1Etsisang Molimo, kaha le le bana ba hae ba ratehang. 2Phelang ka lerato, joalokaha le Kreste a le ratile, 'me a tela bophelo ba hae ka baka la lōna, hore e be nyehelo le sehlabelo se monko o monate ho Molimo.
3Empa ha e le bohlola, le tsohle tse litšila, le meharo, li se ke tsa boleloa le ho boleloa har'a lōna, joalokaha ho loketse bahalaleli. 4Ho se be lipolelo tse manyala, tsa bothoto, kapa tsa mesoaso e mebe, e leng tse rōnehang; ho mpe ho isoe liteboho ho Molimo. 5Tsebang hore bohle bao e leng lihlola, kapa ba litšila, kapa ba meharo, hobane meharo ke ho sebeletsa molimo oa bohata, ha ba na ho ja lefa 'Musong oa Kreste le oa Molimo.
Phelang joaloka bana ba leseli
6Ho se be motho ea le thetsang ka lipolelo tsa lefeela, hobane ka baka la tse joalo khalefo ea Molimo e tlela ba sa mo mameleng. 7Le se sebelisane le batho ba joalo.
8Pele le ne le le lefifing, empa kajeno le leseling, hobane le ba Morena. Phelang joaloka bana ba leseli. 9Litholoana tsa leseli ke tsohle tse molemo, tse lokileng le tsa 'nete. 10Khethang tse khahlisang Morena. 11Le se ke la ikamahanya le mesebetsi e nyōpang ea lefifi, le mpe le e nyatse. 12Tseo ba li etsang sephiring, le ho li bolela ho lihlong, 13empa tsohle li tōtōbatsoa ke leseli. 14Tsohle tse bonahatsoang ke leseli li fetoha leseli. Ke ka baka leo ho thoeng:
“Tsoha, uena morobali,
tsoha bafung,
'me Kreste o tla u bonesetsa.”
15Hlokomelang metsamao ea lōna haholo; le se be lithoto, le mpe le be ba bohlale, 16le sebelise monyetla oo le o fumanang, hobane mehla ena e mebe. 17Ka baka leo, se fetoheng maoatla, le mpe le utloisise seo e leng thato ea Morena. 18Se tahoeng ke joala bo le isang boitahlong, le mpe le tlale Moea o Halalelang. 19Khothatsanang ka lipesalema, lifela le lipina tse halalelang; rokang Morena, 'me le 'minele lipesalema ka lipelong tsa lōna. 20Kamehla lebohang Molimo Ntate ka baka la tsohle, ka lebitso la Morena oa rōna Jesu Kreste.
21E mong a ikokobeletse e mong ka ho hlompha Kreste.
Banna le basali ba bona
22Lōna basali, ikokobeletseng banna ba lōna, joalokaha le ikokobeletsa Morena, 23hobane monna ke hlooho ea mosali, joalokaha le Kreste e le hlooho ea Kereke. Ke eena mopholosi oa 'mele, e leng kereke. 24Joalokaha kereke e ikokobeletsa Kreste, ka mokhoa o joalo basali le bona ba ikokobeletse banna ba bona nthong tsohle.
25Le lōna banna, ratang basali ba lōna, joalokaha le Kreste a ratile kereke, 'me a e teletse bophelo ba hae. 26O ratile ho e halaletsa, ka ho e hloekisa ka tlhatsuo ea metsi, le ka lentsoe, 27hore a tle a itlhophele kereke e khabane, e se nang letheba, leha e le masoèbè, leha e le tse ling tsa tse joalo, e mpe e be e halalelang, e hlokang sekoli.
28Le banna ba tšoanetse ho rata basali ba bona joalo, joaloka 'mele ea bona hantle. Ea ratang mosali oa hae oa ithata. 29Ha ho e-s'o be motho ea kileng a hloea 'mele oa hae, empa o ee a o fepe, a o baballe. Sena ke sona seo Kreste a se etsetsang kereke ea hae, 30e leng 'mele oa hae oo re leng litho tsa oona. 31Ka baka lena, monna o tla tlohela ntat'ae le 'm'ae, a matahane le mosali oa hae, 'me ba babeli bao ba tla fetoha ntho e le 'ngoe. 32Polelo ena ke sephiri se seholo, 'me 'na ke re e lekanya Kreste le kereke. 33Ha ho le joalo, e mong le e mong oa lōna a rate mosali oa hae joalokaha a ithata; mosali le eena a hlomphe monna oa hae.
