1 kubaseThesalonika 5

₁Mayelana netikhatsi nangematfuba, bazalwane, anidzingi kubhalelwa ngako. ₂Ngobe nine ngekwenu nati kahle kamhlophe kutsi lilanga leNkhosi liyawufika, njengelisela lifika ebusuku. ₃Ngesikhatsi bantfu batsi: “Kunekuthula nenhlalakahle,” ngekushesha lokukhulu kubhujiswa kuyawubatuma njengemhelo ufikela umfati nasatawubeleka; futsi kute loyawusindza. ₄Kodvwa nine, bazalwane, anikho ebumnyameni, anikafaneli kutunywa ngulelo langa njengekutunywa lisela. ₅Nine nonkhe ningemadvodzana ekukhanya nemadvodzana emini; asisibo bebusuku nebebumnyama. ₆Ngako-ke, asingalali njengalabanye; kufanele silindze sizitse. ₇Phela labo labalalako balala ebusuku, netidzakwa tidzakwa ebusuku. ₈Kodvwa tsine lesibemini asizitse, sembatse sivikelo sesifuba lesikukholwa nelutsandvo, sifake nempantitje lelitsemba letfu lensindziso. ₉Ngobe Nkulunkulu akasimiselanga kwehlelwa lulaka lwakhe, kodvwa wasimisela kutsi sitfole insindziso ngeNkhosi yetfu Jesu Khristu, ₁₀lowasifela kuze kutsi, nome silindza nome silala, nakabuya, siphile kanye naye. ₁₁Ngako-ke dvudvutanani nakhane, njengobe nenta nje manje.

₁₂Siyanincenga, bazalwane, kutsi nibahloniphe labo labasebenta emkhatsini wenu, babaholi benu eNkhosini, labaniyala ngemphilo yebuKhristu. ₁₃Bahlonipheni ngelutsandvo lolukhulu ngenca yemsebenti wabo. Hlalisanani ngekuthula.

₁₄Bazalwane, siyanikhutsata kutsi necwayise emavila, nibanike sibindzi labaphelelwa ngemandla emoyeni, ninakekele lababutsakatsaka, babeketeleleni bonkhe. ₁₅Bonani kutsi kubete lophindzisela kulomunye lokubi ngalokubi, kodvwa ngato tonkhe tikhatsi yetamani kwenta lokuhle kubo bonkhe bantfu.

₁₆Tfokotani njalo. ₁₇Thandazani ningayekeli.

₁₈Bongani kuko konkhe, ngobe loko kuyintsandvo yaNkulunkulu kuKhristu Jesu ngani.

₁₉Ningamcishi Moya Longcwele. ₂₀Ningakwedzeleli kuphrofetha. ₂₁Hlolisisani konkhe, nibambisise lokulungile, ₂₂nikugege konkhe lokubonakala kukubi.

₂₃Shangatsi Nkulunkulu wekuthula anganingcwelisa ngalokuphelele, agcine umoya wenu, nemphefumulo wenu, nemtimba wenu, kungabi nasici ekubuyeni kweNkhosi yetfu Jesu Khristu. ₂₄Yena lowo lonibitako uyawukwenta loko, ngobe wetsembekile.

₂₅Bazalwane, sikhulekeleni.

₂₆Bingelelani bonkhe bazalwane ngekwanga lokungcwele.

₂₇Ngiyaniyalisisa egameni leNkhosi kutsi lencwadzi niyifundzele bonkhe bazalwane.

₂₈Umusa weNkhosi yetfu Jesu Khristu awube nani.