ESAEA 1

₂Lōna maholimo mamelang!

Uena lefatše thèa tsèbè!

Morena o buile, a re:

“Ke ōtlile bana,

ke ba hōlisitse,

empa joale ba mphetohetse.

₃Pholo e tseba mong'a eona,

tonki e tseba sejelo sa eona,

empa Iseraele eena o hloka tsebo,

chaba sa ka sona

ha se na kutloisiso.”

₄Jo! chaba sa baetsalibe

se tletseng bokhopo!

Tlōhōlō tsa ba khopo,

bana ba bolileng!

Ba furaletse Morena,

ba nyelisitse

Ea Halalelang oa Iseraele,

ba fela ba mo furaletse.

₅Le sa tla boela le otloa hokae,

ha le ntse le pheella ho mo fetohela?

Hlooho eohle e s'e tletse maōma,

'mele oohle le oona oa kula.

₆Ha ho bophelo

ho tloha bohatong ba leoto,

ho isa hloohong,

ke maqeba le matetetso

le liso tse petlang,

ha li e-s'o hlatsuoe

kapa tsa tlamisoa,

le ho tlotsoa ka ole

ha li e-s'o tlotsoe.

₇Naha ea lōna e hloka baahi,

metse ea lōna e chesitsoe ke mollo,

balichaba ba jesa masimo a lōna,

le ntse le ba bona,

balichaba ba sentse naha ea lōna.

₈Morali oa Sione o siiloe

joaloka lephephe

tšimong ea morara,

joaloka motlotloane

tšimong ea mahapu,

le joaloka motse

o etselitsoeng thibella.

₉Hoja Morena oa mabōtho

a se k'a re siela mahlatsipa,

re ka be re ile

ra ba joaloka Sodoma,

re ka be re ile

ra tšoana le Gomora!

₁₀Lōna baahi ba Sodoma,

mamelang polelo tsa Morena!

Lōna chaba sa Gomora,

mamelang molao

oa Molimo oa rōna!

₁₁Morena o re:

“Molemo oa mahlabelo a lōna

ho 'na ke ofe,

mahlabelo a lōna a mangata-ngata?

Ke tennoe

ke nyehelo tsa lōna tsa secheso,

ke tennoe ke mafura a lipheleu

le a phoofolo tse nontšitsoeng;

ha ke thabele mali a lipohoana,

le a likonyana le liphooko.

₁₂Ha le tlil'o itlhahisa kapele ho 'na,

ke mang ea le kōpileng

ho tla hatakela mabala a ka?

₁₃Khaotsang ho ntlisetsa

nyehelo tse se nang thuso;

mekubetso ea lōna

ke manyala ho 'na,

mekete ea ho thoasa ha khoeli

le ea Lisabatha,

le phutheho tse halalelang

tseo le li memang,

tsena ke bokhopo,

nke ke ka li mamella.

₁₄Mekete ea lōna

ea ho thoasa ha khoeli,

le mekete ea lōna e khethehileng,

moea oa ka o e hloile,

ho 'na e fetohile mejaro,

ke khathetse ke ho e sikara.

₁₅Ha le phahamisa matsoho

ho ipiletsa ho 'na,

ke tla ipata sefahleho;

leha le ka etsa lithapelo tse ngata,

nke ke be ka le mamela,

matsoho a lōna a khanathetse mali.

₁₆Itlhatsoeng, le itlhoekise,

tlosang ketso tsa lōna

tse khopo mahlong a ka,

le khaotse ho etsa bokhopo.

₁₇Ithuteng ho etsa tse lokileng,

le ipatlele le eona toka,

khalemelang mohatelli,

le ahlōlele khutsana hantle,

nyeoe ea mohlolohali

le eona le e emele.

₁₈“Tloong re lokise litaba,”

ho rialo Morena.

“Leha libe tsa lōna

li ka ba khubelu,

li tla soeufala joaloka lehloa;

leha li ka ba khubelu tlere!

li tla soeufala joaloka boea.

₁₉Haeba le rata, le bile le mamela,

le tla ja menono ea fatše lena;

₂₀haeba le ikhanela,

le bile le mphetohela,

le tla bolaoa ka sabole,”

ho rialo Morena.

₂₁Motse o tšepahalang

o fetohile seotsoa se joang!

Pele o ne o tletse toka,

ho loka ho ahile har'a oona,

empa joale o tletse babolai.

₂₂Silefera ea oona

e fetohile manya,

veine ea oona

e hlapolotsoe ka metsi.

₂₃Babusi ba oona ke mahlabaphieo,

ba fetohile metsoalle ea masholu,

kaofela ha bona

ba rata tjotjo,

kaofela ha bona

ba labalabela limpho.

Ha ba ahlōlele khutsana hantle,

nyeoe ea mohlolohali

le eona ha ba e emele.

₂₄Ka baka lena, Morena,

Moren'a mabōtho,

Ea Matla oa Iseraele o re:

“Khalefo ea ka ke tla e hlatsa,

ke e hlatsetse holim'a lira tsa ka,

ke iphetetse ho ba ntoantšang.

₂₅Letsoho la ka le tla u loantša,

ke u hlatsoisise manya a hao,

ke felise ho se hloeke ha hao.

₂₆Ke tla u khutlisetsa baahlōli

ba kang ba pele,

le baeletsi

ba kang ba mehleng ea khale;

kamorao ho tseo

o tla bitsoa motse oa toka,

u bitsoe motse o tšepahalang.

₂₇“Toka e tla pholosa Sione,

ba bakang ba pholosoe ke ho loka.

₂₈Mahlabaphieo le baetsalibe

ba tla ripitloa,

ba furaletseng Morena

ba tla timela.

₂₉“Le tla hlajoa ke lihlong

ke ho khumamela sefate sa eike,

le soabisoe ke rapa

tseo le li khathileng.

₃₀Le tla tšoana le fate sa eike,

se ponang mahlaku,

le be joaloka serapa se omeletseng.

₃₁Motho ea matla

o tla tšoana le toala,

mosebetsi oa hae

o tšoane le tlhase,

motho eo a che le mosebetsi oa hae,

ho se be ea ka timang mollo oo.”