Taga 25

₁Leti nguletinye taga taSolomoni letabhalwa bantfu baHezekiya, inkhosi yakaJuda.

₂Bukhosi baNkulunkulu bubonakala kuloko lakufihlile; kodvwa bukhosi bemakhosi busekuphenyisiseni tintfo.

₃Njengekuphakama kwesibhakabhaka nekujula kwemhlaba, kunjalo kucabanga kwenkhosi, ungeke ukwati.

₄Susa kungcola kuyo isiliva, khona lomkhandzi atewukhandza intfo lenhle ngayo; ₅susa beluleki lababi edvute nenkhosi, kuze itewubusa ngekulunga.

₆Nawusembikwenkhosi, ungatenti lohlakaniphile nome utibeke esigabeni salabakhulu; ₇ngobe kuncono kwenyuselwa esikhundleni lesiphakeme kunekwehliselwa phansi, bantfu labakhulu bakubuka.

₈Ungasheshi uye enkantolo ngaloko lokubonile, ngobe nase kuphele lelicala lomunye wafakaza wakwenta silima, utawube sewentani-ke?

₉Nawunelicala namakhelwane wakho, khulumisana naye nilungisane; ungayibhabati imfihlo yalomunye umuntfu, ₁₀funa lona lokuvile akutsele ngelihlazo, bantfu bangaphindzi bakwetsembe.

₁₁Livi lelikhulunywe ngesikhatsi lesifanele lifanana nemahhabhula egolide labekwe etindishini tesiliva.

₁₂Njengelicici legolide, nanjengemhlobiso loligugu, linjalo livi leseluleko kulolivako alente.

₁₃Sitfunywa lesetsembekile sijabulisa lowo lositfumile, njengemanti lacandzako ehlobo; yebo, sihlumelelisa umoya wenkhosi yaso.

₁₄Njengemoya nemafu late imvula, unjalo umuntfu lotigabatisa ngetipho langatenti.

₁₅Ngekubeketela umbusi angancengeka aze avume, nelulwimi lolumnandzi lungatsambisa ematje.

₁₆Nawutfole luju, ubodla lolo loludzingako; ungaludli kakhulu, ngobe lutakugulisa.

₁₇Ungavamisi kuvakashela makhwelwane wakho, funa adzinwe nguwe bese uyakutondza.

₁₈Umuntfu lofakaza emanga ngamakhelwane wakhe uyingoti njengesicwayi, nome njengenkemba, nome njengesikhali lesikhaliphako.

₁₉Kwetsembela kumuntfu longetsembeki ngesikhatsi lesibucayi kufanana nekwetsemba litinyo lelibolile nome kwetsemba lunyawo lolwenyele.

₂₀Kuhlabelela umuntfu lodzabukile kufanana nekukhumula tingubo takhe kucandza nome nekutsela viniga esilondzeni.

₂₁Nangabe sitsa sakho silambile, siphe kudla sidle; nasomile, siphe emanti sinatse. ₂₂Ngekwenta loko utawube usidlisa ngemahloni, Simakadze utakuvuza.

₂₃Njengobe umoya wasenyakatfo uletsa imvula, kanjalo nenhlebo iletsa kutfukutsela.

₂₄Kuncono kutihlalela wedvwana etaleni kunekuhlala endlini yinye nemfati lotsetsela futsi.

₂₅Tindzaba letimnandzi letiphuma eveni lelikhashane tifanana nemanti lacandzako emphefumulweni lokhatsele.

₂₆Njengemtfombo lodvungekile nome siyalu lesinashevu, unjalo umuntfu lolungile nakatihlanganisa nemuntfu lomubi.

₂₇Bubi bekuhalela ludvumo bufanana nekudla kakhulu luju.

₂₈Umuntfu lowehluleka kutibamba ufanana nelidolobha lelibhidlikelwe tindvonga talo.