SEFILA SA LIFELA 8

₁Eka u ka be u le khaitseli ho 'na,

'mè a u hōlisitse

ka letsoèlè la hae!

E n'etlare ha ke u fumana

u le kantle,

ebe kea u aka,

ho se be ea ka 'nyatsang.

₂Ke ne ka tla tsamaea le uena

ke u ise lapeng heso,

moo 'mè a ileng a nkhōlisetsa teng;

ke u noese veine

e nang le metsoako,

ke u noese lero

la likharenate tsa ka.

₃Ke samme tsoho la hae le letšehali,

ka tsoho la hae le letona o nkopile.

₄Lōna barali ba Jerusalema

kea le laea:

Le se tsose moratuoa oa ka,

kapa la mo sisinya,

ho fihlela eena a ka rata ho tsoha.

₅Ke mang eo ea tsoang lehoatateng,

a itšetlehile ka moratuoa oa hae?

Tlas'a sefate sa apole

ke ile ka u tsosa,

hona moo 'm'ao

a u emoletseng teng,

hona moo 'm'ao

a u belehetseng teng.

₆Mpee fubeng sa hao

joaloka setempe,

joaloka lesekana

nthoale tsohong la hao,

hoba matla a lerato

a tšoana le a lefu,

sehlōhō sa lefufa

se tšoana le sa lebitla.

Lerato le tuka sa khanare

e tlōla litlhase,

joaloka tetema e laima malakabe!

₇Matlopotlopo a metsi

a ke ke be a le tima,

esita le likhōhōla

li ke ke tsa le hōhōla;

leha motho a ka fana

ka ruo lohle la hae,

ka lona a leka ho reka lerato,

a ke ke a fumana letho,

haese ho nyelisoa!

₈Re na le letlamoroana la khaitseli,

matsoèlè a eona

e sa le liola-molora.

Re tla etsa joang

ka khaitseli ea rōna,

ha mohlankana a rata

ho e hloma lesiba?

₉Haeba khaitseli e le lerako,

re tla e hlomela tora ea silefera;

haeba khaitseli e le monyako,

re tla e koala ka mamati a likedare.

₁₀'Na ke lerako,

matsoèlè a ka a ka litora,

mahlong a moratuoa

'na ke 'musa-pelo.

₁₁Solomone

o n'a e-na le serapa,

rapa sa morara Baale-Hamone,

rapa sena sa hae

a se hirisetsa balemi;

hore balemi ba tle ba kotule

tholoana tsa tšimo eo,

molemi ka mong a lefa

shekele tsa silefera li le sekete.

₁₂'Na tšimo e ka ea morara ke ena,

uena, Solomone,

nka shekele li le sekete,

seabo sa balemi

ke makholo a le mabeli.

₁₃Uena ea phelang ka lirapeng,

metsoalle e mametse ho utloa u bua;

ak'u bue,

le 'na ke utloe ntsoe la hao.

₁₄Potlakela ho 'na, uena moratuoa,

u etsise tšèpè

kapa namane ea khama,

holim'a thaba

tse maririela a linòko.