MAELE 29

₁Motho ea 'nileng a khalengoa

empa a satalatsa molala,

hang-hang o tla oeloa ke kotsi,

pheko e be sieo.

₂Ha ba lokileng ba ngatafala,

chaba sea nyakalla,

empa ha ba khopo ba busa

chaba sea lla.

₃Ea ratang bohlale o thabisa ntat'ae,

ea mathang le liotsoa

o hafaka leruo la hae.

₄Ha khosi e thahasella toka,

puso ea tsitsa,

khosi e khethisang sechaba haboima

e futsanehisa naha.

₅Motho ea phoqang mohahabo

o ichehela leraba ka boeena.

₆Sebe sa ea khopo

ke lemena ho eena,

empa ea lokileng

o bina a nyakaletse.

₇Ea lokileng

o hlokomela tokelo tsa bafumanehi,

empa ea khopo

eena ha a li natse ka letho.

₈Basomi ba fehla moferefere,

ba o fehla kahar'a motse,

empa ba bohlale

ba kokobetsa khalefo.

₉Ha motho ea bohlale

a qosana le ea sethoto,

leha ea sethoto a ka halefa,

kapa a tšeha,

khotso e ke ke ea e-ba teng.

₁₀Ba nyoretsoeng mali

ba hloile ba lokileng,

empa ba lokileng

ba boulela bophelo ba hae.

₁₁Sethoto se hlatsa khalefo ea sona,

empa ea bohlale eena oa e bipa.

₁₂Ha 'musi a mamela mashano,

bahlanka ba hae bohle

ba tla ba khopo.

₁₃Mofumanehi le mohatelli

ba tšoana ka sena:

Morena o tutubolla mahlo,

mahlo a bona bobeli.

₁₄Khosi e ahlōlelang bafumanehi,

e ba ahlolelana ka toka,

terone ea eona

e tla tsitsa kamehla eohle.

₁₅Thupa le khalemo li tlisa bohlale,

empa ngoana ea tlohetsoeng feela,

o hlabisa 'm'ae lihlong.

₁₆Ha ba khopo ba anafala,

bokhopo boa eketseha;

empa ba lokileng

ba tla bona ha ba timela.

₁₇Khalema mora oa hao,

u tla fumana phomolo

le moea oa hao o nyakalle.

₁₈Chaba se sa senoleloang litaba,

se iketsetsa borata,

empa ho lehlohonolo

ea bolokang molao.

₁₉Lekhoba le ke ke la khalengoa

ka ho buisoa feela,

le hoja le utloisisa,

le ke ke la phetha taelo.

₂₀Motho eo ereng ha a bua

a phasolohe,

u ka tšepa sethoto

ho e-na le eena.

₂₁Ea bokotsang khoba la hae

ha a le hōlisa,

le tla qetella le mo hlokela teboho.

₂₂Motho ea bohale o baka liqabang,

ea hlonameng

eena o tletse bokhopo.

₂₃Boikakaso ba motho boa mo liha,

empa boikokobetso

bo mo tlisetsa hlompho.

₂₄Motsoalle oa lesholu o itlhoile,

o utloa thōhako, empa ha a e natse.

₂₅Ho tšaba batho

ke ho ichehela leraba,

empa ea tšepang Morena

o tla bolokeha.

₂₆Ba bangata

ba batla ho ratoa ke 'musi,

empa motho

o fumana toka ho Morena feela.

₂₇Ba lokileng ba nyonya ba sa lokang,

ba sa lokang ba nyonya ba lokileng.