1Ea khopo o baleha
a sa phalalisoe ke motho,
ba lokileng
bona ba sebete joaloka tau.
2Chaba ha se le khopo
se hlahlamanya babusi,
empa toka e hlaha
ka ea nang le bohlale le tsebo.
3Mofumanehi
ea hatellang bafumanehi
o ka sekhōhōla se senyang lijalo.
4Ba tlōlang molao
ba thōhōletsa ba khopo,
empa ba o bolokang
ba hanyetsana le ba khopo.
5Batho ba khopo
ha ba na kutloisiso ea toka,
ba khumamelang Morena
ba na le kutloisiso ea tsohle.
6Ho molemo ho ba mofutsana
ea phelang ka botšepehi,
ho e-na le ho ba morui
ea phelang ka bolotsana.
7Ea bolokang molao
ke mora ea bohlale,
ea tloaetseng menyollo
o hlabisa ntat'ae lihlong.
8Ea atisang ruo la hae
ka ho le tsoalisa,
a le atise le ka ho hanyapetsa,
o le bokellela
ea tla hauhela mafutsana.
9Ea ithibang litsèbè
hore a se utloe molao,
thapelo tsa hae
le tsona ke manyala.
10Ea khelosang ba lokileng
hore ba ee tseleng tse khopo,
o tla oela lemeneng
le chekiloeng ke eena;
ba se nang molato
ba tla ja lefa la tse molemo.
11Morui o ithetsa
ka ho re o bohlale,
mofutsana ea seli
o lemoha boithetso boo ba hae.
12Ha ba lokileng ba busa
chaba sea thōhōletsa;
ha ba khopo ba busa
chaba sea ipata.
13Ea patang libe tsa hae
a ke ke a ba le katleho;
ea ipolelang tsona, a li bakela,
o tla fumana mohau.
14Ho lehlohonolo motho
ea tšabang Morena kamehla,
empa ea ithatafatsang pelo
o tla oela tsietsing.
15Joalokaha tau e puruma
le bèrè e khobolaka,
'musi ea khopo o joalo
ha a busa bafumanehi.
16'Musi ea sethoto
ke 'mampoli ea sehlōhō;
ea hloileng maruo a bolotsana
o tla phela halelele.
17Ea molato
oa ho tšolla mali a motho,
e tla ba mophaphathehi
ho isa lefung,
ho se be ea lekang ho mo thiba.
18Ea phelang ka botšepehi
o tla fumana pholoho;
ea phelang ka bokhopo
eena hang-hang o tla timela.
19Ea lemang masimo a hae
o tla chaea haholo;
ea pheellang mafeela
o tla futsaneha haholo.
20Motho ea tšepahalang
o tla hlohonolofala haholo,
athe ea potlakelang ho rua,
kotlo o tla e fumana.
21Ho ahlōla ka leeme
hase ntho e ntle,
empa motho a ka 'n'a etsa sebe,
hore a fumane sengoathoana.
22Ea mahlo a matšo
o potlakela leruo,
ha a nahane le hore bofuma
bo tla mo oela holimo.
23Ea khalemang motho e mong,
o tla ratoa,
ho feta ea qekisang ka leleme la hae.
24Ea utsoetsang ntat'ae kapa 'm'ae,
a nts'a ithetsa ka ho re:
“Hona hase sebe,”
ea joalo eena
ke motsoalle oa lisenyi hantle.
25Motho ea ikhōhōmōsang
o fehla moferefere;
ea itšepelang Morena
o tla fumana katleho.
26Motho ea sethoto
ke ea itšepang boeena,
ea sebetsang ka bohlale
o tla fumana pholoho.
27Ea fanang ho mafutsana
ha ho seo a ka se hlokang;
ea sa a natseng ka letho
o tla rōhakoa ke ba bangata.
28Ha ba khopo ba busa,
chaba sea ipata;
empa ha ba timela,
ba lokileng ba tla ngatafala.
