MAELE 22

₁Bitso le letle le molemo

ho feta maruo a mangata,

ho hlompheha ho molemo

ho feta silefera kapa khauta.

₂Morui le mofutsana

ba tšoana ka sena:

Bobeli ba bona

ba bōpiloe ke Morena.

₃Motho ea seli o bona kotsi,

a e balehe;

ea se nang tsebo o hahamalla pele,

a be a e'o oela.

₄Boikokobetso le ho tšaba Morena

li tlisa leruo le tlōtla le bophelo.

₅Meutloa le maraba

li tseleng ea ea khopo,

empa ea ipaballang

eena o tla li qoba.

₆Ruta ngoana tsela ea ho phela,

ha a hōlile a ke ke be a fapoha.

₇Barui ba laola mafutsana;

moalimuoa o fetoha

khoba la moalimi.

₈Ea jalang bokhopo o kotula litsietsi,

khalefo ea hae

e ke ke ea mo thusa ka letho.

₉Motho ea fanang a thabile

o tla hlohonolofatsoa,

hobane eena o fepa mafutsana.

₁₀Leleka mosomi

'me qabang li tla fela,

liphapang le mahlapa

le tsona li khaotse.

₁₁Ea ratang pelo e hloekileng,

eo polelo tsa hae li tletseng mohau,

khosi e tla ba motsoalle oa hae.

₁₂Mahlo a Morena

a falimehela tsebo,

empa o nyōpisa polelo

tsa ea sa tšephahaleng.

₁₃Sekhōba se re: “Tau ke ena kantle!”

kapa se re:

“Ke tla bolaeloa literateng!”

₁₄Molomo oa sehlola

ke lemena le tebileng;

ea halefetsoeng ke Morena

o tla oela ka ho lona.

₁₅Bothoto bo tlameletsoe

ka pelong ea ngoana,

empa thupa ea taeo

e tla bo falatsa ka ho eena.

₁₆Ea tlatlapang mofutsana

ho ikekeletsa leruo,

a bile a etsetsa barui limpho,

o tla futsaneha.

₁₇Thèa tsebe

u mamele polelo tsa ba bohlale,

u ele hloko

ho ithuta tseo ke li tsebang,

₁₈hobane ho monate

ha u li boloka ka pelong ea hao,

kaofela ha tsona

li lutse molomong oa hao.

₁₉Kajeno ke hlile ke ruta uena,

uena ka seqō,

e le hore u tl'u tsebe

ho tšepa Morena.

₂₀Ke u ngoletse

polelo tse mashome a mararo,

tse nang le keletso le tsebo,

₂₁tse u rutang botšepehi

le ho bua 'nete,

ea u rōmmeng u tl'u 'molelle 'nete.

₂₂U se tlatlape mofutsana

hobane e le mofutsana,

u se sotle bahloki ka khotla,

₂₃hobane Morena

o tla emela nyeoe ea bona;

ba ba jeleng

le bona Morena o tla ba felisa.

₂₄U se ke ua etsa setsoalle

le motho ea bohale,

u se tloaelane le sefela-peloana,

₂₅esere ua ithuta mekhoa ea sona,

eaba le uena ua tšoasoa.

₂₆U se ke ua ikana

ka ho etsa tšepiso,

u se itlame

ho lefa melato ea ba bang.

₂₇Ha u hloka seo u lefang ka sona

ba tla u hlakola

esita le moalo oa hao.

₂₈U se ke ua tlosa

mekolokotoane ea khale,

e hlonngoeng

ke baholo-holo ba hao.

₂₉Ha u bona motho

oa setsebi sa mesebetsi,

tseba eo o tla sebeletsa likhosi,

ha a ka ke a sebeletsa bathoana.