LIPESALEMA 79

Morena, balichaba ba kene,

ba kene har'a lefa la hao,

ba silafalitse Tempele,

Tempele ea hao e halalelang,

ba fetotse Jerusalema lesupi.

₂Litōpō tsa bahlanka ba hao

ba li abetse nonyana tse fofang,

litōpō tsa batšepuoa ba hao

ba li abetse batana tsa naha.

₃Ba tšolotse mali a bona

joaloka metsi hohle Jerusalema,

'me ha ho ea ba epelang.

₄Re sekhobo

ho bao re ahisaneng le bona,

re pale le sesomo

ho ba re pota-potileng.

₅Morena, u tla re halefela

ho fihlela neng?

Lefufa la hao le tla 'ne le tuke,

le tuke joaloka mollo

ho fihlela neng?

₆Theolela khalefo ea hao

holim'a balichaba,

balichaba bana ba sa u tsebeng,

le holim'a mebuso ena,

mebuso e sa rapeleng lebitso la hao;

₇hobane li metsitse lelōko la Jakobo,

li fetotse leaho la lona lesupi.

₈U se ke ua re balla melato,

melato ea bo-ntat'a rōna,

u mpe u re khahlanyetse kapele,

u re khahlanyetse ka lerato la hao,

hobane re nyenyefalitsoe haholo.

₉Ak'u re thuse, Molimo,

uena mopholosi oa rōna,

bitso la hao le tle le tlotlisoe;

ak'u re namolele,

'me u re tšoarele libe

ka baka la lebitso la hao.

₁₀Ke hobane'ng ha balichaba ba tla re:

“O kae Molimo oa bona?”

A re ke re bone ka mahlo a rōna

ha u phetetsa mali

a bahlanka ba hao,

mali a tšolotsoeng ke balichaba.

₁₁Mefehelo ea batšoaruoa

e ke e finyelle ho uena,

ka matla a letsoho la hao

ak'u pholose ba ahlōletsoeng lefu.

₁₂Morena, bao re ahisaneng le bona

u ke u ba buseletse hasupa

linyefolo tseo

ba u nyefotseng ka tsona.

₁₃Empa rōna sechaba sa hao,

mohlape oa makhulo a hao,

re tla u boka kamehla,

re phetele melōko eohle

lithoko tsa hao.