Moshe o bitsoa ke Molimo
1Moshe o ne a lisa mohlape oa mohoe oa hae Jethero, moprista oa Midiane. A alosetsa mohlape oo hōle lehoatateng, a ba a ea fihla Horebe, thabeng ea Molimo. 2Lengeloi la Morena la iponahatsa ho eena le le kahar'a lelakabe la mollo le tsoang sehlahleng sa monōkōtšoai. Moshe a talima, 'me a bona sehlahla sa monōkōtšoai se laima malakabe, empa se sa che. 3Eaba Moshe o re: “Ke tla khelohela ho sona, nke ke bone pono ena e kholo, le hore na ke'ng ha sehlahla sena sa monōkōtšoai se sa che.”
4Morena a bona hore Moshe oa khelohela, ho ea bona, 'me Molimo a 'mitsa a le kahar'a sehlahla sa monōkōtšoai, a re: “Moshe! Moshe!”
Eaba Moshe o re: “Ke 'na enoa!”
5Molimo a re ho eena: “U se ke ua atamela mona! Rōla meqathatso ea hao, hobane sebaka seo u emeng ho sona sea halalela!” 6A ba a re: “Ke 'na Molimo oa ntat'ao, Molimo oa Aborahama, Molimo oa Isaka, le Molimo oa Jakobo!” Moshe a ipata sefahleho, hobane o ne a tšaba ho talima Molimo.
7Eaba Morena o re: “Ke bone matšoenyeho a sechaba sa ka se Egepeta; ke utloile le sello sa sona, se bakoang ke bahlorisi ba sona, 'me ke tseba litlhōkōfatso tsa sona. 8Ke theohetse lefatšeng ke hona ho tla se lopolla matsohong a Baegepeta; ho se nyolla naheng eo, ke se ise naheng e ntle, e batsi; naheng e phallang lebese le mahe a linotši; naheng ea Bakanana, le Bahete, le Baamore, le Baperise, le Bahife, le Bajebuse. 9Bona, sello sa bana ba Iseraele se fihlile ho 'na; le 'na ke bone khatello ea bona, eo Baegepeta ba ba hateletseng ka eona. 10Tloo he, joale, ke tla u rōma ho Faro, 'me uena u ntše sechaba sa ka, bana ba Iseraele, naheng ea Egepeta.”
11Empa Moshe a re ho Molimo: “'Na ke mang, hoo nka eang ho Faro, ka ntša bana ba Iseraele naheng ea Egepeta?”
12Molimo a re ho eena: “Ke tla ba le uena, 'me sena ke sesupo sa hore ke u rōmile: ha u se u ntšitse sechaba seo naheng ea Egepeta, u tla sebeletsa Molimo thabeng ena.”
Molimo o senola lebitso la hae ho Moshe
13Joale Moshe a re ho Molimo: “Bona, etlare ha ke fihla ho bana ba Iseraele, ke re ho bona: ‘Molimo oa bo-ntat'a lōna o nthōmile ho lōna,’ 'me ba re ho 'na: ‘Lebitso la hae ke mang?’ ke tla re'ng ho bona?”
14Molimo a re ho Moshe: “ke 'na eena eo e ntseng e le eena.” Eaba o re: “U tla bolella sechaba sa Iseraele tjena: ‘eo e ntseng e le eena o nthōmile ho lōna.’ ”
15Molimo a boela a re ho Moshe: “U tla bolella bana ba Iseraele tjena: ‘Morena, Molimo oa bo-ntat'a lōna, Molimo oa Aborahama, Molimo oa Isaka, le Molimo oa Jakobo, o nthōmile ho lōna.’ Lena ke lona lebitso la ka la mehla eohle; ke tla tsejoa ka lona ke melōko eohle.
16“Tsamaea, u bōkelle baholo ba Iseraele, u re ho bona: ‘Morena, Molimo oa bo-ntat'a lōna, Molimo oa Aborahama, le Isaka, le Jakobo, o iponahalitse ho 'na, a re: Ke ile ka le etela, 'me ka bona tseo le li etsoang naheng ea Egepeta. 17Ke re ke tla le ntša matšoenyehong a Egepeta, ke le ise naheng ea Bakanana, le Bahete, le Baamore, le Baperise, le Bahife, le Bajebuse; naheng e phallang lebese le mahe a linotši.’
18“Joale ba tla mamela lentsoe la hao. Uena le baholo ba Iseraele le tla ea ho khosi ea Egepeta, 'me le re ho eona: ‘Morena, Molimo oa Baheberu, o teane le rōna; kahoo rea u kōpa, hore u re lumelle re nke leeto la matsatsi a mararo, re ee lehoatateng, re e'o etsetsa Morena, Molimo oa rōna, sehlabelo.’ 19Feela kea tseba hore khosi ea Egepeta e ke ke ea le lumella ho tsamaea, haese ha e etsoa ka matla hore e etse joalo. 20Kahoo ke tla otlolla letsoho la ka, ke otle naha ea Egepeta ka mehlolo eohle, eo ke tla e etsa teng. Kamorao ho moo khosi e tla le lokolla le tsamaee.
21“Ke tla etsa hore Baegepeta ba hlomphe sechaba sena, 'me ha le tsamaea le ke ke la tsamaea le itlhophere. 22Mosali e mong le e mong oa Moheberu a kōpe lintho tse entsoeng ka silefera, le tse entsoeng ka khauta, le liaparo, ho mosali oa Moegepeta eo ba ahelaneng le eena, le eo e ka bang moeti lapeng la hae. Le khabise bara ba lōna le barali ba lōna ka tsona, 'me ebe le hapa leruo la Baegepeta.”
