LIPESALEMA 62

₂Ke ho Molimo feela

moo moea oa ka o ka phomolang,

pholoho ea ka e tsoa ho eena.

₃Ke eena feela lefika la ka

ke eena feela pholoho ea ka;

ke qhobosheane ea ka,

nke ke ka sisinyeha.

₄Lōna bohle, le tla 'ne le pheelle

ho rusolla motho ho fihlela neng,

leha a se a le joaloka lerako,

rako le hlephileng,

le motero o nyehlileng?

₅Ruri ba rera ho mo liha

boemong ba hae bo phahameng,

ba thabela leshano.

Ka melomo

ba hlohonolofatsa motho,

empa ka lipelong

baa mo rōhaka.

₆Moea oa ka o phomola

ho Molimo feela,

hobane tšepo ea ka e tsoa ho eena.

₇Ke eena feela lefika la ka

le pholoho ea ka;

ke qhobosheane ea ka,

nke ke ka sisinyeha.

₈Pholoho ea ka

e tsoa ho Molimo,

le tlōtla ea ka

e tsoa ho eena,

ke eena lefika la ka le matla;

Molimo ke setšabelo sa ka.

₉Mo tšepeng ka linako tsohle,

mo tšepeng lōna chaba sa heso,

'muleleng lifuba tsa lōna.

Molimo ke setšabelo sa rōna.

₁₀Bafo ke lefeela,

marena ke thetso;

sekaleng ba bobebe,

kaofela ha bona ke lefeela.

₁₁Se tšepeng ho hanyapetsa batho,

se ithetseng ka ho ikhapela maruo,

ka ho ikhapela maruo a ba bang;

leha maruo a lōna a ka eketseha,

se beeng pelo tsa lōna ho 'ona.

₁₂Molimo o buile hanngoe,

'na ka utloa tsena tse peli:

Matla ke a Molimo,

₁₃le mohau ke oa hao, Morena;

ke uena ea putsang motho,

ho ea ka liketso tsa hae.