kuThithusi 3

₁Bakhumbute kutsi batfobele babusi netiphatsimandla tabo, balalele, balungele kwenta yonkhe imisebenti lemihle. ₂Kubete lokhuluma kabi ngalomunye, bangabi tilwi, babeketele, bakhombise bumnene kubo bonkhe bantfu. ₃Ngobe natsi matfupha sake saba tilima, singalaleli, sidukiswa, sitigcili tato tonkhe tinkhanuko nekutamasa. Besiphila ebubini nasemoneni, sitondzekile, sitondzana. ₄Kodvwa kwatsi Nkulunkulu uMsindzisi wetfu nakabonakalisa lutsandvo lwakhe kubantfu, ₅wasisindzisa, hhayi ngobe besente imisebenti yekulunga, kodvwa ngesihawu sakhe. Wasisindzisa, wasigeza ngekusitala kabusha nangekusenta busha ngaMoya Longcwele, ₆lowatfululelwa etikwetfu ngalokuchichimako ngaJesu Khristu uMsindzisi wetfu. ₇Ngako-ke ngemusa wakhe usente semukeleka kuye kutsi silungile, sibe tindlalifa tekuphila lokuphakadze lesetsembele kuko. ₈Lelivi licinisile.

Ngifisa kutsi ukugcizelele loku, kuze labo labakholwe kuNkulunkulu bakhutsalele kwenta imisebenti lemihle.

Loku kuhle, futsi kunelusito kubantfu. ₉Kodvwa uboyikhweshela imibuzo yebulima, nemilandvo yekutalana, nemibango, nekuphikisana ngemitsetfo, ngobe konkhe loko akusiti lutfo, futsi kulite. ₁₀Umuntfu lonemfundziso yekwedukisa ubomkhweshela, nasayalwe kanye nakabili, ₁₁wati kutsi lowo lonjalo sewuphambukile, wonile, utehlulele yena.

₁₂Nase ngitfumele Athemasi nome Thikhikhusi lapho kuwe, ubosheshe ute kimi eNikhopolisi, ngobe sengincume kubucitsa khona busika. ₁₃Sheshisa utfumele Zenasi, ummeli, na-Apolosi, ucaphele nekutsi bangesweli lutfo. ₁₄Bantfu bakitsi bakhutsalele kwenta imisebenti lemihle, kuze batewusita lapho kwesweleke lusito khona, bangabi ngulabangatseli titselo.

₁₅Bonkhe lenginabo lapha bayakuhambisa. Hambisa labo labasitsandzako ekukholweni.

Umusa awube nani nonkhe.