6
1Ha u lula tafoleng,
u e-ja le 'musi,
hopola hantle
hore na u lutse le mang;
2haeba u itseba u le monyollo,
ak'u itšoare, u je joaloka motho;
3u se khalle limènyèmènyè tsa hae,
hoba hase lijo empa e le maraba.
7
4U se k'a itja matla hore u ithuise;
e-ba le bohlale ba ho itšoara.
5Ha u re maruo heli!
u tla bona a s'a nyametse,
hobane a tla fela a mele mapheo,
a fofele holimo sa ntsu,
sa ntsu e le sepakapakeng.
8
6Se je lijo tsa ea lekhonatha,
u se ke ua khalla
limènyèmènyè tsa hae,
7hobane kamehla
o nahana theko ea tsona.
O re ho uena: “E-ja, u noe,”
feela pelo ea hae eona ha e rialo.
8U tla hlatsa le thathana
eo u e jeleng,
ebe mantsoe a hao a monate
a teboho a senyehile.
9
9U se ikhathatse ho bua le sethoto,
hoba se tla nyelisa
bohlale ba lipuo tsa hao.
10
10U se ke ua tlosa
mokolokotoane oa khale,
kapa ua hapa masimo a likhutsana,
11hoba Mosireletsi oa tsona o matla,
ke eena ea tla emela nyeoe ea tsona.
11
12Pelo ea hao
e thahaselle ho ithuta,
tsebe tsa hao
li mamele puo tse nang le tsebo.
12
13Se hlokise ngoana oa hao khalemo,
thupa ke mosesetso
e ke ke ea 'molaea.
14Mo sasare ka lesoai,
u tla mo phemisa lefu.
13
15Mor'a ka, haeba u le bohlale,
le 'na ke tla thaba;
16pelo ea ka e tla nyakalla
ha u bua seo e leng 'nete.
14
17Pelo ea hao
e se khahloe ke baetsalibe,
empa kamehla
u chesehele ho tšaba Morena.
18Ruri u sa na le seo
u se tšepileng kamoso,
'me tšepo ea hao
e ke ke ea ba ea fela.
15
19Mamela, mor'a ka, u tl'u hlalefe,
u tsamaee tseleng e nepahetseng.
20Se tsamaee le ba itlopang veine,
kapa ba khetšèlakang linama,
21hoba matahoa le menyollo
ea futsaneha,
ho tšerehana ho e apesa marantha.
16
22Mamela ntat'ao ea u tsoetseng,
u se nyelise 'm'ao ha a tsofetse.
23Reka 'nete le bohlale
le taeo le kutloisiso,
'me u se ke ua ba ua li rekisa.
24Ntat'a ea lokileng
o nyakalla haholo;
ea nang le mora ea bohlale
o itumela ka eena.
25Ntat'ao le 'm'ao ba ke ba thabe,
'm'ao ea u tsoetseng a ke a nyakalle!
17
26Mor'a ka, ak'u 'nee pelo ea hao,
mahlo a hao a khahloe,
a khahloe ke metsamao ea ka,
27hobane seotsoa
ke lemena le tebileng,
serabu-rabu sona
ke mokoti o patisaneng;
28se lalla joaloka senokoane,
se atisa lihlola har'a banna.
18
29Ea malimabe ke mang?
Ea hlomohileng ke mang?
Ea likhang ke mang?
Ea tletlebang ke mang?
Ea meupa ea bosaoana ke mang?
Ea mahlo-mafubelu ke mang?
30Ke ba hlanyetsang veine,
ba eang ho latsoa veine
e tsoakiloeng.
31U se ke ua talima veine
ha e le khubelu,
ha e phōphōma kahar'a mopotjoana,
ha e re lèlèlè! hamonate 'metsong.
32E qetella ka ho lōma joaloka noha,
mahlōkō a chachametse
joaloka a marabe.
33Mahlo a hao
a tla bona pono lisele,
kelello ea hao
e nahane lintho tse ferekanyang.
34U tla ba joaloka ea robetseng
bolibeng ba leoatle,
ea paqameng
holim'a mehala ea sekepe.
35U tla re: “Ba nkotlile,
empa ha kea utloa bohlōkō!
Ba nchapile, empa ha ke utloe letho!
Ekaba ke tla tsoha neng,
ke tsoe ke tšoara mohotsoana,
ke o tšoara hape?”
