Taga 26

₁Njengesitfwatfwa ehlobo nome imvula nakuvunwako, kunjalo kudvumisa silima.

₂Njengancedze londiza angahlali, nenkonjane lendiza ingahlali, sinjalo sicalekiso; asimehleli umuntfu longakasifaneli.

₃Emahhashi ayatalajwa, timbongolo tifakwa ematomu, netilima tiyashaywa.

₄Ungasiphendvuli silima ngebulima baso; nawenta njalo, nawe utawuba silima njengaso.

₅Phendvula silima njengalokufanele bulima baso, khona sitawubona kutsi asikahlakaniphi njengobe siticabanga.

₆Nangabe utfumela umbiko ngesilima, utiletsela inhlupheko, ngobe kufanana nekutsi ujuba tinyawo takho.

₇Emavi lahlakaniphile lakhulunywe silima akanamsebenti, afanana nemilente yesishosha.

₈Njengekubophela litje esidubulelweni, kunjalo kudvumisa silima.

₉Njengesidzakwa nasikhipha linyeva esandleni, anjalo emavi lahlakaniphile nasemlonyeni wesilima.

₁₀Umuntfu locasha silima nome ngubani nje lowendlulako, ufanana nemuntfu lodubula nome ngukuphi nje ngebutjoki alimate konkhe.

₁₁Silima lesenta intfo lembi kuze kube kabili sifanana nenja yona lebuyela iyekudla emahlante ayo.

₁₂Wake wambona kambe umuntfu locabanga kutsi uhlakaniphile? Silima sincono kakhulu kunaye.

₁₃Livila liyatitila litsi: “Ngingeke ngiphume, ngobe kunelibhubesi endleleni!” Liphindze litsi: “Kunelibhubesi emgwacweni.”

₁₄Njengesivalo sijikajika sibanjwe ngemahhuka, kanjalo nelivila lilala lijilajila embhedzeni walo.

₁₅Livila liyasifaka sandla salo endishini, kodvwa bese lehluleka kusifaka emlonyeni walo.

₁₆Livila liyaye licabange kutsi lihlakaniphe kakhulu kwendlula emadvodza lasikhombisa laphendvula ngekuhlakanipha.

₁₇Umuntfu longena ekucabaneni kwalabanye ufanana nemuntfu lobamba inja lengumkhenkhetse ngemadlebe.

₁₈Njengeluhlanya loludubula nome ngukuphi ngebutjoki, ₁₉uyingoti kanjalo umuntfu loyenga makhelwane abese utsi: “Cha, mine bengidlala.”

₂₀Ngaphandle kwetinkhuni umlilo uyacima; yebo, nangaphandle kwenhlebo incabano iyaphela.

₂₁Emalahle enta umlilo ukhehleke, tinkhuni tivutsisa umlilo, nemuntfu welutfutfuva ubhedla inkhani.

₂₂Emavi enhlebo afanana nemtsamo wekudla lokumnandzi; ehla kamnandzi afinyelele ngekhatsi kwemuntfu.

₂₃Njengeludziwo loluhucwe ngesiliva, anjalo emavi ekuyengana laphuma emlonyeni lonenhlitiyo lembi.

₂₄Umuntfu lotentisako ukhuluma kamnandzi, kantsi enhlitiyweni yakhe ufihle kuyengana. ₂₅Nome inkhulumo yakhe ingaba mnandzi kanjani, ungakholwa; ngobe ngekhatsi inhlitiyo yakhe igcwele bucili. ₂₆Inzondo yakhe angayimbonya ngemavi ekutentisa, kodvwa bubi bakhe buyawubasebaleni ngalelinye lilanga.

₂₇Nangabe umuntfu emba umgodzi wekwetsiya labanye, kuyakugcumkela yena; nome agicitela labanye ematje, kodvwa ayakugicikela kuye.

₂₈Umuntfu localemanga uyabatondza labo labacalela emanga, nelulwimi lolumphacambili luletsa kufa.