LIPESALEMA 80

₂Oho, molisa oa Iseraele,

ak'u re sekehele tsebe;

uena ea tsamaisang lelōko la Josefa,

ea le tsamaisang joaloka mohlape,

uena ea lutseng

holim'a likerubime,

₃ak'u iponahatse ho Efraime,

le ho Benjamine, le ho Manase.

Bontša matla a hao, u re pholose.

₄Oho, Molimo, ak'u boele u re tsose,

u re bontše sefahleho

se khanyang khotso,

re tle re pholohe.

₅Morena, Molimo oa mabōtho,

u tla re halefela ho fihlela neng,

rōna chaba sa hao se u rapelang?

₆U se phelisa ka likhapha

joalokaha eka ke bohobe,

u se noesa meokho e mengata.

₇U re entse sesosa sa litsekisano

tsa bao re ahisaneng le bona,

lira tsa rōna lia re soma.

₈Oho, Molimo oa mabōtho,

ak'u boele u re tsose,

u re bontše sefahleho

se khanyang khotso,

re tle re pholohe.

₉U ile ua hlomola morara Egepeta,

ua tla o hloma moo,

moo u lelekileng lichaba teng.

₁₀U ile ua o lokisetsa mobu,

metso ea teba,

eaba oona o tlala naha.

₁₁Moriti oa oona oa koahela lithaba,

mahlaku a koahela lifate,

fate tsa likedare tse telelehali.

₁₂Makala a oona a nama,

a nama ho ea fihla Leoatleng,

mahlomela a ea fihla Nōkeng.

₁₃Ke'ng ha u lihile metero ea oona,

hore o tle o ikhelloe

ke mofeta-ka-tsela,

₁₄o tle o fatakoe ke kolobe-moru,

o jeoe ke batana tsa naha?

₁₅Oho, Molimo oa mabōtho,

ak'u boele u khutle;

ak'u talime u le maholimong,

u bone, u hlokomele morara ona.

₁₆Sireletsa se hlomiloeng,

ke tsoho la hao le letona,

mora eo u ikhōliselitseng eena.

₁₇Ba o chesitseng ka mollo,

ba o remileng,

ba ke ba timetsoe ke khalefo,

khalefo ea fahleho sa hao.

₁₈Tsoho la hao le ke le be

holim'a mokhethoa oa hao,

mora eo u ikhōliselitseng eena.

₁₉Joale ha re sa tla hlola re u furalla,

ak'u boele u re phelise,

re tle re rapele lebitso la hao.

₂₀Oho, Morena, Molimo oa mabōtho,

ak'u boele u re tsose,

u re bontše sefahleho

se khanyang khotso,

re tle re pholohe.