kuFilemoni 1

₁Lencwadzi iphuma kuPawula, siboshwa ngenca yaKhristu Jesu, nakuThimothi, umzalwane wakhe.

Iya kuFilemoni lotsandzekako nalosisebenti kanye natsi, ₂naku-Aphiya, dzadzewetfu, naku-Akhiphusi, lolisotja laJesu kanye natsi, nakulo lonkhe libandla lelihlanganela endlini yaFilemoni.

₃Akube kini umusa nekuthula lokuvela kuNkulunkulu, longuBabe wetfu, naseNkhosini yetfu Jesu Khristu.

₄Ngaso sonkhe sikhatsi nangithandaza, ngiyakukhumbula, ngibonge Nkulunkulu, ₅ngobe sengivile ngelutsandvo lwakho kubantfu baNkulunkulu, ngeva nangekukholwa kwakho lonako eNkhosini Jesu. ₆Ngithandazela kutsi budlelwane betfu ekukholweni bukwente uwati kancono emagugu lesinawo kuKhristu. ₇Lutsandvo lwakho luyangijabulisa, futsi luyangikhutsata, mzalwane wami. Tinhlitiyo talabanyenti labangcwele tihlunyelelisiwe ngalo.

₈Ngako-ke bengingaba nesibindzi ngaKhristu kutsi ngikutfume wente lokufanele kwentiwe, ₉kodvwa ngenca yelutsandvo ngiyakuncenga. Mine Pawula, njengemuntfu losamdzala nyalo, nalosasiboshwa ngenca yaKhristu Jesu, ₁₀ngiyakuncenga mayelana na-Onesimuse, indvodzana yami, lengimtfole ngesikhatsi ngisejele. ₁₁Kucala abete lusito kuwe, kodvwa nyalo sewunelusito lolukhulu kitsi sobabili.

₁₂Ngimbuyisela kuwe, yena loyinhlitiyo yami. ₁₃Bengingatsandza kutsi ngimgcine ngalapha ngakimi, njengobe ngisiboshwa nje, khona atewutsatsa indzawo yakho ekungisiteni ngesikhatsi ngisaboshiwe ngenca yeliVangeli. ₁₄Noko angikatsandzi kwenta lutfo wena ungakavumi, kuze umusa ungayi ngekucindzetelwa, kodvwa usebente ngesihle.

₁₅Ngobe encenye Onesimuse wehlukaniswa nawe kwesikhashana nje, khona atawuphindze abuyiselwe kuwe, ningasenawuphindza nehlukane. ₁₆Manje akasabuyi njengesigcili, kodvwa sengumzalwane lotsandzekako. Njengobe angulotsandzeka kangaka kimi, kangakanani-ke kuwe! Phela sewuligugu kuwe, hhayi njengobe asigcili sakho kuphela, kodvwa njengemzalwane wakho eNkhosini.

₁₇Ngako-ke nawutsi mine ngingumhlanganyeli kanye nawe, naye-ke, memukele ngaleyo ndlela lebewungangemukela ngayo mine. ₁₈Nangabe kukhona lakona ngako, nome kukhona lakukweleda kona, sibuyise kimi leso sikwelede. ₁₉Nalu-ke luphawu lwekutsi mine Pawula ngiyakumkhokhela; akudzingeki nekutsi ngibe ngikukhumbuta kutsi kwawena nje ngekwakho ungewami, nginesabelo kuwe. ₂₀Yebo, mzalwane wami, ngicela kutsi ngitfokotiswe nguwe eNkhosini, ngekuhlumelelisa inhlitiyo yami kuKhristu.

₂₁Ngibhalele wena, ngobe ngiyetsemba kutsi utakwenta lengikucelako; ngiyati kutsi utakwenta nalokungetulu kwaloku lengikucelile. ₂₂Lokunye-ke kutsi ungilungiselele indzawo yekuhlala, ngobe ngiyetsemba kutsi imithandazo yenu itawuphendvuleka, Nkulunkulu angisite ngite lapho kini.

₂₃Uyanikhontisa Ephafrasi, lesiboshwe kanye naye ngenca yaKhristu Jesu, ₂₄naMakho, na-Aristakhusi naDemasi, kanye naLukha, tisebenti kanye nami.

₂₅Umusa weNkhosi yetfu Jesu Khristu awube nemoya wenu.