Johane 13

₁Kwatsi sekutakusa kube lilanga lelilandzelwa nguMkhosi weliPhasika, Jesu ati kutsi sikhatsi sakhe sesifikile sekutsi awushiye lomhlaba aye kuYise, njengobe abebatsandzile bakhe emhlabeni, wabatsandza kwaze kwaba ngusekugcineni.

₂Sathane abesakufake enhlitiyweni yaJudasi, umsa waSimoni Skariyothi, kutsi atsengise ngaJesu. Kwatsi nasekudliwa entsambama, ₃Jesu ati kutsi uYise abesanikele konkhe etandleni takhe, nekutsi abephuma kuNkulunkulu, futsi aya kuNkulunkulu, ₄wasukuma etafuleni wakhumula ingubo yakhe, wabopha lithawula elukhalweni lwakhe. ₅Watsela emanti emgezelweni, wacala kugeza tinyawo tebafundzi bakhe, watesula ngelithawula labelivunule elukhalweni. ₆Wefika kuSimoni Phetro, yena watsi kuJesu: “Nkhosi, wena utawugeza tinyawo tami?”

₇Jesu wamphendvula watsi: “Kwanyalo awukakwati loku lengikwentako, kodvwa emvakwaloko utakwati.”

₈Phetro watsi kuye: “Nkhosi, ungeke ugeze tinyawo tami nekadzeni.”

Jesu wamphendvula watsi: “Nangingatigezi tinyawo takho, ute budlelwane nami.”

₉Simoni Phetro watsi kuye: “Nkhosi, akungabi tinyawo todvwa; ngigeze netandla nenhloko.”

₁₀Jesu watsi: “Lowo logezile akadzingi lutfo lolunye kuphela kugezwa tinyawo. Kepha ugezekile wonkhe. Nine-ke senigezekile, kodvwa hhayi nonkhe.” ₁₁Ngobe abati kutsi ngubani labetamtsengisa. Ngiko nje atsi: “Anikagezeki nonkhe.”

₁₂Nasacedzile kubageza tinyawo, wabuye watsatsa ingubo yakhe wembatsa wabuyela endzaweni yakhe wahlala phansi. Wababuta watsi: “Niyakwati yini loku lengikwentile? ₁₃Ningibita ngeMfundzisi neNkhosi, nenta kahle, ngobe vele nginguko. ₁₄Nangabe-ke mine lengiyiNkhosi yenu neMfundzisi wenu, nginigeza tinyawo, nani-ke kufanele nigezane tinyawo. ₁₅Ngobe nginentele sibonelo, kuze nani nente njengobe nami ngentile kini. ₁₆Ngicinisile, ngicinisile, ngitsi kini: Sisebenti asisikhulu kunemcashi waso, nalowo lotfunyiwe akamkhulu kunalowo lamtfumile. ₁₇Nanitati-ke letintfo futsi nitenta, nibusisiwe.

₁₈“Angikhulumi ngani nonkhe; ngiyabati labo lengibakhetsile. Kodvwa kufanele kugcwaliseke umBhalo lotsi: ‘Lowo lodla sinkhwa sami, sewungigucukele, waphambana nami.’ ₁₉Nginitjela loku nyalo kusengakenteki, kuze kutsi nase kwenteka nikholwe kutsi ‘Nginguye leNginguye.’ ₂₀Ngicinisile, ngicinisile, ngitsi kini: Lowo lowemukela nome ngubani lengimtfumile, wemukela mine; nalowo lowemukela mine, wemukela lowo longitfumile.”

₂₁Jesu asakushito loku, wakhatsateka kakhulu emoyeni wakhe, wadzimate waphumisela watsi: “Ngicinisile, ngicinisile, ngitsi kini: Lomunye emkhatsini wenu utangitsengisa.”

₂₂Bafundzi babukana bodvwana badzidzekile kutsi ingabe ukhuluma ngabani. ₂₃Lomunye webafundzi labetsandvwa nguJesu abehleti edvute naye. ₂₄Ngako Simoni Phetro wamkhweba watsi: “Sitjele kutsi ngubani lona lakhuluma ngaye.”

₂₅Ngako-ke lomfundzi labehleti edvute naJesu watsi: “Nkhosi, ngubani lowo?”

₂₆Jesu wamphendvula watsi: “Ngulowo lengitamenyela lucetu lwesinkhwa ngimnike.”

Ngako-ke watsatsa lucetu lwesinkhwa, walwenya, walunika Judasi, umsa waSimoni Skariyothi. ₂₇Emvakwalolo lucetu, Sathane wase ungena kuJudasi. Jesu watsi kuye: “Loko lohlose kukwenta kwente masinyane.” ₂₈Kute kulaba lababesetafuleni lowati kutsi usho kutsini Jesu, nakasho njalo kuye. ₂₉Labanye bacabanga kutsi njengobe Judasi abengumphatsisikhwama, Jesu abetsi kuye akayewutsenga loko lababetakudzinga emkhosini, nome aphe timphuya lokutsite.

₃₀Judasi watsi kube alwemukele lolucetu lwesinkhwa, waphuma ngekushesha. Bekungusebusuku.

₃₁Ngako-ke asaphumile Judasi, Jesu watsi: “Manje iNdvodzana yeMuntfu ikhatimulisiwe, naNkulunkulu ukhatimulisiwe kuyo. ₃₂Nkulunkulu nakakhatimulisiwe kuyo, naye iNdvodzana yeMuntfu uyawuyikhatimulisa kuye; loko akwente masinyane. ₃₃Bantfwabami, ngisetawuba nani sikhashana. Nitangifuna, kodvwa njengaloku ngasho nakumaJuda nakini ngiyasho ngitsi: Lapho ngiya khona ningeke nine nikhone kuta. ₃₄Ngininika umyalo lomusha wekutsi: Njengobe nami nginitsandzile, nani tsandzanani. ₃₅Nanitsandzanako, bonkhe bantfu bayawunati kutsi nibafundzi bami.”

₃₆Simoni Phetro wambuta watsi: “Nkhosi, uyaphi?”

Jesu wamphendvula watsi: “Kwamanje ungeke ungilandzele lapho ngiya khona, kodvwa uyawungilandzela kamuva.”

₃₇Phetro watsi: “Nkhosi, kwanyalo kwalani kutsi ngikulandzele? Ngikulungele nekufa ngenca yakho!”

₃₈Jesu wamphendvula watsi: “Usho kutsi wena ukulungele nekufa ngenca yami? Ngicinisile, ngicinisile, ngitsi kuwe: Lichudze litawutsi likhala, wena utawube sewungiphike katsatfu.”