Sihlabelelo 121

₁Ngiphakamisela emehlo ami etintsabeni;

lusito lwami luyawuchamuka kuphi?

₂Lusito lwami luchamuka kuSimakadze

lowenta lizulu nemhlaba.

₃Angeke avume

kutsi lunyawo lwakho lushelele,

lowo longumlondvoloti wakho aketeli.

₄Ngempela

lowo longumlondvoloti waka-Israyeli

aketeli, akalali.

₅Simakadze ngumlondvoloti wakho,

ungumtfunti wakho

esandleni sakho sekudla.

₆Lilanga lingeke likubhadlise emini

nenyanga ebusuku.

₇Simakadze uyawukuvikela

kuko konkhe lokubi,

alondvolote imphilo yakho.

₈Simakadze uyawulondvolota

kuphuma kwakho nekungena kwakho,

kusukela manje kuze kube phakadze.