PHALLO 2

₁Monna e mong oa lelōko la Levi a ea, a nyala moroetsana oa lelōko la Levi. ₂Mosali eo a ithoala, a tsoala mora. Ha a bona hore o motle, a mo pata ka khoeli tse tharo. ₃Eare ha a se a sitoa ho mo pata, a nka sethōtō se entsoeng ka lehlaka, a se bitiela ka boroku le ka bōka, 'me a bea ngoana ka ho sona, a se bea har'a lehlaka, lebōpong la nōka. ₄Khaitseli ea hae ea emela thōkoana, hore e tle e bone se tla etsahala ho eena.

₅Joale morali oa Faro a theohela nōkeng, ho ea tola; baroetsana ba mo sebeletsang ba 'na ba tsamaea lebōpong la nōka. Morali oa Faro a bona sethōtō har'a lehlaka, 'me a rōmela lekhabunyane la hae ho ea se lata. ₆Ha a se koaholla, a bona ngoana oa moshanyana a ntse a lla. A mo hauhela, a re: “Enoa ke e mong oa bana ba Baheberu.”

₇Eaba khaitseli ea ngoana eo e re ho morali oa Faro: “Na nka ea u bitsetsa mosali oa Moheberu ea nyantšang, a tle a u nyantšetse ngoana eo?”

₈Morali oa Faro a re ho eena: “Tsamaea!” Ngoanana a ea, a bitsa 'm'a ngoana eo. ₉Eaba morali oa Faro o re: “Nka ngoana enoa, u e'o 'nyantšetsa eena, 'me ke tla u nea moputso oa hao.” Mosali eo a nka ngoana, 'me a ea mo nyantša. ₁₀Ha ngoana a se a hōlile, mosali a mo tlisa ho morali oa Faro, ea e-ba mora oa hae. A mo rea lebitso la Moshe, a re: “Ke hobane ke mo inotse metsing.”

₁₁Ka tsatsi le leng, ha Moshe a se a hōlile, a etela bana babo, 'me a bona mosebetsi o boima, oo ba o etsang. Ke ha a bona monna oa Moegepeta a otla monna oa Moheberu oa ba habo Moshe. ₁₂A qamaka ka nq'a tsohle, 'me ha a bona hore ha ho motho, a bolaea Moegepeta eo, a mo epela lehlabatheng. ₁₃Ka letsatsi le hlahlamang a ea hape, a bona banna ba Baheberu ba babeli ba loana; eaba o re ho ea molato: “Ke ka baka la'ng ha u otla ngoan'eno?”

₁₄Eo a araba, a re: “Ke mang ea u beileng hore u be 'musi le moahloli oa rōna? U s'u rata ho mpolaea joalokaha u bolaile Moegepeta?” Eaba Moshe oa tšoha, o re: “Ruri taba ena ea tsejoa!”

₁₅Eare ha Faro a utloela taba ena, a batla ho bolaea Moshe. Empa Moshe a baleha Faro, a tšabela naheng ea Midiane, a fihla a lula pel'a seliba sa moo. ₁₆Joale moprista oa Midiane o ne a e-na le barali ba supileng. Eaba baa tla, ba kha metsi, ba tlatsa senoello, ba noesa mehlape ea ntat'a bona. ₁₇Ke ha ho fihla balisa, eba baa ba leleka; eaba Moshe oa ema, oa ba thusetsa, a ba a noesa mohlape oa bona.

₁₈Ha ba fihla ho ntat'a bona, Reuele, a re ho bona: “Ke ka baka la'ng ha le tlile kapele, kajeno?”

₁₉Ba araba, ba re: “Monna e mong oa Moegepeta o ile a re namolela ho balisa; a ba a re khella metsi, a noesa mohlape.”

₂₀Eaba o re ho barali ba hae: “O kae monna eo? Le ne le mo siela'ng? 'Mitseng, a tl'o ja!”

₂₁Moshe a utloisisa ho lula ha monna eo, 'me monna eo a mo nea Sefora, morali oa hae. ₂₂Sefora a tsoala mora, 'me Moshe a mo rea lebitso la Gereshome, hobane o ne a re: “'Na ke mojaki naheng ea balichaba.”

₂₃Ha ho se ho fetile lilemo tse ngata, khosi ea Egepeta ea e-shoa. Bana ba Iseraele ba luma-luma ka baka la bokhoba ba bona, ba lla. Bokhobeng boo ba bona, sello sa bona sa nyolohela ho Molimo. ₂₄Eaba Molimo o utloa sello sa bona, 'me Molimo a hopola selekane seo a neng a se etse le Aborahama, le Isaka, le Jakobo. ₂₅Molimo a bona bana ba Iseraele, 'me a ba utloela bohlōko.