Jesu o folisa mohlanka oa molaoli oa lebōtho
1Eare ha a qetile ho bolella batho lipolelo tsohle tsa hae, a ea kena Kaperenauma. 2Joale mohlanka oa molaoli e mong oa lebōtho la ba lekholo, eo e neng e le oa bohlokoa ho mong'a hae, o ne a kula, a le makhatheng a ho shoa. 3Eare hoba molaoli eo a utloele Jesu, a rōma baholo ba Bajuda ho eena, a mo kōpa hore a tl'o folisa mohlanka oa hae. 4Ba fihla ho Jesu ba mo rapela ka matla, ba re: “O lokeloa ke hore u mo etsetse joalo, 5hobane o rata sechaba sa rōna, o bile o re hahetse ntlo ea thapelo.” 6Jesu a ea le bona.
Eare ha a se a se hōle le ntlo, molaoli oa lebōtho la ba lekholo a rōma metsoalle, ea re ho eena: “Morena, u se ke ua ikhathatsa, hobane ha ke tšoaneloe ke hore u kene ka tlung ea ka; 7ka baka leo, ha kea ka ka iphumana ke lokeloa ke ho tla ho uena; mpe u bue feela, 'me mohlanka oa ka o tla fola. 8Le 'na, ke le motho ea laoloang ke ba bang, ke na le bahlabani tlas'a ka, 'me ha ke re ho enoa, ‘E-ea,’ oa ea, le ho e mong ‘Tloo,’ oa tla, le ho mohlanka oa ka, ‘Etsa hona,’ oa etsa.”
9Ha Jesu a utloa tsena, a mo makalla, 'me a retelehela ho letšoele le mo latetseng, a re: “Kea le bolella, ha ke e-s'o fumane tumelo e kaalo le Iseraeleng.” 10Ha ba ronngoeng ba fihla hae, ba fumana mohlanka a folile.
Tsoso ea mora oa mohlolohali
11Kamora' moo Jesu a ea motseng o bitsoang Naine, 'me barutuoa ba hae le letšoelehali ba ea le eena. 12Ha a atamela khoro ea motse, ha be ho ntšoa mofu motseng, mora ea mong, eo 'm'ae e neng e le mohlolohali. Letšoelehali la motse le ne le e-na le eena. 13Eare ha Morena a bona 'm'a mofu, a mo utloela bohlōkō, 'me a re ho eena: “Se lle!”
14Jesu a atamela, a ama lempara, 'me ba jereng mofu ba ema. Eaba o re: “Mohlankana, ke re ho uena, tsoha!” 15Mofu a lula, a qala ho bua, 'me Jesu a mo nea 'm'ae.
16Joale bohle ba tšoha, 'me ba tlotlisa Molimo, ba re: “Moporofeta e moholo o teng har'a rōna.” Hape ba re: “Molimo o etetse sechaba sa hae.” 17Eaba taba tsa hae li phatlalla le Judea kaofela le tikolohong eohle.
Barōmuoa ba Johanne Mokolobetsi
18Barutuoa ba Johanne ba mo tsebisa litaba tseo tsohle. Hoba Johanne a bitse ba babeli ba barutuoa ba hae, 19a ba rōma ho Morena, ho ea re: “Na ke uena ea tla tla, kapa re lebelle e mong?”
20Eare hoba banna bao ba fihle ho eena, ba re: “Johanne Mokolobetsi o re rōmile ho uena, a re: ‘Na ke uena ea tla tla, kapa re lebelle e mong!’ ”
21Ka nako eona eo o ne a folisa ba bangata maloetseng, mahlōkōng le meeeng e mebe, a tutubolla lifofu tse ngata. 22A araba barōmuoa bao, a re: “E-eang le tsebise Johanne tseo le li boneng, le tseo le li utloileng: lifofu li boetse lia bona, liritsa lia tsamaea, balepera baa hloekisoa, 'me bo-tsebetutu baa utloa, bafu baa tsoha, mafutsana a bolelloa molaetsa o molemo; 23ho lehlohonolo mang le mang ea sa khopiseheng ka baka la ka.”
24Eare hoba barōmuoa ba Johanne ba tlohe, Jesu a qala ho bolella matšoele ka Johanne, a re: “Le ne le il'o bona eng feelleng? Lehlaka le tsukutloang ke moea? 25Hantle-ntle le ne le il'o bona eng? Motho ea liaparo tse mabokoboko? Ba liaparo li mabokoboko ba phela menateng, ba matlung a mahosi. 26Ehlile le ne le il'o bona eng? Le il'o bona moporofeta na? E, kea le bolella: e moholo le ho feta moporofeta. 27Ke eo ho ngotsoeng ka eena, ha thoe:
“ ‘Ke rōmela leqōsa la ka ke leo,
le tla u etella pele,
le u lōkisetse tsela.’
28“Kea le bolella, har'a ba tsoetsoeng ke basali ha ho ea fetang Johanne ka boholo, empa e monyenyane 'Musong oa Molimo o mo feta ka boholo.”
29Batho bohle le balekhetho ha ba utloa ba ile ba ananela ho loka ha Molimo, ba kolobetsoa ka kolobetso ea Johanne; 30ha e le Bafarisi le Litsebi tsa Molao ba ile ba fetola morero oa Molimo lefeela, ka ho se kolobetsoe ke eena.
31“Ha ho le joalo batho ba molōko oo, nka ba tšoantša ka'ng? Ba tšoana le eng? 32Ba tšoana le bana ba lutseng lebaleng la motse, ba hōoeletsanang, ba re:
“ ‘Re le letselitse liletsa,
empa ha lea ka la etsa motjeko;
re le binetse koli-ea-malla,
empa ha lea ka la lla.’
33“Etsoe Johanne Mokolobetsi o ile a tla a sa je bohobe, a sa noe veine, 'me le re: ‘O na le modemona.’ 34Mor'a Motho o ile a tla a e-ja, a e-noa, 'me le re: ‘Motho enoa ke monyollo le letahoa, motsoalle oa balekhetho le oa baetsalibe!’ 35Empa bohlale ba Molimo bo netefatsoa ke bohle ba bo neiloeng.”
Mosali oa moetsalibe oa tšoareloa
36E mong oa Bafarisi a memela Jesu ho ja le eena; a kena ka tlung ha Mofarisi eo, a lula, a ja. 37Ho ne ho e-na le mosali oa moetsalibe motseng oo. Ha a tseba hore Jesu o lijong ka tlung ha Mofarisi eo, a tlisa pitsana e tšetsoeng setlolo, 38a ema kamorao, maotong a Jesu, a ntse a lla, a qala ho mo tšèla maoto ka likhapha, a a hlakola ka moriri oa hlooho ea hae, a mo aka maoto, a a tlotsa ka setlolo.
39Ha Mofarisi ea memileng Jesu a bona hoo, a re ka pelong ea hae: “Enoa hojane ke moporofeta, a ka be a tsebile hore na mosali eo ea mo amang ke mang, ke ea joang, hobane ke moetsalibe.”
40Jesu a mo araba, a re: “Simone, ke na le seo ke ratang ho u bolella sona.”
Eena a re: “Moruti, se bolele!”
41“Moalimani e mong o ne a e-na le ba babeli ba alimileng ho eena; e mong o ne a le molato oa lidenare tse makholo a mahlano, e mong eena tse mashome a mahlano. 42Kaha ba ne ba se na seo ba ka 'museletsang ka sona a ba leballa molato bobeli. Ke ofe ho bona ea tla mo rata ho feta?”
43Simone a araba, a re: “Ke hopola hore e tla ba eo a mo lebaletseng ho feta.”
Jesu a re ho eena: “U ahlōtse ka nepo.”
44Eaba o retelehela ho mosali, o re ho Simone: “Mosali eo ua 'mona? Ke kene ka tlung ha hao, ha ua mpha metsi a ho hlatsoa maoto, empa mosali enoa o ile a tšèla maoto a ka ka likhapha, a a hlakola ka moriri oa hae. 45Ha ua nkaka, empa mosali enoa, haesale ke kena, ha a ka a phetsa ho aka maoto a ka. 46Ha ua ka ua ntlotsa hlooho ka ole, empa mosali enoa o ile a tlotsa maoto a ka ka setlolo. 47Ka baka leo, kea u bolella: O tšoaretsoe libe tsa hae leha li le ngata, ka hona o bontšitse lerato le leholo; athe ea tšoaretsoeng ho honyenyane o rata hanyenyane.”
48A re ho mosali: “U tšoaretsoe libe tsa hao.”
49Ba lutseng le eena ba qala ho re ka lipelong tsa bona: “Enoa ke mang, ea tšoarelang le libe?”
50Empa a re ho mosali: “Tumelo ea hao e u pholositse; e-ea ka khotso!”
