Sihlabelelo 71

₁Awu, Simakadze!

Ngikhosela kuwe,

ungavumi ngijabhiswe nakanye.

₂Ngisindzise ngekulunga kwakho, ungihlenge,

beka indlebe yakho ngakimi, ungisindzise.

₃Bani lidvwala lesiphephelo kimi,

lengingaphephela kulo nome nini,

wena lowayala kutsi ngisindziswe,

ngobe nguwe lidvwala lami nesiphephelo sami.

₄Awu, Nkulunkulu wami!

Ngephule emandleni alomubi,

esandleni sesidlova lesite bucotfo,

kanye nakumuntfu lonelulaka.

₅Ngobe nguwe, Simakadze,

lolitsemba lami,

Simakadze ulitsemba lami,

kwasebusheni bami.

₆Seloku ngatalwa ngeyeme kuwe,

nguwe lowangenta ngatalwa,

ngiyawukudvumisa ngingakhawuli.

₇Kulabanyenti ngajika ngaba simanga,

kepha wena usiphephelo sami lesicinile.

₈Umlomo wami uyawugcwala kukubonga,

ngimemetele bukhosi bakho

imihla ngemihla.

₉Ungangilahli esikhatsini sebudzala bami,

ungangikhohlwa nase ngiphelelwa ngemandla.

₁₀Ngobe titsa tami tikhuluma kabi ngami,

nalabo labafuna kungibulala

bahlangene ngami bayangisongela,

₁₁batsi: “Nkulunkulu umlahlile,

asimtingele size simbambe,

ngobe kute longaphindze amsindzise.”

₁₂Hhawu, Nkulunkulu!

Ungakhweshi kimi!

Hhawu, Nkulunkulu wami!

Phutfuma ungihlenge!

₁₃Shangatsi labo labafuna kuphila kwami

bangadliwa ngemahloni babhubhe;

shangatsi bangasibekelwa bubi nelihlazo

labo labacondze kungilimata.

₁₄Kepha mine

ngiyawukwetsembela kuwe njalonjalo,

ngengete kukudvumisa

ekukudvumiseni kwami.

₁₅Umlomo wami

uyawulandza ngekulunga kwakho,

uvakalise insindziso yakho onkhe emalanga,

ngobe yinyenti ngehluleka nekuyikala.

₁₆Yebo, Simakadze, Nkulunkulu wami,

imisebenti yakho lemikhulu

ngiyawuyiveta ebaleni,

ngibabate kulunga kwakho,

wena wedvwa.

₁₇Yebo, Nkulunkulu,

wangifundzisa kusukela ebusheni bami,

kuze kube ngunyalo ngisayimemetela

imisebenti yakho lemangalisako.

₁₈Nanyalo-ke nome sengigugile sengimphunga,

ungangishiyi, Nkulunkulu,

kuze ngishumayele

ingalo yakho kuso situkulwane,

nemandla akho kubo bonkhe labefikako.

₁₉Yebo, Nkulunkulu!

Kulunga kwakho kukhulu kufikela etulu.

Nguwe lowente tintfo letinkhulu.

Empeleni, Nkulunkulu, ngubani lofana nawe?

₂₀Nguwe lowentile kutsi

ngibone tinsizi letinyenti naletibuhlungu,

wangihlumelelisa futsi;

wabuye wangimonyula ekujuleni kwemhlaba,

wangikhiphela ngetulu kwawo.

₂₁Shangatsi ungandzisa bukhulu bami,

uphindze ungidvudvute.

₂₂Ngiyawuphindze ngikudvumise ngehabhu,

ngibonge kwetsembeka kwakho,

Nkulunkulu wami,

ngihlabele ngekukushayela lugubhu,

ngibonge wena Longcwele waka-Israyeli.

₂₃Tindzebe temlomo wami tiyawujabula,

ngobe ngiyawudvumisa wena,

nemphefumulo wami lowuhlengile

uyawukudvumisa.

₂₄Lulwimi lwami luyawukhuluma

ngekulunga kwakho lonkhe lilanga.

Ngobe labo bebafuna kungilimata

bahlazekile bajabhiswa.