LIPESALEMA 28

Ke ipiletsa ho uena Morena;

Lefika la ka, ntšekehele tsebe,

esere ha u sa 'mamele,

ka ba joaloka ba theohelang,

ba theohelang lebitleng.

₂Ak'u utloe thapeli ea ka,

ha ke u llela,

ke phahamiselitse matsoho a ka

Sehalalelong se halalelang

ka ho fetisisa.

₃Se nkahlōle le ba khopo,

ba etsang tse sa lokang,

ba buisanang le batho ka khotso,

empa pelo tsa bona li tletse bobe.

₄Ba putse

ho ea ka mesebetsi ea bona,

ho ea ka bobe ba liketso tsa bona;

ba putse ho ea ka mesebetsi,

mesebetsi ea matsoho a bona,

u ba nee tse ba lōkelang.

₅Kaha ba sa natse

liketso tsa Morena,

le ho tsotella mesebetsi,

mesebetsi ea matsoho a hae,

o tla ba tamolla, a ba timetse.

₆Ho bokoe Morena,

hobane o utloile thapeli ea ka.

₇Morena ke matla a ka le thèbè ea ka;

pelo ea ka e mo tšepile,

'me o nthusitse;

pelo ea ka e nyakaletse,

ke 'moka ka lipina.

₈Morena ke matla a sechaba sa hae,

ke setšabelo se pholosang,

setšabelo sa Motlotsuoa oa hae.

₉Pholosa sechaba sa hao,

u hlohonolofatse lefa la hao;

u se fepe,

u se pepe kamehla le mehla.