LIPESALEMA 27

Morena ke leseli la ka

le pholoho ea ka;

nka tšaba mang?

Morena ke setšabelo

sa bophelo ba ka;

nka tšoha mang?

₂Ha ba etsang bobe

ba ntoantša ho mpolaea,

lira tseo tsa ka le bao ba ntlhoileng

baa khōthōmetseha, ba oe.

₃Leha nka likaneloa ke mara,

nke ke ka tšoha letho;

esita leha nka futuheloa,

le teng ke tla 'ne ke be le tšepo.

₄Ntho e le 'ngoe feela

eo ke e kōpang,

eo ke e batlang ho Morena,

ke hore ke phele ka tlung ea Morena

ka matsatsi 'ohle a bophelo ba ka,

ke tle ke bohe

bokhabane ba Morena,

ke bo nahanisise

ke le ka Tempeleng ea hae.

₅Nakong ea tsietsi o tla ntšireletsa,

a ntšireletse

motlotloaneng oa hae,

a mpate motšeo ho tente ea hae,

a ntlhoesetse

holim'a lefika la pholoho.

₆Joale ke tla phahamela

lira tsa ka tse ntikileng,

ke tla etsa mohoo oa thabo

ha ke nyehela,

ha ke nyehela ka mahlabelo

ka tenteng ea hae,

ke bine, ke roke Morena.

₇Ak'u nkutloe, Morena,

ha ke ipiletsa ho uena;

u nkhauhele, u nkarabe.

₈Pelo ea ka e lohotha uena, e re:

“Batla fahleho sa hae.”

Ruri ke batla fahleho sa hao,

uena Morena.

₉U se mpatele fahleho sa hao;

u se halefele mohlanka oa hao,

ua mo leleka.

Ke uena mothusi oa ka,

u se ke ua ntebela;

u se ke ua ntahla Molimo,

mopholosi oa ka.

₁₀Leha ntate le 'mè ba ka ntahla,

Morena o tla nthola.

₁₁Mpontše tsela ea hao Morena,

u ntsamaise 'mileng o bataletseng,

ka baka la ba ntaletseng.

₁₂Se tlohele lira tsa ka

ho etsa borata ka 'na,

hobane paki tsa bohata

li eme lepaketla,

lia nqōsa,

li bile lia ntšokela.

₁₃Ruri Morena o tla ntsoela molemo,

a ntsoele molemo

lefatšeng la ba phelang.

₁₄Lebella Morena, u be sebete;

tiea pelo, u lebelle Morena.