku: “Xana a hi rito ra wena, n'wananga, Davhida?” Davhida a ku: “I rito ra mina, wee hosi, n'wini wanga.” 18A ku: “Xana hosi yanga yi hlongorisela yini sweswo nandza wa yena? Hikuva ndzi endle yini xana? Ku dyoha ku kwihi evokweni ra mina xana? 19Sweswi hosi yanga yi nga yingisa marito ya nandza wa yena! Loko a ri Yehovha la ku susumetaka ku ndzi hlongorisa, a a amukele mhamba! Kambe loko va ri vanhu, a va rhukaniwe emahlweni ka Yehovha, hikuva va ndzi hlongorile ku ndzi sivela ku hlangana ni ndzhaka ya Yehovha, va te: ‘Famba u ya tirhela swikwembu swin'wana!’ 20Sweswi, ngati ya mina yi nga tshuki yi wela ehansi kule ni mombo wa Yehovha; hikuva hosi ya Israele yi humile ku ya lava vutseka, kukotisa munhu loko a hlongorisa n'hwari etintshaveni.”
21Kavaloko Sawulo a ku: “Ndzi dyohile; tlhela, n'wananga Davhida, hikuva ndzi nga ka ndzi nga ku dyoheli, hikuva namuntlha vutomi bya mina a byi ri ni risima ngopfu emahlweni ka wena. Waswivo, ndzi endlile hi vuphukuphuku, ndzi ni nandzu lowukulu ngopfu.” 22Davhida a hlamula, a ku: “Tlhari ra hosi hi leri; a ku te jaha rin'wana ra wena ri ta ri teka. 23Yehovha u ta tlherisela un'wana ni un'wana hi vunene bya yena ni ku tshembeka ka yena, hikuva Yehovha a a ku vekile namuntlha emavokweni ya mina, kambe a ndzi rhandzanga ku tlakusa voko ra mina ehenhla ka muhlawuriwa wa Yehovha. 24Waswivo, kukotisa leswi namuntlha vutomi bya wena a byi ri ni risima ngopfu emahlweni ka mina, vutomi bya mina byi ta va ni risima sweswo emahlweni ya Yehovha, kutani u ta ndzi ponisa emakhombyeni hinkwawo.” 25Kutani Sawulo a ku eka Davhida: “A ku katekisiwe n'wananga, Davhida! Kunene u ta katekisiwa emitirhweni ya wena.” 26Kutani Davhida a famba endleleni ya yena, kambe Sawulo a tlhelela ekaya ka yena.
