Boitšepo bo bobe
1Se bee pelo ea hao maruong a hao,
leha e le ho re:
“Ke na le ho ntekaneng.”
2U se ke ua latela tšekamelo
le matla a hao,
u tsamaea ka litakatso tsa pelo ea hao.
3U se ke ua re: “Nka busoa ke mang?”
hobane ruri Morena o tla u otla.
4U se ke ua re: “Ke sitiloe,
empa ha kea fumana kotlo,”
hobane Morena o tseba ho iphapanya.
5U se ke ua ba le tšepo e kaakaalo
ea hore u tla tšoareloa;
eaba u phaella sebe holim'a sebe.
6U se ke ua re: “Mohau oa hae
o moholo,
o tla ntšoarela libe tse ngata-ngata
tsa ka;”
hobane ka bobeli mohau le khalefo
li ho eena,
'me bohale ba hae
bo holim'a baetsalibe.
7U se ke ua lieha ho retelehela
ho Morena,
leha e le ho busetsa morao
letsatsi le letsatsi;
hobane hang-hang khalefo ea Morena
e tla ipetsa,
'me mohla letsatsi la phetetso
u tla timela.
8U se ke ua itšetleha
ka leruo la bolotsana,
le ke keng la u thusa ka letho
mohla bomalimabe bo u hlahelang.
Botšepehi le boitšoaro
9U se ke ua olosa
moeeng ofe kapa ofe,
leha e le ho latela tsela efe kapa efe;
moetsalibe ea leme le ntlha-peli
o joalo.
10U tsitse kutloisisong ea hao,
'me u etse hore puo ea hao
e se lubakane.
11U be chatsi ho mamela,
'me u arabe tlas'a boimamelo.
12Ha u e-na le kutloisiso,
araba moahisani oa hao;
empa haeba ho se joalo,
bea letsoho la hao molomong.
13Tlotla le tlontlollo li tsoa ho bueng,
'me leleme la motho ke selomo sa hae.
14U se ke ua bitsoa lehehle,
'me u se ke ua khukhunela batho
ka leleme la hao;
hobane mahlabisa lihlong
a tlela lesholu,
le kahlolo e boima
ea leme le ntlha-peli.
15Tabeng tse kholo kapa tse nyenyane,
u se ke ua sebetsa ka phoso;
'me u se be sera
bakeng sa ho ba motsoalle.
