2 kubaseThesalonika 1

₁Lencwadzi iphuma kuboPawula, naSilasi, naThimothi; iya kubaseThesalonika labalibandla laNkulunkulu, longuBabe wetfu, neleNkhosi Jesu Khristu. ₂Akube kini umusa nekuthula lokuvela kuNkulunkulu, longuBabe, naseNkhosini Jesu Khristu.

₃Simele kubonga Nkulunkulu ngani, bazalwane, ngaso sonkhe sikhatsi. Yebo, kufanele simbonge, ngobe kukholwa kwenu kuyakhula kakhulu, nelutsandvo lenitsandzana ngalo luyandza. ₄Nguko nje tsine ngekwetfu sitigabatisa ngani emabandleni aNkulunkulu; sibonga indlela lenibambelele ngayo ekukholweni kwenu nome nitingelwa kangaka, noko nikwatile kutimela tinhlupheko. ₅Loku kusibonelo lesikhanyako ngekwehlulela kwaNkulunkulu lokunekulunga, nize nitfolakale ningulabafanele umbuso waNkulunkulu wona lowo leniwuhluphekelako. ₆Ngempela Nkulunkulu wehlulela kahle ngekubuyisela kuhlupheka kulabo labanihluphako, ₇bese uletsa kuphumula kini nine lenihluphekako, kanye nakitsi ngesikhatsi iNkhosi Jesu yembulwa ivela ezulwini, ikanye netingilosi tayo letinemandla. ₈INkhosi iyawuvela emalangabini emlilo, ijezise labo labangamati Nkulunkulu, nalabo labangalilaleli liVangeli leNkhosi yetfu Jesu. ₉Bayawujeziswa ngekubhujiswa kwaphakadze balunyulwe ebukhoneni beNkhosi nasenkhatimulweni yemandla ayo. ₁₀Loko kuyakwenteka ngelilanga nayifika kutawudvunyiswa kulabangcwele bayo, bayibabate bonkhe labakholwako; nani niyawube nisemkhatsini wabo, ngobe nani nabemukela bufakazi betfu ngayo.

₁₁Kunguko nje sinikhulekela onkhe emalanga, kuze kutsi Nkulunkulu wetfu anente nibe ngulabafanele lubito lwakhe, nekutsi aphelelise ngemandla akhe konkhe lokuhle lenifisa kukwenta, nemsebenti wekukholwa. ₁₂Sikhulekela kutsi libito leNkhosi yetfu Jesu lidvunyiswe kini, nani kuye, ngekwemusa waNkulunkulu wetfu neweNkhosi Jesu Khristu.