SIRAKA 6

₁Bitso lebe le tlisa lihlong

le sekhobo;

moetsalibe ea leme le ntlha-peli

o hlaheloa ke tse joalo.

₂U se ke ua kenoa

ke moea oa boiphahamiso,

esere oa u khabela litsekana

joaloka poho;

₃o tla metsa mahlaku a hao

'me o senye tholoana tsa hao,

'me u tla sala u ka sefate se ponneng.

₄Moea o mobe o tla senya

ea nang le oona,

'me o mo tšehise lira tsa hae.

₅Ho qoqa hamonate ho eketsa

metsoalle,

ho bua hantle ho hohela

litumeliso tsa batho.

₆Ba be bangata bao u phelisanang

ka khotso le bona,

empa a le mong feela ho ba sekete

e be moeletsi oa hao.

₇Ha u batla motsoalle,

qala ka ho mo nonya;

u se potlakele ho bea

tšepo ea hao ho eena.

₈E mong ke motsoalle

ka nako eo a ratang,

empa mohla u oetseng tsietsing

ha e sa le eena.

₉E mong ke motsoalle ea fetohang sera,

ea u hlabisang lihlong

ka ho totobatsa qabang ea lona.

₁₀E mong ke motsoalle ea jang le uena,

empa mohla u oetseng tsietsing

ha e sa le eena.

₁₁Ha u atlehile, o tla ipapisa le uena,

a phuthulohe ka har'a lelapa la hao.

₁₂Empa ha u ka theoha boemong boo,

o tla u fetohela,

'me a ipatele uena.

₁₃Qoaea lira tsa hao,

empa u hlokomele le eona

metsoalle ea hao.

₁₄Motsoalle ea tšepahalang

ke tšireletso e matla,

ea mo fumaneng o fumane letlotlo.

₁₅Motsoalle ea tšepahalang

o feta chelete,

bohlokoa ba hae

bo ke ke ba lekanngoa.

₁₆Motsoalle ea tšepahalang

ke setlhare se phelisang,

o tla fumanoa ke ba tšabang Morena.

₁₇Ea tšabang Morena o tla etsa

setsoalle se lokileng;

hobane kamoo a leng kateng,

le molekane oa hae o tla ba joalo.

₁₈Ngoan'a ka, ho tloha bocheng

ipatlele koetliso;

'me ho fihlela ha u e-ba

moriri o moputsoa,

u tla 'n'u fumane bohlale.

₁₉Bo atamele joaloka ea lemang

le ho jala,

'me u emele kotulo e ntle ea bona.

Ha u lema tšimo ea bohlale,

u tla sebe-sebetsa ho se hokae,

'me kapele-pele u tla ja

kotulo ea bona.

₂₀Bo bonahala bo le thata

ho ba sa rupeloang;

motho ea se nang kutloisiso

a ke ke a lula le bona.

₂₁Bohlale bo tla mo imela joaloka lejoe,

'me ha a ka ke a lieha

ho bo betsetsa koana;

₂₂hobane bohlale bo bolela bohlale,

bo iponahatsa ho ba seng bakae feela.

₂₃Mamela, ngoan'a ka,

'me u amohele keletso ea ka;

u se ke ua hana tao ea ka.

₂₄Kenya maoto a hao mahlaahleleng

a bohlale,

le molala oa hao jokong ea bona.

₂₅Kenya lehetla la hao tlas'a bona

'me u bo jare;

tlas'a litlamo tsa bona se koma-kome.

₂₆Bo atamele ka moea oohle oa hao,

'me u latele tsela tsa bona

ka matla 'ohle a hao.

₂₇Phenya 'me u tsome bohlale,

'me bo tla itsebisa uena,

'me ha u ka bo tšoara,

se bo lese ho ikela.

₂₈Khabareng u tla fumana phomolo

eo bo fanang ka eona,

'me bo tla fetoha thabo ho uena.

₂₉Mahlaahlela a bona

e tla ba ho uena tšireletso e thata,

'me joko ea bona

e be joaloka seaparo sa tlotla.

₃₀Bohlale e tla ba mokhabo

oa khauta ho uena,

'me litlamo tsa bona

e be khoele e perese.

₃₁U tla bo apara

joaloka seaparo sa tlotla,

'me u bo roale

joaloka mofapahlooho oa thabo.

₃₂Haeba u rata, ngoan'a ka,

u tla rupeloa;

'me ha u ineela, u tla fetoha mohlalefi.

₃₃Haeba u thabela ho mamela,

u tla rua tsebo,

'me ha u sekeha tsebe ea hao,

u tla ba bohlale.

₃₄E-ea phuthehong ea ba baholo,

u fumane ea bohlale, u mo khomarele.

₃₅Itokisetse ho mamela ka thabo

lentsoe ka leng le nang le borapeli;

'me u se etse hore maele a bohlale

a u phonyohe.

₃₆Haeba u tseba motho ea seli,

tsohella tseleng ho mo chakela;

etsa hore oto la hao le phumole

sehatelo sa monyako oa hae.

₃₇Inahane ka melao ea Morena,

'me u ikelelloe ka nako tsohle

melaong ea hae.

Ke eena ea tla matlafatsa pelo ea hao,

'me u tla neoa bohlale

boo u bo lakatsang.