Johane 12

₁Kwatsi sekusele emalanga lasitfupha kufike lilanga leliPhasika, wefika Jesu eBhetani, lapho bekunaLazaro khona, lona lamvusa kulabafile. ₂Base bamentela kudla khona lapho. Mata abephakela kudla, Lazaro angulomunye walababedla naJesu. ₃Mariya watsatsa emakha labedule kakhulu, entiwe ngenadi; abengaba nesisindvo semagremu langema-340, wagcobisa tinyawo taJesu, wabuye watesula ngetinwele takhe. Liphunga lelimnandzi lalamakha latsaphuka nayo yonkhe lendlu. ₄Kepha Judasi Skariyothi, lomunye webafundzi bakhe, lona labetamtsengisa, watsi: ₅“Yini lamakha angakatsengiswa ngemaLangeni langema-300, kwaphiwa labamphofu lemali?” ₆Abesho loku, hhayi ngobe abevelana netimphuya kodvwa ngobe abelisela, angumgcinisikhwama, eba loko bekufakwa esikhwameni.

₇Kodvwa Jesu watsi: “Myekele, kuze atekuwalondvolotela lilanga lami lekungcwatjwa. ₈Labamphofu nihlala nabo ngaso sonkhe sikhatsi, kepha mine anihlali nami sonkhe sikhatsi.”

₉Sicumbi lesikhulu semaJuda seva kutsi Jesu abeseBhetani; ngako-ke seta kuye, hhayi ngobe sasifuna kubona Jesu kuphela, kepha sasifuna kubona naLazaro labemvuse kulabafile. ₁₀Kepha baphristi labakhulu benta emacebo ekubulala naLazaro; ₁₁ngobe ngenca yekuvuswa kwakhe emaJuda lamanyenti abesabahlubukile akholwa kuJesu.

₁₂Ngelilanga lelilandzelako bantfu labanyenti babete eMkhosini weliPhasika, beva kutsi Jesu uyeta eJerusalema. ₁₃Batsatsa emagala etihlahla telisundvu, baya bamhlangabeta, bamemeta batsi: “Hosana! Ubusisiwe lotako egameni leNkhosi! Yebo, uyiNkhosi yaka-Israyeli!”

₁₄Jesu wakhandza litfole lembongolo, waligibela, njengekusho kwemBhalo lotsi:

₁₆Bafundzi bakhe abazange bakucondzisise loko ngaleso sikhatsi, kodvwa kwatsi Jesu nasakhatimulisiwe, bakhumbula kutsi loko kwakubhaliwe ngaye nekutsi loko babekwentile kuye.

₁₇Besifakazile leso sicuku lesasinaye ngesikhatsi abita Lazaro, kutsi akaphume ethuneni, amvusa kulabafile. ₁₈Ngiko nje sicuku seta samhlangabeta, ngobe sase sivile kutsi Jesu wente lesibonakaliso. ₁₉Ngako baFarisi bakhuluma bodvwana batsi: “Niyabona yini kutsi shangatsi asenti lutfo; live lonkhe liyamlandzela lomuntfu!”

₂₀Bekukhona nemaGriki latsite emkhatsini walabo lababetewudvumisa kulowo mkhosi. ₂₁Wona-ke aya kuFiliphu waseBhethsayida laseGalile, afike atsi kuye: “Nkhosi, sicela kubona Jesu.”

₂₂Filiphu wahamba wayawutjela Andreya, base baya bobabili kuyawutjela Jesu. ₂₃Jesu wabaphendvula watsi: “Sesifikile sikhatsi sekutsi iNdvodzana yeMuntfu ikhatimuliswe. ₂₄Ngicinisile, ngicinisile, ngitsi kini: Inhlanyelo yakolo nayiwela emhlabatsini ingete yafa, ihlala iyodvwa; kepha nayifa, itsela titselo letinyenti. ₂₅Lowo lotsandza kuphila kwakhe, uyawulahlekelwa ngiko; nalowo lotondza kuphila kwakhe kulelive, uyawukulondvolotela kuphila lokuphakadze. ₂₆Lowo losikhonti sami akangilandzele, lapho ngikhona khona mine nesisebenti sami siyawuba khona. Losikhonti sami uyawutuswa nguBabe.”

₂₇“Manje inhlitiyo yami ilusizi. Ngitawutsini nje? Ngitsi: ‘Babe, ngisindzise kulomzuzu’? Cha, phela lapha emhlabeni ngetela lomzuzu. ₂₈Babe, dvumisa ligama lakho.”

Kusenjalo kwefika livi livela ezulwini litsi: “Sengilidvumisile, ngisetalidvumisa futsi.”

₂₉Bantfu lababeme lapho baliva lelivi bacabanga batsi: “Belidvuma.” Labanye batsi: “Ingilosi ikhulume kuye.”

₃₀Kodvwa Jesu watsi kubo: “Lelivi alikakhulumi ngenca yami kodvwa ngenca yenu. ₃₁Manje sesikhatsi sekwehlulelwa kwalelive, nembusi walelive sewutawucitfwa. ₃₂Mine nase ngiphakanyisiwe emhlabeni, bonkhe bantfu ngitabadvonsa bete kimi.” ₃₃Loko-ke wakusho akhombisa indlela labetawufa ngayo.

₃₄Lesicumbi samphendvula satsi: “Sivile emtsetfweni kutsi Khristu uyawuphila kuze kube phakadze. Kepha wena usho kanjani kutsi iNdvodzana yeMuntfu itawuphakanyiswa? Ngubani yona leNdvodzana yeMuntfu?”

₃₅Jesu wabaphendvula watsi: “Kukhanya kusetawuba nani kwesikhashana nje. Ngako hambani kusenekukhanya, kuze ningetikwehlelwa bumnyama, ngobe lohamba ebumnyameni akaboni lapho aya khona. ₃₆Kholwani kukhanya nisenako, kuze nitewuba bantfwana bekukhanya.”

Jesu watsi kube acedze lenkhulumo, wesuka kubo watifihla. ₃₇Kepha nome abetentile tibonakaliso letinyenti kangako embikwabo, abazange bakholwe kuye, ₃₈kuze kugcwaliseke livi la-Isaya umphrofethi lelitsi:

₃₉Ngako-ke abazange bakholwe, ngobe Isaya waphindze watsi:

₄₁Isaya wakusho loko ngobe wabona inkhatimulo yeNkhosi, wase ukhuluma ngayo.

₄₂Noko-ke labanyenti ngisho nakutiphatsimandla bakholwa kuJesu, kodvwa ngenca yekwesaba baFarisi abazange bafakaze ngako, ngobe bebangahle bancunywe esinagogeni. ₄₃Babetsandza kakhulu kudvunyiswa bantfu kunekudvunyiswa nguNkulunkulu.

₄₄Jesu wakhuluma ngelivi lelikhulu watsi: “Lowo lokholwa ngimi, akakholwa ngimi kodvwa ukholwa ngulowo longitfumile. ₄₅Lowo lobona mine, ubona lowo longitfumile. ₄₆Ngite ngikukhanya emhlabeni, kuze kutsi wonkhe lokholwa ngimi angahlali ebumnyameni. ₄₇Umuntfu nakaweva emavi ami kepha angete awenta, angimehluleli; ngobe angiketeli kutakwehlulela live, kodvwa ngitele kutewulisindzisa. ₄₈Longalako, angawemukeli emavi ami, unemehluleli; livi lengilikhulumile liyawuba ngumehluleli wakhe ngemhla wekuphela. ₄₉Ngobe mine angikatikhulumeli ngekwami, kodvwa Babe, lokunguyena angitfumile, nguye longinike imiyalo yekutsi ngifanele ngitsini, ngikhulumeni. ₅₀Ngiyati kutsi imiyalo yakhe ikuphila lokuphakadze. Ngako-ke loko lengikushoko, ngikusho njengobe Babe angitjelile.”